【思人導遊】搭山手線成日經過嘅高田馬場有乜玩?

我諗高田馬場對大家黎講既熟悉又陌生。點解咁講?因為高田馬場夾左喺JR山手線入面嘅新宿同池袋之間,所以係經常性都會聽到「Takadanobaba」呢個名。雖然成日經過,但又好少人會真係停低睇下高田馬場有咩玩有咩食(除左逗留東京好耐嘅人),所以就等我話比大家知呢到有咩值得去嘅景點,你地如果下次再去東京就不妨去一去啦!
 
高田馬場係個幾方便嘅地方,除左JR山手線之外,西武新宿線,東京Metro東西線都去到,視乎番你間酒店近咩站啦。
 
【10:00~11:00】しろくまカフェ
 
朝早點樣先會心情好?之唔係見到D得意野又食到D好味野囉!所以我地黎到呢間「POLAR BEAR'S CAFE」,歎早餐之餘影下相,同時滿足下視覺同味覺丫嘛。
 
咁佢主要都係西餐,好似意粉,咖喱飯,Pancake等等,大部份人包括小朋友都一定岩食嫁!
 
名稱:しろくまカフェ
地址:東京都新宿区高田馬場2-1-2 TOHMA高田馬場 1F
前往方法:從高田馬場駅歩行7~10分鐘(JR線的話在早稲田口出)
營業時間:10:00~22:00
 
【11:15~12:00】戸山公園
 
趁仲係早早地,我地去戶外散下步啦!反正日本嘅天空成日都咁藍,真係望到都覺得美好!戸山公園係高田馬場好珍貴嘅一個公園,因為佢擁有山手線內最高嘅山—「箱根山」。
 
而且如果到左櫻花季,呢到都會有成300幾棵櫻花樹開花,可以賞櫻,好鬼正嫁!
 
名稱:戸山公園
地址:新宿区戸山一・二・三丁目、新宿区大久保三丁目
前往方法:東京メトロ東西線「高田馬場」(T03)下車,歩行10分鐘
 
【12:15~13:30】成蔵
 
朝早食完洋食,Lunch梗係要食番D和食啦。今次食嘅呢間餐廳主要係食吉列豬扒嘅,佢其實唔只係高田馬場有D名氣,喺都內都算出名,唔惹小嫁!
 
呢到有唔同種類嘅豬扒,價錢有平有貴,最平嘅1000円就有(定食),貴嘅呢,好似霜降り高原豚/鹿児島産黒豚呢D就要2000-4000円,咁就睇你揀邊D啦!不過呢到可以免費添一碗白飯,所以唔洗擔心唔夠飽。
 
名稱:成蔵
地址:東京都新宿区高田馬場1-32-11 小澤ビル地下1F
前往方法:從高田馬場駅歩行1分鐘(JR線/西武新宿線在戶山口出)
營業時間:11:00~14:00, 17:30~21:00(星期四、日休息)
 
【13:45~17:15】BIGBOX 高田馬場
 
好啦咁食飽左就係時侯行街了,唔好以為高田馬場無野行,其實佢有個超大嘅商場,而且佢係好出名嘅「集合地」,都半稱得上係地標嫁啦。
 
BIGBOX呢個商場除左有得食有得買之外,仲有得運動!好似保齡、網球,甚至游水,所以真係好多野玩,如果真係去玩呢D運動嘅話,可以停留好耐嫁!
 
呢到1-2樓係Cafe+購物、3-5樓就係運動層、6-8樓就係娛樂設施、9樓就係美食層,好豐富呀!
 
名稱:BIGBOX 高田馬場
地址:東京都新宿区高田馬場1-35-3
前往方法:西武新宿線/JR山手線/東京メトロ東西線 高田馬場駅下車即到
營業時間:約10:00~24:00(不同設施會有些少分別)
 
【17:30~18:45】cat cafe にゃんこと
 
呢間貓貓café真係算抵去,1個鐘只係800円之外,飲品係免費提供嘅,又有WIFI同差電,可以慢慢喺到同貓咪玩呀!
 
呢到每隻貓貓都有自己嘅名,唔知嗌佢地會唔會識得應你呢?
 
名稱:cat cafe にゃんこと
地址:東京都新宿区高田馬場2−14−6スワンビル201
前往方法:山手線/西武新宿線 高田馬場駅早稲田口歩行2分鐘/東京メトロ東西線 高田馬場出口歩行1分鐘
營業時間:11:00~22:00
費用 : 時間制 (基本費用1小時800円/延長費用每15分鐘200円/3時間Package 2000円/餵猫零食100円)
 
【19:00~20:15】レッドロック
 
晚餐我地食烤牛肉飯!首先大家睇下呢間Red Rock門外,無錯係好食到要排哂隊嫁!到底D野食有幾吸引?睇相咪知囉,嗱3,2,1!
 
嘩嘩嘩真係要嘩幾聲,你睇下D牛肉多到(呢個係王牌烤牛肉丼大盛)!份量多之餘肉質柔軟,唔會咬唔開,而且個配埋汁仲好食,價錢都係千幾円,堅抵呀!
 
名稱:レッドロック
前往方法:山手線/西武新宿線 高田馬場駅早稲田口歩行4分鐘/東京メトロ東西線 高田馬場4號出口歩行3分鐘
營業時間:11:30~24:00/ 11:30~23:00(星期日)
 
【20:30~22:00】シーシャ屋ばんびえん
 
去旅行夜晚點可以咁早番酒店呢,梗係要搵D野做下啦!喺夜晚嘅高田馬場有咩做?一於去放縱一下,食水煙!水煙對身體無害,但又好有氣氛喎,無論你係一班朋友去定同男女朋友去,都可以去呢間專食水煙嘅CAFÉ玩下。
 
呢到除左有得食水煙,仲有好多漫晝睇,好多board game玩,咁就可以過一個開心嘅晚上嚕!
 
名稱:シーシャ屋ばんびえん
地址:東京都新宿区高田馬場4-18-9-203A
前往方法:山手線高田馬場駅早稲田口出,向左歩行6分鐘
營業時間:16:00〜24:00
費用:入場500円一人/水煙1000円一枝