【思人導遊】帶你全天候食玩買IN難波!

難波(NANBA)位於大阪市中央區,係包括左大阪兩大繁華街之一嘅地方。如果有去過大阪嘅朋友應該都對佢唔陌生,事關佢都係一個四通八達嘅旅遊區。JR(JR西日本関西本線—大和路線)、地下鐵(大阪市營地下鐵御堂筋線、四つ橋線、千日前線)等常用交通都有難波站,最出名嘅固力果先生都係位於呢到,所以絕對唔係咩新鮮野。所以今次我就同大家分享下難波嘅綜合好去處!包括購物、美食、玩樂嘅荀地方啦!
 
食:
 
早餐—BROTHERS Cafe (なんば店)
早餐我都係習慣左食西式多過日式,所以即使去到日本都甚少食飯團飲味增湯做早餐。今次我地黎到呢間BROTHERS Cafe,主打係Pancake同多士,呢到嘅Pancake全部sell鬆軟,加埋水果、紅豆呢啲配搭,真係流唒口水呀!
 
呢個多水果多到滿瀉出黎嘅Pancake,係難波店限定添!
 
名稱: BROTHERS Cafe
地址: 大阪府大阪市浪速区難波中 1-17-13
前往方法:「南海」難波站步行3分鐘
營業時間:09:00-20:00
 
午餐—かに道楽
雖然而家興窮遊,但我認為一個旅程入面豪番一次半次係可以接受嘅,所以我會揀喺人人都識嘅「名店」蟹道樂食午餐。
 
蟹道樂唔洗講都知係食超豐富嘅蟹,佢有好多唔同套餐選擇,好似下列嘅Menu咁,真係見到相都想食!(圖中套餐價錢約2600-3600円)
 
除左堂食,仲有呢啲「手信」賣。如果你食過番尋味,晏就食完夜晚仲想食嘅話,就可以買呢啲蟹壽司、蟹飯團番酒店做宵夜啦!
 
名稱: かに道楽
地址: 大阪府大阪市中央区道頓堀1-6-18
前往方法:地下鐵各線、JR、近鐵難波站歩行5分鐘
營業時間:10:00-19:00(午餐時段至16:00)
 
晚餐—名物咖哩「自由軒」
 
「自由軒」係大阪第一間洋食店,佢嘅咖哩飯比普通日本咖哩辣(睇張相其實都feel到),上面會有一隻生蛋黃。
 
上面個獨家咖哩飯唔同一般嘅咖哩飯,因為佢係本身啲咖哩已經撈哂落啲飯到,入哂味,唔係平時見到嘅咖哩汁同飯分開。聽講食落真係有老鋪嘅味道,唔係周圍食到,而且價錢只係680YEN(普通size),相當之抵試呀!
 
名稱: 自由軒
地址: 大阪市中央区難波3-1-34
前往方法:近鐵難波站/地下鐵各線難波站 11號出口歩行2分鐘
營業時間:11:30-21:00
 
 
玩:
ラウンドワンスタジアム 千日前店
如果有睇過我之前思人導遊系列嘅話,我諗都對ラウンドワンスタジアム(Round1 Stadium)有啲印象啦,因為佢係一間連鎖嘅娛樂設施,東京大阪都有分店。
 
呢間分店24小時營業,簡單黎講如果你半夜瞓唔著想搵地方去,呢到就岩哂啦!佢都係有齊保齡、卡拉OK等等唔同娛樂設施,一班朋友又岩玩,有小朋友都岩玩,情侶都可以去夾公仔,又係人人都適合嘅好地方!
 
名稱: ラウンドワンスタジアム 千日前店
地址: 大阪府大阪市中央区難波1丁目3番1号
前往方法:地下鐵御堂筋線/千日前線「難波駅」15號出口向東歩行約3分鐘
營業時間:24小時
 
湯源郷 太平のゆ なんば店
有無諗過浸下風呂其實都係唔錯嘅行程選擇呢?呢間風呂店喺難波以南,由大国町站一出就到會見到佢喺木津市場入面,唔難搵。
 
呢間風呂店嘅特色,就係佢有非常多唔同種類嘅浸浴提供,就好似有高濃度炭酸泉、絲綢風呂、冷水風呂等。
 
唔單止,仲有埋幾款美肌嘅岩盤浴,岩哂各位貪靚嘅女士。浸岩盤浴嘅話仲有免費漫畫睇,真係好鬼歎呀!(不過都提番句,呢間一樣係禁止有紋身人士進入嘅)
 
名稱: 湯源郷 太平のゆ なんば店
地址: 大阪市浪速区敷津東2丁目2-8(木津市場敷地内)
前往方法:地下鐵大国町1號出口向東(日本橋方向)歩行約2分鐘
營業時間:08:00-01:00
 
買:
地下街—なんばウォーク(難波walk)
「なんばウォーク」係大阪最著名嘅地下街,呢條街大到橫跨左東邊嘅地下鐵堺筋線日本橋站到西邊嘅四つ橋筋線難波站,裡面大約有240間餐廳同店鋪,就算係落雨天都唔怕無地方行街啦!況且呢到行到腳軟都未行完呀!
 
雜貨、衫褲鞋襪當然有齊!
 
名稱: なんばウォーク
地址: 大阪府大阪市中央区千日前2丁目1−15 
前往方法:大阪市營地下鐵御堂筋線難波駅16、17、22、23號出口直到
營業時間:店舖10:00-21:00/餐廳10:00-22:00
 
商店街—大阪ミナミの戎橋筋商店街
 
「大阪ミナミの戎橋筋商店街」係大家最熟悉嘅地方,因為佢係由北面嘅固力果先生同埋蟹道樂開始,一直到南面嘅高島屋・大阪店先完(全長約370米),所以基本上只要你有影過固力果先生,即係你就已經去過啦!
 
呢到之所以咁受歡迎,除左因為有固力果先生同蟹道樂呢兩大打卡位之外,商鋪當然都係好重要嘅因素。呢到由元祿時代嘅名物老舗,到最潮、企喺潮流尖端嘅商店都有,呢種男女老幼都岩行嘅特質相信就係佢嘅吸引之處!
 
名稱: 大阪ミナミの戎橋筋商店街
地址: 大阪市中央区難波
前往方法:地下鉄御堂筋線/四ツ橋線/千日前線「難波駅」北出口,12、13號出口行上地面,東面就係戎橋筋商店街