【思人導遊】教你以「非動漫角度」遊走秋葉原!

我相信有唔少人都同我一樣,對動漫零認知、連海賊王都無睇過。而好多人都認為動漫天堂秋葉原就一定唔岩我地呢D人行,因為周圍剩係得動漫、女僕Cafe、Figure、Cosplay,老實講我睇完都唔知乜黎(動漫迷唔好打我)。所以好多同我一樣嘅人最多都係睇下電器就已經無乜野好行。(偷偷講你知,我之前去秋葉原只係出左閘影左張相,行左大概10分鍾就走左。)無錯,我原本都係呢種人,但從今日起我發現原來秋葉原係有唔少動漫以外嘅野嫁!睇黎下次去東京可以嘗試下用一日遊走秋葉原啦yeah!事不宜遲,即刻睇下一日可以點樣過啦!
 
【09:00~10:00】うず潮
黎到日本食早餐當然要一嘗日式早餐(味增湯、飯),個人認為呢間「うず潮」就一定要試試啦!原因係呢到有個非常特別嘅「回轉早餐」,所謂「回轉早餐」就即係自己喺回轉帶上揀配料呀!
 
個形式好簡單,就係先買呢個基本set(味增湯+飯+紫菜/310円),之後再好似平時食回轉壽司咁揀一碟就加一次錢。
 
配料分別有呢D(如生蛋、納豆、薯仔沙律等),價錢就分別54円/108円,好抵呀!
 
呢個形式食日式早餐最大嘅好處就係可以揀自己鍾意嘅食材,而且又平又新奇,絕對好過又係去Cafe食三文治丫!
 
■店名:うず潮 秋葉原店
■住所:東京都 千代田区 外神田 1-17-6 JR秋葉原駅 電気街口改札外 JR高架下
■前往方法:JR秋葉原駅 電気街口一出就到
■營業時間:(回転朝食)平日:7:00~10:00/六日紅日:8:00~10:00
■官網:http://www.jefb.co.jp/uzushio/
 
【10:30~12:30】アドアーズ秋葉原 (adores秋葉原)
要令個人醒一醒,玩遊戲就係好好嘅方法。食完早餐我地黎到「アドアーズ秋葉原」呢到玩盡佢!嗱你放心,如果你唔特別鍾意玩呢D街機唔緊要,因為我都好少玩,但佢唔止得街機,仲有好多扭蛋機,隔離(Karaoke adores秋葉原)仲有得唱K添!點都有樣岩你玩掛!
 
講番街機,當然有香港人好鍾意嘅太鼓の達人、Jubeat、頭文字D、TsumTsum呢D啦,仲有好多好多機比你玩!(我無打其他出黎係因為我唔知果D係乜黎哈哈)
 
而唱K方面都好特別,例如每月23號,職員都會cosplay住咁樣招呼你,好有秋葉原氣氛!另外,喺9樓仲有得免費借cosplay服比人影相,場景都好靚,即使唔鍾意動漫都可以破例試一次,著住cosplay衫影相留念自己嘅第1次呀!
 
■店名:アドアーズ秋葉原店
■住所:東京都 千代田区 外神田 1-31-1 Akihabara ex 1F,2F
■前往方法:JR秋葉原駅 電気街口出,就會見到呢幢紅噹噹嘅野啦!
■營業時間:10:00-24:00
■官網:http://www.adores.jp/tenpo/akihabara.html
 
【12:45~14:00】饗 くろ喜
Lunch time到~朝早食左飯,所以晏就我地一於食拉麵!呢間「饗 くろ喜」犀利咯,佢被推介嘅程度係5星星!
 
呢碗「鎮店之寶」-特製塩ラーメン/1100円(特製鹽拉麵),用左6種分別黎至海、山、湖嘅鹽,混合哂佢地嘅優點再由店家調味而製成。絕對係好野黎!
 
由於呢間野太出名,所以隨時都要排隊先食得,所以...預多少少時間喺到啦!
 
■店名:饗 くろ喜
■住所:東京都 千代田区 神田和泉町2-15 四連ビル3号館 1F
■前往方法:秋葉原駅1出口,歩行約8分鐘
■營業時間:11:30-15:00/18:00-21:00(星期三、日、紅日夜晚休息)
■注意:賣哂湯/麵就無,所以唔好太遲去
 
【14:15~16:00】2k540
2k540呢到可以話係有住滿滿嘅藝術氣色,因為呢到有好多工藝品嘅店鋪,亦都間中會有唔同workshop比人試整工藝品。唔好聽落以為好無聊呀,其實好得意嫁,好似整呢D玻璃印仔,整木製父親節禮物等等,如果對手工有興趣嘅真係可以參加嫁!(參加方法可入官網睇,有中文)
 
而鋪頭方面,有D都好得意,好似呢間好有特色嘅「日本百貨店」
 
眼鏡店
 
■店名:2k540
■住所:東京都台東区上野5-9 
■前往方法:JR秋葉原駅步行6分鐘
■營業時間:11:00-19:00(星期三休息)
 
【16:15~17:00】マーチエキュート 神田万世橋
「万世橋駅」位於中央線神田-御茶ノ水之間,佢係早喺1912年就已經建成嘅紅磚拱門万世橋車站,有歷史味道嘅同時其實佢係一個擁有個性商店/餐廳嘅商業設施黎。所以裡面有唔少野行,仲有位比你影下靚相,可以休閑咁逛下。
間唔中呢到會有D Event舉行,好似啤酒活動,胸針workshop等,詳情可以喺官網睇到。
 
■店名:マーチエキュート 神田万世橋
■住所:東京都千代田区神田須田町1-25-4
■前往方法:JR秋葉原駅電気街口步行4分鐘
■營業時間:11:00-21:00(一至六)/11:00-20:00(日、紅日)
 
【17:20~19:30】アトレ秋葉原1
對於非動漫迷黎講,相信呢到應該係秋葉原僅僅有野岩買嘅地方,因為終於唔係得figure賣啦!呢到有分兩幢,而如果for行街買野嘅話就係去1,食野嘅話就去2,不過放心兩幢都係痴住駅,絕對唔會盪失路!
 
有時裝~
 
有文具雜貨~
雖然佢唔係話十分多鋪頭,但係喺秋葉原黎講,已經算係好另類嫁啦!
 
■店名:アトレ秋葉原1
■住所:東京都千代田区外神田1-17-6
■前往方法:JR秋葉原駅電気街出口一出即到
■營業時間:AM10:00~PM9:00
 
【19:45~21:00】やきとん 元気
晚餐我地食串燒!今次呢間「やきとん 元気」喺日本食評網有頗高嘅評價。佢都幾有日本特色,有D座位喺出面,更加有風味。
 
邊食串燒邊飲啤酒,仲唔到你做一陣日本上班族?
 
串燒大致都係100円-200円,唔算太貴,人均消費大概2000円。肉類嘅質量都相當唔錯,燒得岩岩好,肉身夠軟。而且店員超有活力,好有朝氣勃勃咁招呼客人,令到氣氛十分唔錯!
 
■店名:やきとん 元気
■住所:東京都 千代田区 神田佐久間3-37-30 轟ビル1階
■前往方法:「秋葉原」駅昭和通り出口,步行4分鐘
■營業時間:一至五17:00~24:00(last order23:00) /六17:00-22:30(last order21:30)/星期日、紅日休息(記得睇準日子喇)
 
希望呢篇行程幫到你啦!即使你係鍾意動漫嘅其實都可以參考下,起碼餐廳可以去下嘛!