【思人導遊】坐下在目黑區深宵那個摩斯漢堡店~

「坐下在目黑區深宵那個摩斯漢堡店~」大家聽到目黒呢兩個字,我相信個個都會諗起周國賢首歌「目黒」而唔係日本嘅地方。既然咁熟悉目黒,不如索性熟悉埋真正嘅目黒啦!話唔定當你睇完我今次嘅介紹之後,再聽番目黒呢首歌會有另一番感覺呢!
 
目黒可以話交通非常之方便,因為佢無論係JR(山手線),東京METRO(南北線)定係東急電鐵(東急目黒線)都有佢嘅站,真係四通八達㗎!
 
【10:00~11:00】果実園 リーベル
 
食早餐對我嚟講係一日裡面相當重要嘅環節,因為佢足以影響到當日全日嘅心情!所以揀早餐一定唔可以馬虎,起碼色香味其中一樣要吸引先!今次揀嘅呢個就符合哂色香味標準啦,佢就係食水果Pancake㗎啦!
 
嘩你睇下幾吸引!水果健康得嚟又好食,加埋Pancake更加增添食慾!
 
唔止Pancake,仲有呢D水果三文治咁,全部都好睇又好食啊!價錢都係圍繞1000-1999円,唔算好貴呀!
 
名稱: 果実園 リーベル
地址: 東京都目黒区目黒1-13-16 ブレジデド目黒ハイツ2F
前往方法:由JR山手線「目黒駅」歩行4分鐘
營業時間:07:30~23:00
 
【11:15~12:15】大鳥神社
 
大鳥神社係一個歷史十分悠久嘅神社,雖然我對神社無乜研究,但係據說呢個係目黒最古老嘅神社,所以點都建議大家去兜個圈,感受下古舊日本嘅氣息。
 
而每年嘅11月(年年日子唔同),呢到都會有一個叫做「酉の市」嘅儀式,到時會有好多唔同攤檔,好熱鬧㗎!
 
名稱: 大鳥神社
地址: 目黒区下目黒3-1-2
前往方法:JR山手線目黒駅西口下車歩行7分
 
【12:30~13:45】こんぴら茶屋
 
Lunch time我地食番啲日本嘢啦,佢就係日本周街都係嘅咖喱!但其實呢間餐廳嘅賣點係手打烏冬,所以呢到嘅名物就係「牛肉咖喱手打烏冬啦」!
 
除左手打烏冬吸引,仲有好多唔同配料畀你加,好似生蛋、芝士之類,聽到都覺得吸引呀!
 
名稱: こんぴら茶屋
地址: 東京都品川区上大崎3-3-1 坂上ビル1F
前往方法: JR山手線目黒駅東口步行2分鐘
營業時間: 平日11:00~01:00/[六、日、紅日] 11:00~23:30
 
【14:00~16:00】目黒インテリアストリート
 
雖然大家未必會喺日本買傢俬,但係我都極力推薦大家唔買都要行下呢條傢俬街(目黒通)呀!呢到有成50幾間鋪頭,全部都係賣唔同種類唔同風格嘅傢俬。當然唔止傢俬,仲有啲係室內用品,細細件果啲大家就可以買番屋企做紀念啦!
 
好似有賣60-70年代美國Vintage風格嘅鋪頭~
 
可愛嘅廚房用品~
 
名稱: 目黒インテリアストリート
地址: 東京都目黒区下目黒通り
前往方法:JR山手線目黒駅步行10分鐘
 
【16:15~17:00】日本民藝館
 
呢個日本民藝館係由一位美術研究家創建嘅一個日本傳統藝能博物館。好似繪晝、染物呢D傳統藝術,非常受外國人歡迎㗎!
 
另外呢到嘅建築物都好值得我哋留意,因為佢用咗和風意匠做建造嘅根基,但又加左西洋建築模式落去,混合左西洋同和風,好有建築美!
 
名稱: 日本民藝館
地址: 東京都目黒区駒場4-3-33
前往方法:京王井の頭線「駒場東大前駅」西口歩行7分
營業時間:10:00~17:00(星期一休息)
費用:大人1,100円/高中生600円/中小學生200円
 
【17:15~17:30】雅庵
 
而家就要去買D小食,講到目黒嘅小食,呢間雅庵係三甲㗎!佢係賣啲非常日式嘅和菓子,畀人地邊賞花邊食嘅。
 
好似係わらび餅、桜餅等等,黎到日本唔係唔試下話?
 
名稱: 雅庵
地址: 東京都目黒区東山1-13-4
前往方法:目黒駅步行10分鐘
營業時間:10:00~18:00(星期日休息)
 
【17:45~18:45】目黒川
 
好啦講左咁耐都好似無同大家講,來到目黒一定要去嘅地方係邊到呀可?無錯就係呢個「目黒川」啦!唔好睇少佢呀,呢到如果係櫻花季,靚到你唔信㗎!你自己睇下啦!
 
OMG係咪好想親身睇下呢個櫻花景呢?我明。我真係明。不過即使撞唔正開花都唔緊要,因為冬天果時會有燈飾睇,好鬼浪漫呀!
 
名稱: 目黒川
地址: 東京都目黒区
前往方法:目黒駅步行5分鐘
 
【19:00~20:00】とんかつとんき
 
晚餐我地食豬扒飯!我一向都唔覺得一間餐廳貴先代表好食,所以我最鍾意揀D價錢夠平民嘅餐廳,即使係去到日本。喂大佬呀你估個個有錢食得起高級日本料理咩,咪玩啦!
 
呢到除左豬扒好食,最有趣嘅係你可以見到現場會有好多個師傅同時喺到做緊唔同野,個畫面好搞笑呀!
 
名稱: とんかつとんき
地址: 東京都目黒区下目黒 1-1-2
前往方法:JR山手線/東京METRO南北線/東急目黒線目黒駅西口下車歩行3分
營業時間:16:00~22:45