【思人導遊】民以食為天!食盡大半日@築地・月島・汐留

黎到日本,無奶油唔瘋狂食正宗日本野嘅!今次呢個行程一定岩哂為食嘅你、你同你,因為我地全日都係咁瘋狂食食食!至於地方,當然就係有好出名嘅築地啦!築地市場作為世界最大級嘅市場,去親日本都一定要黎食早餐!之後我地仲會去食「文字燒」嘅代表地區月島。就等我地用大半日嘅時間去感受下日本嘅食文化,實行呢個超飽肚行程啦!
 
首先,交通方面,我地會喺「築地」駅落車。咁去築地就要搭東京Metro,最近嘅話係日比谷線嘅「築地駅」1、2號出口,同埋都営大江戸線嘅「築地市場駅」A1出口,呢兩到都係行幾分鍾就會到,非常近!咁我假設你住新宿,去築地其實都係大概4-5個字到,唔算太遠,車費就200円。記住係搭東京Metro,唔好心急行錯去JR啊!
 
*休市日可以上「http://www.shijou.metro.tokyo.jp/calendar/2016/」check。
 
築地
 
【09:00~09:30】 築地本願寺
 
又話去築地食早餐嘅?放心,好快就會去食。不過大家睇睇地圖,我地由駅行去築地市場嘅途中會見到呢個「築地本願寺」,所以就好順便咁望兩眼啦!呢個本願寺係京都嘅西本願寺嘅另一個院黎。
 
唔好以為寺就一定好日本風,其實呢個本願寺就有D異國情懷,我諗你望一望佢嘅建築就明點解我會咁講。朝早喺呢到有咩做,就當然係影番幾張靚相,po下IG呃like咁。
 
地址:東京都中央区築地3-15-1
前往方法:東京Metro日比谷線嘅「築地駅」1號出口,一出轉左即到
 
【09:35~11:35】築地場外市場
 
食新鮮海鮮丼啦喂!一大早有得食新鮮魚生飯真係好令人興奮!我地黎到築地場外市場,呢到連接住築地市場(場內),主要係售賣鮮魚比一般客人嘅地方。而呢到當然唔少得美食,壽司、魚生飯、玉子燒等等,可以坐低食又可以拎走逐D逐D食,都好出名嫁!由於呢到條路唔闊,但又有成400間鋪頭,所以喺由早到中午時間都好熱鬧,而且有D店喺下午2點就會關門,所以要去嘅話朝早去就最安全。
 
地址:東京都中央区築地4
 
{1號候選佳麗:築地虎杖 魚河岸千両}
 
其實間間都好正,好難話叫你一定要食邊間。但點都要介紹D比你地嘅,我就揀左以下3間唔錯嘅,你地可以到時睇下自己口味同現場情況再決定下食邊間好。第一間有個稱得上為築地名物嘅「元祖 海鮮ひつまぶし/2399円」。佢係集合左12種以上嘅魚類,仲可以有3種味道嘅食法,包括海鮮丼、撈埋「甘煮3品」食、用昆布,鹽做成嘅汁做成お茶漬け咁食。
 
而且呢間野真係好勁,因為喺築地場外市場就有成7間鋪,每間嘅特徵都各有不同,但都可以食到呢個招牌「元祖 海鮮ひつまぶし」。
 
店名:築地虎杖 魚河岸千両
地址:東京都中央区築地4-10-14
營業時間:07:00~23:00(星期日、紅日收21:00)
 
{2號候選佳麗:まぐろどんぶり 瀬川}
 
呢間金槍魚嘅專門店就特別咯,因為佢嘅Menu就只有一樣野,就係下圖嘅「まぐろどんぶり/900円」。
食金槍魚嘅時候沾上用2種醬油製成嘅特製醬汁會更加正。而且價錢只係1000円以下,真正嘅平靚正呀!
 
店名:まぐろどんぶり 瀬川
地址:東京都中央区築地4-9-12
營業時間:8:00~12:30(賣完就關門)
休息日:星期三、日、紅日、休市日
 
{3號候選佳麗:築地すし一番 築地場外市場中央店 }
 
呢到係每日入貨,提供新鮮壽司/海鮮丼嘅壽司店。呢到嘅招牌就係呢個「鉄火丼/1980円」,係滿滿嘅金槍魚肉呀!
 
當然仲有壽司,當中最推介嘅就係呢個12件set「すし一番極み12貫にぎり/4800円」。
 
仲有另一個正野,就係超豐富「特撰まぐろ重/3980円」!如果係好鍾意食金槍魚嘅朋友就一定唔可以錯過啦!
 
店名:築地すし一番 築地場外市場中央店
地址:東京都中央区築地4-13-15
營業時間:24小時
 
【11:45~12:45】築地場外市場-食べ歩き
 
點解又係同一個地方嘅?好簡單,都話明今次係喪食遊,所以頭先食完D飯呀壽司呢D飽肚野,而家又接住去邊行邊食小食啦!(個人認為為左可以試多D野,可以叫一個飯同朋友share咁樣食,咁就可以食到多D種類食物之餘又無咁飽)
 
{推介一:絶品厚焼玉子}
 
玉子燒相信係唔少香港人都鍾意食嘅日式小食,甜甜地咁超易入口。呢間丸武玉子燒專門店有成80年歷史, 佢嘅玉子燒唔會太甜,而且keep住係傳統嘅味道無變過,包你食到最正宗嘅玉子燒!
 
店名:玉子焼 丸武
地址:東京都中央区築地4-10-10
營業時間:04:00~14:30
 
{推介二:熱辣辣肉饅頭}
 
呢到嘅肉饅頭細細粒,最適合邊行邊食嫁啦!皮薄餡肉多,1個只係90円,仲有用黎做手信嘅一盒(8個)/720円set裝。呢間有D點心feel嘅鋪頭唔止有肉饅頭,仲有黑豚叉燒燒賣、鳥取雞肉燒賣等等呢D夾雜住日本風味嘅港式點心,呢個配搭真係要試一試!
 
店名:菅商店
地址:東京都中央区築地4-10-2
營業時間:06:00~15:00(星期日、紅日、休市日休息)
 
{推介三:絕品名物-團子}
 
呢間團子店係喺大約120年前就創業嘅老鋪黎。想食傳統嘅日本味道就一定要試下呢到嘅團子。必食嘅係成個過程用嘅材料都係自家製嘅「茂助だんご」,無論係自己食定係做手信,都非常有人氣。
 
佢嘅人氣大概就係一日可以賣到1000串。一串大概150円左右,都係買得過嫁!佢好味嘅原因係來自佢嘅材料,好似個餡用左嚴選過嘅北海道十勝產嘅最高級品小豆,再用優質嘅製餡技術做成。反正就係一試會上癮果種!通常去到下午3點左右就會賣哂,所以如果想確保買到就記得早D啦!
 
店名:茂助だんご場外市場店
地址:東京都中央区築地4-14-18
營業時間:07:00~15:00(星期日、紅日、休市日休息)
 
汐留
 
【13:00~14:00】浜離宮恩賜庭園
 
好啦我都知如果真係食左咁多野一定已經飽到訓低,所以為左消化下,我地黎到浜離宮恩賜庭園呢到散下步啦!佢係位於汐留嘅一堆高建築物之間嘅一個綠色庭園,所以遠睇有種好得意嘅對比。
 
裡面有個水池同一條連接住兩邊岸嘅「お伝い橋」,喺到抖下,同朋友傾下計散下步,又或者影下相,都幾寫意丫!食飽就係要做下呢D咁悠閒嘅活動嫁啦係咪?
 
名稱:浜離宮恩賜庭園
地址:東京都中央区浜離宮庭園1-1
前往方法:都営地下鉄大江戸線「築地市場」/「汐留駅」歩行7分鐘(大手門口)
營業時間:09:00~17:00
入場費:一般300円
 
【14:15~15:15】日テレタワー
 
日本電視台嘅本社「日テレタワー」喺汐留可以話係地標性嘅存在。佢嘅地下2層-2樓嘅指定部份係開放比人參觀嘅。外面有個日テレ巨型鐘,而佢係宮崎駿design嫁!高12米,闊18米,真係離遠都睇到佢!
 
唔知大家有無覺得呢個場景熟口熟面?佢就係人氣情報節目「PON!」做live嘅地方啦!話唔定可以撞到藝人喺到拍野嫁!
 
名稱:日テレタワー
地址:東京都港区東新橋1-6-1
前往方法:地下鉄都営大江戸線/ゆりかもめ「汐留駅」各地下歩道歩行1~2分直到(由浜離宮恩賜庭園行到大約10分鐘)
 
月島
 
【15:30~15:45】月島 久栄
 
行左一陣,又係時候回到美食嘅懷抱!我地買日本超出名嘅蜜瓜包啦!呢間係一間麵包鋪,必食嘅當然就係大大隻寫住嘅蜜瓜包啦!(如圖,170円)外皮脆卜卜,裡面軟乎乎,真係一流嘅口感配搭!
 
同埋唔洗驚眼大睇過龍搵唔到間野,因為佢喺營業時間係一定會播住歌,即使睇唔到都會聽到。識日文嘅朋友,可1以留意下佢首歌都係關於蜜瓜包,好盞鬼!
 
店名:月島 久栄
地址:東京都中央区月島1-21-3
前往方法:地下鉄月島駅7號出口歩行3分鐘
營業時間:10:30~22:00
 
【16:00~】月島もんじゃストリート
 
最後一站黎到「月島もんじゃストリート」(月島文字燒街)。呢到係一條約500米嘅通道,當中文字燒店竟然多達80間以上!所以叫做「月島文字燒街」。佢有一番街至四番街。
 
如果你怕去到唔識行唔緊要,因為喺入口位置就會有個案內所(如圖),裡面有地圖可以比你拎黎參考。
 
而且呢條街道有一種懷舊感覺,尤其係D小路,兜入去會有種番左十年前嘅日本咁嘅feel。
 
名稱:月島もんじゃストリート
地址:東京都中央区月島1~3
前往方法:地下鉄有楽町線「月島駅」7號出口歩行1分/地下鉄都営大江戸線「月島駅」10號出口歩行2分
 
{候選佳麗:路地裏もんじゃ もん吉}
 
呢間文字燒鋪頭位於月島文字燒街嘅小路入面,雖然唔顯眼,但店裡面貼滿左名人來店嘅相,所以來頭唔細嫁!佢仲曾經做過日版「花樣少年少女」嘅外景場地添!
 
呢到有過百種menu比大家揀,有選擇困難症嘅朋友就應該好慘啦!如果你第一次食文字燒,唔知食咩好嘅話,不如試下放心比鋪頭嘅人幫你啦!熱心嘅職員見你係外國人,應該會主動黎幫你,教你點樣食,所以唔洗太擔心呀!
 
店名:路地裏もんじゃ もん吉
地址:東京都中央区月島3-8-10
營業時間:11:00~22:00

回覆