【思人導遊】帶你用盡一日狂食狂玩池袋!

渋谷、新宿、池袋係東京購物嘅中心地帶,好似sunshine city咁,次次去親池袋都要去行,行親都唔知點解買到一袋二袋。雖然我好鍾意買野,但有時又會覺得有D哂錢哂時間,好似拎黎食同玩會比較好,因為食同玩留低嘅回憶好似會深刻D!所以為左下次去池袋唔好再用哂D時間去shopping,我就搵左池袋好玩嘅地方同埋好食嘅餐廳,等自己享受下玩樂啦!事不宜遲,即刻睇下有咩好推介啦!
 
【10:45-12:00 @ 西武池袋本店 食と緑の空中庭園】
 
岩岩起身,最適合就係休閑咁食個早餐周圍行下,所以我地黎到呢個西武新開嘅「食と緑の空中庭園」,因為呢到係樓頂,所以抬頭就望到一大片天,好美好嘅早晨呀!呢到有個重點就係呢個「睡蓮」池,因應唔同季節會有唔同嘅花盛放,又有一種鬧市中嘅寧靜嘅感覺。
 
早餐嘅話,因為下一站就已經要去食好西,所以唔好食咁多,食少少野頂肚就好啦。喺呢個空中庭園有唔少餐廳比你選擇,好似呢間「まる清」壽司店咁,個三文魚加洲卷就600円;
呢間「讚岐かるかや」就專賣手打烏冬,價錢都係圍繞住400-650円。
 
名稱:西武池袋本店 食と緑の空中庭園
地址:東京都豊島区南池袋1-28-1 本館9階屋上
前往方法:(JR・東京メトロ・西武線)池袋駅直到(東口方面)
營業時間:10:00 ~ 22:00
 
【12:30-1:45 @ 牛かつ いろは】
午餐時間~今次就揀左呢間食牛肉飯嘅餐廳。呢到嘅牛肉上比你果陣會有少少生,因為之後就可以自己用眼前嘅鐵板燒一燒佢(如圖),根據自己喜好燒到覺得可以食就ok。
 
燒完之後落D鹽呀其他調味料咁會更加好食。肉身夠軟,有適量脂肪,外皮熱辣辣但肉身有少少涼涼地,聽落好怪但食落超正!而且可以揀肉嘅size,女仔唔洗擔心食唔哂,男仔又唔洗擔心唔夠食!
 
另一個重點係價錢相當親民!Lunch set (如圖中牛かつ麦めしセット)只係1200円,又湯又飯仲有成碟牛肉其實真係算幾抵食!
 
餐廳資料
名稱:牛かつ いろは
地址:東京都 豊島区 東池袋 1-9-7 友光ビル B1F
前往方法:(東京メトロ丸ノ内線)池袋駅29番出口步行1分鐘(如圖)
營業時間:11:00~23:00
 
【14:00-16:30 @ サンシャイン水族館】
 
食完野係時候去玩下,今次就黎到Sunshine水族館!嗱雖然黎到sunshine city,但忍住唔好行街丫!我地今次黎池袋嘅目的係食同玩!サンシャイン水族館被譽為係拍拖勝地王道之中嘅王道,如果情侶黎就岩哂啦,唔係情侶黎都唔緊要,一樣好玩嘅!
 
佢嘅concept係「天空中嘅綠洲」,不論大人小朋友都一定會愛上嫁!唔單止係睇下魚咁普通,呢到仲有唔少表演睇,絕對唔悶嫁!好似海獅表演、餵企鵝表演、潛水員同魚喺水中表演等等。而每日嘅表演時間表可以喺以下呢個網睇到。(http://www.sunshinecity.co.jp/aquarium/schedule.php
 
名稱:サンシャイン水族館
地址:東京都 豊島区 東池袋 1-9-7 友光ビル B1F
前往方法:池袋駅(JR/東京メトロ・西武線/東武線)東口35號出口歩行8分到sunshine city(如圖)。
之後於ワールドインポートマートビル1樓乘搭水族館專用lift到頂樓(如圖)。
營業時間:
基本)
■4月1日~10月31日 10:00~20:00

■11月1日~3月31日 10:00~18:00

暑期特殊安排)
■7月15日~8月10日 10:00~21:00
■8月11日~8月12日   9:00~21:00
■8月13日~8月16日 8:00~21:00
■8月17日~8月21日 9:00~21:00
■8月22日~8月31日 10:00~21:00
費用:大人2000円/中小學生1000円/幼兒(>4歲)700円/老人(>65歲)1700円
 
【16:45-18:00 @ ねこぶくろ】
 
鍾意貓咪嘅朋友有福啦!因為呢到有間貓咪館!注意佢唔係Cafe,而係剩係同貓咪玩嘅地方。呢到無時間限制,唔會比你未玩夠就催你走,所以可以慢慢喺到影下相,同貓咪玩下。
 
全館有大約40隻貓仔,但每日會喺客人面前出現嘅就有15-20隻,因為貓咪都要休息嫁嘛!(佢地心諗日日應酬你班人都好攰嫁)
 
係人都知貓咪成日都係高傲樣,唔多理你,所以為左比你地有得同貓仔有更多嘅接觸,每日都會有2次15分鐘嘅餵食時間嫁!而餵食時間係:平日-13:00,16:00/六日紅日-13:00,17:30 ,所以我覺得喺食晚飯前黎就幾好啦!因為同埋喺中午12點前/黃昏17:00後會比較少人,玩起上黎會鬆動D之餘,影相唔洗瘋狂「被攝鏡」嘛!
如果真係想去嘅話,可以去呢個網( http://www.p2-pet.com/nekobukuro/off.html )print張優惠券/手機掃個QR code到時去到用,咁就可以有100円off嘅優惠啦!(留意只係去到6月30號)
 
名稱:ねこぶくろ
地址:東京都豊島区東池袋1-28-10 東急ハンズ池袋店8F
前往方法:池袋駅(JR/東京メトロ・西武線/東武線)歩行8分(如圖)
營業時間:10:00~20:00
費用:大人700円・小學生500円・男女pair ticket1100円(只限中學生以上)・一日free pass1100円(可以任入場)
 
【18:30-19:45 @ 古城の国のアリス】
入夜我地黎到童話世界食晚餐!呢間以愛麗絲為主題嘅餐廳無論環境定食物都似足愛麗絲故事嘅風格,真係有種入左童話裡面嘅錯覺!
 
首先睇下個環境,嘩氣氛正到呢!如果一班女仔黎食,邊影相邊傾下心事相信會非常愉快;如果係情侶,女朋友鍾意嘅話男朋友就陪下佢黎啦!香港地無乜地方可以比女仔發下童話夢嫁啦!至於成班男人....就當無睇過呢個介紹啦!
 
再黎係食物,賣相非常靚,價錢正常,好似呢個2人set咁,有前菜、沙律、意粉、雞肉料理仲有甜品都係3500円,如果想要飲品放題就係5000円,睇下佢D飲品幾吸引~
 
餐廳資料
名稱:古城の国のアリス 池袋
地址:東京都豊島区南池袋2-16-8 藤久ビル東3号館B1
前往方法:JR池袋駅 西武口出, 歩行3分鐘(如圖)
營業時間:17:00~23:30(一至五)/16:00~23:30(六日紅日)
 
【20:15-23:00 @ ラウンドワン池袋店】
 
食完野之後繼續去玩!夜晚呢D情緒咁高漲嘅時候當然要keep住high啦,所以ラウンドワン就岩哂啦!呢到就好似一個娛樂中心咁,有保齡、卡拉OK、桌球、飛標、乒乓波同埋其他娛樂設施。男女都岩玩,但注意如果你未滿16歲,咁你就唔可以喺夜晚6點後入場;如果16-18歲,就唔可以喺22:00後入場。
 
而收費係分開收嘅,即係唔係話你比個入場費就玩哂所有野,而係玩邊樣比邊樣。
保齡(橙色=1game/桃紅=2game pack/紅色=放題)
卡拉OK(平日、六日紅日)
乒乓波
*其他收費可上官網參考
 
名稱:ラウンドワン池袋店
地址:東京都豊島区東池袋一丁目14番1号 池袋スクエア
前往方法:JR、東京メトロ丸ノ内線・有楽町線・副都心線「池袋」駅東口歩行4分鐘(如圖)
營業時間:24小時

回覆