【思人導遊】精選一日行程‧關西大阪篇~

之前「思人導遊」一直都講開東京行程,都講到悶悶地,係時候轉下另一個港人最愛嘅日本熱點—大阪啦!今次第一次講大阪,所以當然要講下必必必去,無去到就唔好同人講去過大阪嘅景點,就好似東京嘅Tokyo Tower、雷門呢啲咁。如果你已經去過大阪,就一齊睇下以下嘅地方你有無去過啦!如果你未踏足過大阪,咁就要跟住我呢個行程去下啦!好啦唔講咁多,Let’s go!
 
首先,由於呢一個行程實在非常「精選」,所以即使係去開東京但都可以抽一日出黎去個「大阪一日遊」,而唔需要一定係去關西旅行先去到。咁由東京出發到大阪,我地喺最普通嘅情況下都係搭のぞみ号新幹線(nozomi号),由JR東京駅搭到新大阪駅,需時大概兩個半鐘,價錢單程約14450円(普通車指定席)。
*當然新幹線對比起夜行巴士呢啲方法係貴啲,但就比較舒適同適合任何年齡人士乘搭。
 
【06:00~08:30】東京—>大阪
今次嘅主題係大阪一日遊,所以我地都要捉緊時間早啲出發。朝早6點左右我地就要到JR東京駅準備坐のぞみ号新幹線,咁最早就會喺大約8點半到達JR新大阪駅。去到JR新大阪駅之後我地就要轉去大阪市営地下鐵嘅御堂筋線新大阪駅,因為我地要去著名嘅大阪城啦!
 
【09:00~10:30】第一站:大阪城
大阪城出名嘅程度我諗就同東京鐵塔有得比,所以黎到大阪呢個景點係必去嘅。呢到有咩特別?除左富有歷史氣息之外(開設於1931年),我諗四季都擁有超靚自然景色就係呢到最吸引人之處。點樣四季都咁靚?大家睇下相就會明白。
 
而當中天守閣就係嘅大阪城公園嘅中心,佢裡面有好多關於大阪城歷史嘅資料,唔好以為講歷史就一定好悶,其實佢用唔同方式去展示,好似透過高科技影像、微縮模型、小劇場咁,喺8樓仲有個可以飽覽東南西北竹向嘅展望台,等遊客欣賞成個大阪城公園同埋附近嘅建築,非常值得一去。
 
名稱: 大阪城
地址: 〒540-0002 大阪市中央区大阪城1-1
前往方法:搭地下鐵由「新大阪駅」到「天満橋駅」3號出口,步行約15分鐘就會到大阪城中心部(大阪城天守閣)
營業時間:09:00-17:00 (天守閣)
收費:成人600円 (天守閣)
 
【11:00~13:00】第二站:道頓堀
道頓堀就係係人都見過嘅固力果選手果到啦!呢到有林林總總嘅店舖,要行嘅話其實可以行半日,但今次我地主要黎呢到食個lunch,影下相就要去下個景點啦。(經典嘅打卡位就當然係固力果選手呢條橋!)
 
點樣由大阪城去道頓堀?雖然地下鐵都去到,但一日遊嘅話當然要試下啲特別嘅交通方法——大阪水上巴士(水都号アクアmini)!「水都号アクアmini」係專成穿梭大阪城同道頓堀呢兩大人氣景點嘅水上巴士路線,全程大約50分鐘,過程可以欣賞河岸兩邊嘅風景,雖然大家未必聽得明船長全日文嘅介紹,但相信都可以從語氣中感受到佢嘅熱情呀!
 
具體上落車地點、開船時間可以上番官網參考(有中文):http://suijo-bus.osaka/guide/aquamini/information.html
費用(水上巴士):成人1200円/小學生半價
 
食方面,今次選擇掃街飽!黎到大阪,有幾間鋪頭係一定要試嘅,所以我哋就盡量用一餐嘅時間試哂佢地!
1. 章魚燒@壱番
呢間鋪頭推薦嘅係「鹽蛋黃醬味道」嘅章魚燒,呢個味道咸得黎唔會太油,非常易入口。(700円/12個)
地址:大阪府大阪市中央区道頓堀1-10-1
 
2. 大阪燒@美津の
「美津の」係一間好食到有人會為左食佢嘅大阪燒而專程從遠方過去食,所以請大家要有排隊嘅心理準備。
地址:大阪府大阪市中央区道頓堀1-4-15
 
3. 烏冬@道頓堀今井
呢間係創於昭和21年,跨越世代喜愛嘅老鋪。佢最出名嘅係放油炸豆腐條同蔥花嘅清湯烏冬,簡單清淡得黎個油炸豆腐條入哂味,絕對比想像中好食啊!
地址:大阪市中央区道頓堀1丁目7番22号
 
4. 炸串物@だるま
呢間炸串物名店嘅串物,外脆內軟,再加上傳受左80年以上嘅秘製醬汁,一定要試下!
地址:大阪市中央区難波1丁目5-24
 
5. 拉麵@金久右衛門
呢間拉麵店係喺日本著名食評網嘅拉麵部門連續三年排行第一㗎!呢到出名醬油拉麵,以黑醬油做base,再加上蝦、烏賊嘅風味,聽到都吸引呀!
地址:大阪府大阪市東成区深江北3-2-8
 
【13:30~15:00】第三站:通天閣・新世界
通天閣係一坐高100米嘅展望塔,果到有兩個焦點:一係有日本最大嘅鐘,二係有可愛嘅幸運神「ビリケンさん」。
 
呢個位於東邊嘅八角形大鐘,分針有成3.2米,一支針重成30KG!夜晚果時數字位嘅底盤仲會變成LED燈顯示,超級搶眼呀!
 
至於「ビリケンさん」,就係一個幫你考試合格,同幫你搵姻緣嘅福神。而據說摸下佢嘅腳板底就會有運氣,所以其實佢嘅腳底已經被人摸到蝕哂㗎啦!
 
名稱: 通天閣
地址: 〒556-0002 大阪市浪速区恵美須東1-18-6
前往方法:由道頓堀最近嘅なんば駅搭到恵美須町駅(堺筋線)3號出口步行5分鐘
營業時間:09:00-21:00
收費:成人700円/大學生500円/中學生400円/小學生300円
 
【15:30~17:30】第四站:海遊館
呢個水族館係令大阪人好自豪,以室內規模黎計係世界最大型嘅水族館,好犀利㗎!海遊館另一個犀利嘅地方,就係佢嘅訪客入面,有六成都係唔止黎過一次嘅「熟客」。同朋友黎,同另一半黎,再同屋企人黎,有好多人都係黎過幾次,咁你就想像到呢個海遊館有幾吸引啦!
 
另外,每日一到黃昏5點,海遊館就會轉做「夜の海」。有咩特別,就係你可以睇到D海洋生物瞓覺嘅情況囉!而且配合埋夜晚氣氛嘅燈光同音樂,感覺份外浪漫,黎拍拖就最岩啦!
 
名稱: 海遊館
地址: 大阪府大阪市港区海岸通1丁目1番10号 (天保山ハービービレッジ)
前往方法:乘地下鐵中央線由「恵美須町駅」到「大阪港駅」下車,步行約5分鐘
營業時間:10:00-20:00
收費:16歲以上2300円/中小學生1200円/4歲以上600円/60歲以上2000円
 
【18:00~20:00】第五站:梅田スカイビル・空中庭園展望台
 
去完海遊館,我地就出發去梅田啦!喺梅田呢到,有一條「星空藍光散步道」,佢嘅浪漫程度真係要親身去睇先感受到,睇相都只係有一半效果咋!
 
呢條「星空藍光散步道」位於梅田スカイビル(梅田sky building)嘅空中庭園展望台。空中庭園展望台呈冬甩形狀,分別有三層:商店餐廳/展望層/Sky Walk。而「星空藍光散步道」係位於Sky Walk果層,走廊地下鋪滿發光小石,成個感覺就好似喺天上嘅河道行緊一樣…嘩係咪睇圖睇字都覺得好有意境呢?所以話有乜可能唔去呀?
 
名稱:  ルミ・スカイウォーク
地址: 大阪市北区大淀中1-1-88 梅田スカイビル
前往方法:乘地下鐵中央線由「大阪港駅」到「梅田駅」下車步行約9分鐘
營業時間:10:00-22:30
收費:成人800円/中學生500円/小學生300円/幼兒100円/老人700円
 
【20:30~21:00】回程:新大阪駅
由於係一日遊,所以就已經係時候要番東京。咁旅程嘅最後係要做咩?無錯啦係人都知係買手信!所以呢我地會喺新大阪駅到買手信嘅!新大阪駅裡面有唔少賣土產嘅店舖,如果再慢慢行慢慢睇就可能會miss左班車,所以就等我話定你知站內best5手信係咩啦!
 
1. 柿千 大阪名物 「元祖たこむす」
「たこむす」簡單黎講即係章魚燒x飯團,講起大阪就一定會諗到章魚燒,(好似名古屋出名天婦羅,就出現左天婦羅x飯團)所以就唔知點解地將佢同飯團mix埋左啦!/1盒5個,連税682円
 
2. 御菓子司 絹笠 「とん蝶」
唔好被「菓子」兩個字fake左,當你打開個三角形包裝就會知佢又係飯團!(有興趣知點解會用飯團做手信)而佢入面有兩粒顯眼嘅梅干,仲有啲大豆同昆布,唔好睇佢賣相唔多吸引,聽講食落去會有驚喜㗎!/1個326円
 
3. 堺名産けし餅本舗 小島屋 「けし餅」
終於有和菓子出現啦!呢間300年老店嘅けし餅真係要試下呀!佢外表全部都係芥子,咬落爽口,同軟綿綿嘅餅皮做成一大對比,餅入面係紅豆餡,甜度適中。/1盒6個/連税882円
 
4. 千鳥屋 大阪総本店 「みたらし小餅」
1盒12個/連税650円
 
5. 華風料理 一芳亭・福島店 「しゅうまい」
1盒15個/連込970円