【思人導遊】圍繞著浪漫的東京鐵塔遊一天!

東京鐵塔,應該係唔少人心裡面東京嘅象徵。唔知點解就咁聽個名都覺得有啲浪漫。雖然Skytree比鐵塔更高更新,而且仲多啲嘢行,但Skytree喺我心目中都係代替唔到東京鐵塔嘅地位!唔知有冇人同我諗嘅一樣呢?由於我太鍾意啦,所以我要介紹下如果以去東京鐵塔為主,佢嘅附近仲有邊到好去,有邊到好食,等大家可以用一日時間遊下東京鐵塔週邊,感受下果種浪漫嘅感覺。
 
首先,最近東京鐵塔嘅大江戶線嘅赤羽橋站(赤羽橋出口),只需要行5分鐘左右就會到,其次就係日比谷線嘅神谷町站(2號出口),行7分鐘左右。雖然搭JR喺浜松町駅(北口出)都去到,但我建議大家都係乖乖轉車搭地下鐵去會方便D,因為由浜松町駅行去要15分鐘,我之前就係蠢左行左15分鐘,其實都幾遠㗎真係!
 
【10:00-11:00】ル・パン・コティディアン 芝公園店
 
呢間係一間比利時嘅麵包餐廳,店內長期都飄逸住麵包出爐嘅香味,而且大部份都係木造嘅裝修令人一種同大自然親近嘅感覺,客人可以喺到過一個舒服寧靜嘅早上。
 
呢到嘅麵包都係用天然酵母製作,因為佢地主張有機,所以食材對身體係有益無害㗎!
 
名稱:ル・パン・コティディアン 芝公園店
地址:東京都港区芝公園3-3-1
前往方法:都営浅草線/大江戸線大門(浜松町)駅歩行6分
營業時間:07:30~22:00
 
【11:15-12:45】增上寺
 
增上寺位於東京鐵塔隔離,係好多訪客都會去參觀嘅寺院黎。佢嘅歷史悠久到有成600年以上,所以無論你迷唔迷信祈唔祈福都好,呢到都值得一去㗎!
 
呢到有三個看點,第一個係「與東京鐵塔的重疊」,即係增上寺同東京鐵塔會同時好清楚咁出現喺你眼前。呢個畫面如果配合埋晴天嘅話,影起相上黎真係好靚!
 
第二係「千躰子育地蔵尊」。呢個其實即係地上嘅呢啲石公仔,佢地喺1975年已經開始安置喺到,目的係用黎幫小朋友祈福,希望佢地健康成長。
 
第三個看點就係「三解脱門」,呢個門係以前東京大空襲等等戰火時期用黎比人逃走嘅門。到咗而家,就傳話只要敲下呢度門,你嘅三個煩惱就會消失,所以叫做「三解脱門」。
 
名稱:增上寺
地址:東京都港区芝公園4-7-35
前往方法:(最近)都営地下鉄三田線御成門駅歩行3分/芝公園駅歩行3分
 
【13:00-14:00】蘭麻 麻布店
 
呢間係一間唔平嘅鐵板燒餐廳,但係Lunch時段就好抵食啦!夜晚嘅人均價錢接近10000円起,但Lunch就只係1000-2000円咋!而呢到最出名嘅係佢地嘅黑毛和牛啦!Lunch menu入面嘅黑毛和牛漢堡扒定食只係1400円,唔怪得知係數量限定啦!
 
另外仲有黑毛和牛牛扒定食,1600円到2800円都有。
 
名稱:蘭麻 麻布店
地址:東京都港区東麻布1-18-5
前往方法:都営大江戸線赤羽橋駅歩行3分鐘 
營業時間:11:30-14:00(Lunch)
 
【14:15-15:15】芝公園
 
芝公園係日本最古老嘅公園之一,佢喺1873年己經開左㗎啦!芝公園其實好大,佢分兩Part,分別係包圍住增上寺嘅都立芝公園,同埋喺芝東照宮同増上寺之間嘅港區立芝公園。
 
呢到環境好舒服,好適合散步,如果撞啱花期嘅話仲可以邊行邊賞花,好正!
 
名稱:芝公園
地址:港区芝公園一・二・三・四丁目
前往方法:都営三田線芝公園駅/御成門駅歩行2分鐘
推介花期:春(櫻花)、秋(紅葉)
 
【15:30-19:00】東京タワー
 
終於嚟到戲肉啦!之所以咁晏先去東京鐵塔,係因為我想順便睇到埋入夜嘅景色哈哈!唔好咁心急想上展望台住,因為除咗展望台之外其實仲有好多野玩嘅。就好似1樓嘅水族館咁,喺825平方米大嘅館內有個500平方米嘅水槽,裡面養左900種觀賞魚共50,000條,呢個規模真係世界級!
 
另外仲有個「One Piece Tower」,啱晒鍾意One Piece嘅朋友啦!
 
到上展望台,東京鐵塔共有兩個展望台,一個係大展望台(150M),一個係特別展望台(250M)。而大展望台有一樓同二樓,一樓就有個CAFÉ等人可以邊歎飲品邊欣賞景色,而二樓就有個「Tokyo Tower Love Power Spot」,即係圖中嘅粉紅水晶鐵塔模型,就好似佢個名咁,係個充滿愛嘅地方。
 
而特別展望台就營造一個未來、宇宙呢種感覺,喺玻璃底下會有LED燈同埋音響效果,令人更加投入。
 
名稱:東京タワー
地址:東京都港区芝公園4-2-8
前往方法:大江戶線赤羽橋站(赤羽橋出口)步行5分鐘
營業時間:09:00~23:00(展望台)
費用(展望台) : 大展望台+特別展望台/1600円
 
【19:15-20:15】東京らあめんタワー 芝大門本店
 
夜晚我地一於食拉麵啦!呢間拉麵店同東京鐵塔好近,濃味嘅湯底係呢到嘅客人最愛。
 
而且佢非常平,唔洗1000円就已經可以食到,啱晒我呢D窮人呀!
 
名稱:東京らあめんタワー 芝大門本店
地址: 東京都港区浜松町1-27-4
前往方法: 都営浅草線/都営大江戸線大門駅歩行約3分
營業時間:17:00~22:00(星期六沒有晚市,星期日及紅日休息)

回覆

Laichung的圖片

超級順路,啱晒我,多謝晒 :D