【思人導遊】慢活「奥渋」!歎老店海鮮丼!

渋谷係年輕人同埋外國遊客必去嘅地區之一,因為果到充滿生氣,成街都係年輕人所以非常熱鬧。但渋谷除左我地最常去嘅景點,好似SHIBUYA109、PARCO、HIKARIE、渋谷Centre街呢D著名景點之外,仲有咩行呢?其實喺距離渋谷駅步行15分鐘左右,就會到左神山町呢個地方。即係由東急本店直到代々木八幡駅呢到就叫做「奥渋(okushibu)」。佢同平時我地去渋谷(駅附近)嘅感覺好唔同,唔係非常熱鬧,但就有一種安靜沈穩嘅氣氛。「此渋谷不同彼渋谷」,咁「奥渋」呢到有咩行有咩食呢?就等我介紹下啦!
 
首先,大家望望地圖,傳說中嘅「奥渋」就係地圖中紫色部份,距離我地成日去嘅紅色部份有一段距離。奥渋對比起渋谷其實更近代々木,所以想快嘅話都可以直接搭去代々木公園駅(東京メトロ千代田線)再行去以下地方。
 
奥渋最特別嘅地方,除左可以比你感受一下寧靜嘅渋谷之外,仲係一個老店同個性商店並存嘅地方。可以逛下雜貨店,坐下cafe,食下飯咁樣慢活渋谷一下。
 
10:00@CAMELBACK sandwich&espresso
無錯去旅行唔可以浪費時間,即使係慢活都要起身食早餐!所以我就會揀去呢間好食又好睇嘅三文治店飲啖咖啡歎個包。CAMELBACK有咩咁特別?就係果到嘅師博一個係專業咖啡專家,一個係前壽司職人,所以有款三文治係「玉子三文治」,就好似玉子壽司果隻玉子。而且有日本人形容佢地整出黎嘅三文治同咖啡係藝術作品添!
而店內係無咩坐位,通常客人都係買完拎出店外長椅食,其實咁樣坐喺出面影張相,咁有feel一定可以成功呃like!
 
名稱:CAMELBACK sandwich&espresso
地址:東京都渋谷区神山町42-2
前往方法:代々木公園駅(東京メトロ千代田線)步行約7分鐘(如圖)
營業時間:10:00~19:00(星期一休息)
預算:¥1,000~¥1,999
 
11:00@包むファクトリー(TSUTSUMU FACTORY)
食完野就要行下,第一間我地黎到呢間賣包裝用紙嘅專門店,裡面可以話係手作人嘅天堂!佢有大約400種紙,500種絲帶等等用黎包裝、裝飾嘅用品,超級豐富!唔同顏色、圖案、大細,多到眼花繚亂,真係都唔知點揀!
唔止有得買,如果你有想包嘅野,但自己又唔識包嘅話,就可以帶份野去比職員幫你手,費用係手工費500+材料費,如果係重要嘅禮物想送得好好睇睇,就可以試下呢個服務啦!
 
名稱:TSUTSUMU FACTORY
地址:東京都渋谷区宇田川町37-15包むビル1F
前往方法:由渋谷駅步行約11分鐘(如圖)
營業時間:10:00~19:00
 
12:00@SHIBUYA PUBLISHING BOOKSELLERS
第3站我地黎到呢間與眾不同嘅書店!我都知唔係個個識日文,但唔緊要,書店唔一定只有書,仲有其他雜貨賣嘅。佢最大嘅賣點係佢同時係書店加出版社,所以所有上架嘅書同雜貨都係經過出版社自己親身挑選嘅,個概念就係「這裡做,這裡賣」,嘩好型呀gosh!
 
可能呢間書店本身藝術感較強,所以一入門口就會見到左手邊嘅書架基本上都係同設計、時裝有關,如果對藝術有興趣嘅朋友就岩哂啦!咪話左唔止書嘅,其他雜貨竟然係香水、數碼相機、飾物都有,配搭都幾神奇!
 
名稱:SHIBUYA PUBLISHING BOOKSELLERS
地址:東京都渋谷区神山町17-3テラス神山1F
前往方法:代々木公園駅(東京メトロ千代田線)步行約9分鐘(如圖)
營業時間:12:00‐24:00 (星期日收22:00)
 
12:45@魚力
Lunch Time到!今次我地要食呢間由明治時期就創業嘅鮮魚店「魚力」直營嘅定食屋「魚力」。呢到嘅海鮮丼、帆立貝丼等等非常新鮮好食。佢最正嘅係,定食嘅飯同味噌湯任添唔嬲,不過為左防止有人浪費食物,如果食剩嘅話係要罰500円嫁!呢條規則set得好呀!
大家一齊睇下個Menu,流哂口水未?
魚力真係有D名氣嫁,因為佢曾經上過東京老鋪100呢本雜誌,證明唔係得個老字,品質都好有保證!
 
名稱:魚力
地址:東京都渋谷区神山町40-4(神山町十字路口旁)
前往方法:代々木公園駅(東京メトロ千代田線)步行約9分鐘(如圖)
營業時間:11:00‐14:00 /18:00 - 21:00 (星期日休息)
 
14:00@pivoine
食飽又係行街嘅時間。呢間pivoine係一間集雜貨屋、花店同Cafe三樣野於一身嘅鋪頭。岩岩食完飯就當然唔建議你再去食野,而係去睇下呢D日本先有嘅休閒風鋪頭。
入到鋪頭你會見到一堆花花草草之中又有D雑貨,店裡面就有衫賣,主要都係文青路線。即使無野岩買,我覺得行下呢D特色小店係慢活嘅其中一個重點,休閒地四圍逛嘅感覺好歎!
 
名稱:pivoine
地址:東京都渋谷区富ヶ谷1-19-3 山栄ビル 1F
前往方法:代々木公園駅(東京メトロ千代田線)步行約7分鐘(如圖)
營業時間:11:00〜19:00 (星期一休息)
 
14:30@代々木八幡宮
行左好幾間鋪頭,當然要去接觸下大自然透透氣。黎到呢個代々木八幡宮,雖然佢無話有咩超特別野睇,但有個特點就係,有個傳言話只要藝人住喺佢附近就會變得大紅大紫,所以真係唔少藝人都住喺代々木八幡宮周邊,而且佢距離新宿、渋谷、赤坂、六本木呢D中心地帶都好近,所以去嘅話係有機會會遇到明星嫁!
又或者,有機會遇到日本人喺到舉行結婚式,因為呢到都係一個幾出名搞傳統結婚式嘅地方。
如果乜都遇唔到,唔緊要,當佢係一個神社景點咁行下,慢慢散下步,影下相,其實都係相當relax嘅活動黎。
 
名稱:代々木八幡宮
地址:渋谷区代々木5-1-1
前往方法:代々木公園駅(東京メトロ千代田線)代々木上原寄り出口步行約5分鐘(如圖)
營業時間:09:00‐17:00 (星期日收22:00)
 
16:30@NATA de Cristiano's
行完大自然個lunch應該都已經落哂格,口痕搵咩咬下好呢?一於食呢個大人氣葡撻啦!其實唔止葡撻,佢仲有呢個半熟蛋糕,睇到張相都好想試啦!入面真係cream狀,係堅・半熟嫁!
 
名稱:NATA de Cristiano's
地址:東京都 渋谷区 富ヶ谷 1-14-16 スタンフォードコート 103
前往方法:代々木公園駅(東京メトロ千代田線)1號出口步行約3分鐘(如圖)
營業時間:10:00‐19:30 
 
17:15@Archivando(アルチヴァンド)
之後我地黎到呢間售賣高質生活用品嘅店鋪。當你一踏入呢間鋪頭,可能就會感受到一股神秘嘅感覺,因為裡面嘅生活用品全部都好似有生命力咁,都包含住設計師嘅靈魂。成件事就好似欣賞緊藝術品多過生活用品。
佢地全部都係由店主親自喺國內外嚴選出黎嘅貨品,而如果你有興趣嘅話,聽講店主仲會好詳細同你說明果樣商品嘅野,令你可以買得安心(前提係你識日文)。
 
名稱:Archivando(アルチヴァンド)
地址:東京都渋谷区神山町41-5
前往方法:代々木公園駅(東京メトロ千代田線)步行約7分鐘(如圖)
營業時間:13:00‐22:00(一~五)/ 12:00 - 21:00(六、日)(星期三休息)
 
18:00@ARMS
入夜就食晚餐了。唔好以為去到日本一定要食和食,其實洋食都好唔錯嫁!所以今次我就介紹呢間漢堡店,佢有超高評價,被譽為係東京NO.1嘅漢堡店,佢係喺你order完之後即整,新鮮滾熱辣!價錢大約係900~1550円,唔特別平但可接受。
因為佢嘅概念係美國郊外漢堡店,所以裝修都有種身處國外嘅感覺。
 
名稱:ARMS
地址:東京都渋谷区代々木5-64-7
前往方法:代々木公園駅(東京メトロ千代田線)步行約7分鐘(如圖)
營業時間:11:00‐22:30(星期一休息)
 
食完晚餐其實都基本上行哂呢個「奥渋」嫁啦,如果覺得早未想番酒店,我認為可以番番渋谷行街,反正渋谷同旺角一樣再夜都仲好精彩。但如果係「奥渋」的話,我相信半日其實都足夠,不過如果你追求慢活就當然可以好似我呢個行程咁花上一日時間啦,但如果你唔係去太多日,唔想用一日時間去行嘅話,咁你可以搵一日係行渋谷同奥渋,咁就可能會充實D啦!