【思人導遊】帶你遊走百貨公司以外的新宿~

香港人去日本一定要去新宿,就好似外國人一定會去尖沙咀一樣,即使唔知佢有咩特別都要去一下,因為係著名嘅旅遊區,本本旅遊書同網站都一定有佢嘅蹤影。老老實實,我只係去過新宿一次,仲要只係逗留左兩個鐘就走左。因為當我行黎行去都剩係見到一大堆百貨公司,仲要係貴價、國際品牌果隻,就已經知道唔岩行。就連最出名嘅歌舞伎町都無去,其實係有D後悔嘅。所以!為左唔好有人同我一樣咁傻豬豬,我就決心要整個「脫離百貨公司嘅新宿之旅」比大家,等你地都可以知道多D新宿其他嘅吸引力!
 
【10:15~11:15】カフェ アリヤ
 
今次會喺呢間CAFE到食早餐。呢到最出名嘅就係呢個french toast,睇日本網友嘅評語個個都話食過翻尋味嫁!聽講呢個多士軟綿綿,又有N種配搭,仲要價錢一啲都唔貴,唔怪得之咁受歡迎啦!
 
睇下有幾多選擇~
 
名稱:カフェ アリヤ(Cafe Aaliya)
地址:東京都新宿区新宿3-1-17 山本ビルB1F
前往方法:最近車站為東京Metro副都心/丸ノ内線,新宿三丁目駅歩行1分鐘(44米)/ JR埼京線,新宿駅歩行7分鐘
營業時間:10:00〜22:30
 
【11:30~13:00】ビックロ(bicqlo)
 
大家有無聽過「ビックロ」呢?無?但覺唔覺得個logo熟口熟面?無錯啦佢就係Big Camera x Uniqlo嘅crossover店鋪啦!即係電器x服裝呢個咁新穎嘅配搭!
 
咁話明係電器crossover,當然要有少少科技野啦!就好似呢部巨型電話咁,用黎做咩呢?原來係客人可以透過佢黎買野(即係好似網購咁)然後送到自己屋企!如果你想買果樣野咁岩無size/無果隻色就可以用佢,咁你就唔洗專程黎多次啦!(咁當然我地遊客未必岩用)
 
咁鋪頭內其實係點crossover法呢?有圖有真相~
 
名稱:ビックロ
地址:東京都新宿区新宿3-29-1
前往方法:新宿三丁目駅A5出口直到(地下鉄丸ノ内線・副都心線・都営新宿線)/新宿駅東口歩行5分鐘
營業時間:10:00~22:00
 
【13:15~14:45】隠れ房 新宿店
 
呢間叫做「隠れ房」嘅餐廳,睇個名都知係神神秘秘嘅隱世餐廳。佢位於7樓,某D座位可以望到景色,而且環境暗暗地,有種高級餐廳嘅feel。
 
似高級餐廳咁咪好貴?你岩一半,晚餐的確唔平,但Lunch就平到嘔啦!因為呢到有個好特別嘅Buffet,就係90分鐘和食放題(有drink bar)/1300円咋!你無睇錯係1300円!講真呢個價錢正常係食到一餐飯,但而家係和食放題啊omg!
 
咁我又唔會呃你,佢個和食buffet食物選擇唔算多,但勝左好味,同埋1300円可以食到唔同種類和食已經好抵啦!所以唔好有太高要求啊。
 
名稱:隠れ房
地址:東京都新宿区新宿3-15-11 アドホック新宿ビル7F
前往方法:新宿駅歩行3分
營業時間:11:30 ~ 15:00(lunch)
 
【15:00~16:00】新宿御苑
 
新宿御苑我諗大部份人無去過都聽過佢個大名,因為呢到係出名嘅賞櫻勝地。不過即使唔係櫻花季,其他日子都有佢自己嘅特色。好似下面呢幅圖咁,邊個季節都可以影到靚相,食完飯喺到同fd傾下計散下步,都幾舒服嫁!
 
其實新宿御苑好大嫁,一個鐘唔會行得哂,但因為呢個行程重點唔喺呢到,所以就預住一個鐘先,真係有興趣嘅朋友可以自己撥多D時間落去。(我地會喺新宿門入)
 
名稱:新宿御苑
地址:新宿区内藤町11
前往方法:(最近車站)東京メトロ丸の内線,新宿御苑前駅1號出口歩行5分鐘/JR・京王・小田急線,新宿駅南口歩行10分鐘
營業時間:09:00~16:30 (星期一休息)
費用:一般200円/中小學生0円/幼兒免費
 
【16:15~18:15】新宿アルタ(新宿ALTA)
 
無錯我話今次黎新宿唔會行百貨公司,原因係新宿嘅百貨公司普遍都比較貴,唔太適合我呢D買唔起嘅廢青行。但由於ping都係要shop嘅,所以我就揀左呢個新宿ALTA黎行!雖然佢都算係百貨公司,但價錢同商品方面就貼地好多。呢到係專門為年輕女士而設嘅商場,裡面唔少得嘅當然係服裝店,仲有雜貨店,cafe,便利店等等。
 
名稱:新宿アルタ
地址:東京都新宿区新宿3-24-3
前往方法:新宿駅東口歩行1分/東京Metro丸の内線新宿駅歩行0分
營業時間:11:00~20:30
 
【18:30~19:30】東京都庁展望室
 
入左夜又行完街,我地一於relax一下!黎到呢個東京都庁展望室睇夜景啦!你可以話睇夜景有好多地方都睇到,但呢到嘅特點係免費入場嫁!係咪即刻想去呢?要去展望台,就要去到「第一本庁舎」嘅一樓搭lift「展望室専用エレベータ」就去到。佢高202米,呢個高度望落去都睇到好靚嘅東京夜景。
 
展望室北面可以睇到Skytree,而南面就睇到東京鐵塔,邊面都有好浪漫嘅景色。但佢有分北展望室同南展望室,而南展望室只係開到17:30,所以今次就只可以去北展望室。
 
名稱:東京都庁展望室
地址:東京都新宿区西新宿二丁目8番1号
前往方法:(最近車站)都営地下鉄大江戸線「都庁前駅」下車直達/JR「新宿駅」南口下車歩行10分
營業時間:09:00~23:00(北展望室每月第2及第4個星期一休息;南展望室每月第1及第3個星期二休息)
費用:免費
 
【20:00~21:30】思い出横丁
 
思い出横丁係條沿住新宿西北方軌道的小巷。呢到超級有日本風,因為喺條狹窄嘅巷仔到兩排都係食市,有拉麵屋,蕎麥麵,壽司,串燒等等。而呢D餐廳仔全部都係好細間,細到可能得一個櫃檯同幾張椅子,所以喺到食野特別感受到日本風味。
 
今次我就唔特別推介邊間餐廳,因為呢到真係有太多選擇(如圖),好多間都係由極有經驗嘅師博負責煮料理,所以味道一定有保證。大家就根據下自己想食嘅料理,同埋睇下當時等位情況再決定食乜野啦。不過黎呢到食無錯嫁啦,我地去旅行都係去感受下當地風情啫,呢到咪有囉!
 
名稱:思い出横丁
地址:新宿区西新宿1丁目
前往方法:JR・地下鉄・小田急線・京王線「新宿」駅西口歩行即到
營業時間:通常17:00~24:00
 
【21:45~】歌舞伎町
 
夜媽媽最適合去邊好?喺旅行嘅時候當然係要去紅燈區啦!咁新宿邊到係紅燈區我諗唔洗我多講,真係老鼠都知係歌舞伎町!(安全起見唔建議一個人去,特別係女仔)呢到全部都係酒吧、Love Hotel、各式各樣嘅紅燈場所。街頭上無野多,係R你去「先生/小姐,要不要特別服務呀?」嘅人最多。
 
除左要留意人身安全,荷包安全都好重要,講緊唔係比人搶野,而係去bar/紅燈地方收取嘅入場費。佢地有機會見你係外國人唔識日文就靜雞雞將D費用左加右加,如果你唔想一晚無左幾日洗費,最好了解清楚先入去啦。
 
名稱:歌舞伎町
地址:東京都新宿区歌舞伎町
前往方法:JR線 新宿駅東口出,步行8分鐘