【思人導遊】原宿一日遊!

我諗去過東京嘅朋友都一定去過原宿嫁啦,因為果到嘅野出名平,潮同埋又平又潮!最出名當然係竹下通り,只要你去過原宿基本上就一定行過呢條街,因為實在好多野睇同買!但除左竹下通り,可能有D朋友會唔知原宿仲有咩行,同埋好似除左可麗餅之外就無咩好食,咁到底係咪咁嫁呢?錯哂呀!因為其實如果你唔係好趕行程,要一日去幾個地方嘅話,原宿其實可以玩一日嫁!一日有咩做?跟住我啦!Follow me baby!
 
首先,點樣去原宿呢?好簡單,只要你搭到山手線就去到嫁啦。而你好大機會會不斷搭呢條線,因為東京主要嘅旅遊區都係山手線可以去到。假設你住新宿,你只需要搭JR山手線,向渋谷品川方向幾分鐘就會到。
 
*我建議喺平日去原宿,因為去過嘅朋友都知,原宿(特別係竹下通り)可以迫到你暈低!所以盡量都係平日去會比較好。
 
9:30~10:30 カフェ・カイラ(Cafe Kaila)
咁首先,一日嘅開始就當然就係食早餐啦!食早餐嘅話,我會揀呢間カフェ・カイラ(Cafe Kaila)。Cafe Kaila係一間夏威夷餐廳,喺2012年開到黎日本。而我揀佢嘅原因係因為佢已經連續2年獲得「ハレアイナアワードベスト朝食賞」(夏威夷最佳早餐獎)啦!
 
當中最出名嘅早餐就係呢個一日限定60份嘅special eggs benedict(2150円),佢被譽為係全店最好食嘅。就連夏威夷嘅本店都會賣哂,你就知佢笨唔係浪得虛名嫁!而因為得60份所以要食嘅話就唔可以太晏去。
 
如果你麻麻eggs benedict,你可以試下佢最出名嘅Pancake-Kaila Original Pancake (Hawaiian Size)(2300円),有3塊Pancake再配埋滿滿嘅士多啤梨、香蕉、蘋果等等水果,係呢到嘅招牌菜黎嫁!一起身放入口嘅就係超豐富嘅Pancake真係好幸福!(因為算係甜品所以我諗呢個女仔會岩,但男仔就未必有興趣啦)佢仲有好多其他野揀,沙律、美式早餐、三文治....任君選擇!
 
餐廳資料
名稱:カフェ・カイラ
地址:東京都渋谷区神宮前5-10-1 GYRE(ジャイル)B1階(表参道ヒルズ斜前面)
前往方法:原宿駅表参道口出,歩行5分鐘(距離明治神宮前 310 米)
營業時間:【平日】9:00~20:00/【六、日、紅日】8:00~20:00
 
11:00~12:00 明治神宮
食完早餐,由於時間尚早所以大部份鋪頭都未開門,所以我會去明治神宮行下,參觀嘅同時當散下步幫助消化。明治神宮大家應該都唔陌生,因為佢只係喺原宿駅隔離,無去過都一定曾經經過。
 
喺血拼之前,去明治神宮感受下鬧市中嘅寧靜係一件幾舒服嘅事。裡面四圍都係綠色植物,邊行邊吸下新鮮空氣,可以話係幫身體差定電!而且香港好難搵到D地方係鬧市同大自然並存嘅,所以黎到日本就一定要感受下!
 
明治神宮嘅呢個木造大鳥居據聞係日本第一大嘅鳥居黎嫁,我諗即使你打算去到只係行下,都可以去影張相留念,咁起碼有D「證據」自己真係到此一遊過丫嘛!大鳥居好易搵,入左入口之後留意住右手邊一直直行就會見到。(如圖)
 
咁當然如果你鍾意大自然,或者對日本神社好有興趣,你可以花多D時間喺明治神宮行,去許願都可以,但比我去到原宿就會選擇行街啦!所以比我就行到中午時段就會去下一個地方。
 
地址:東京都渋谷区代々木神園町1-1
前往方法:原宿口<南口>出。(JR山手線「原宿」駅/東京メトロ千代田線・ 副都心線「明治神宮前<原宿>」駅)
開關時間:6月/5:00-18:30。7月/5:00-18:20。8月/5:00-18:00(每月時間不同,詳情可參考官網)
 
12:30~13:00  6%DOKIDOKI
行左一陣大自然,就到黎原宿最主要嘅目的-行街啦!所以第3站我就會去一間きゃりーぱみゅぱみゅ都愛嘅「終極原宿風」鋪頭!佢叫做「6%DOKIDOKI」,賣點就係全店嘅商品都十分Colourful,一睇就知係原宿風果種!雖然唔係好多人接受到原宿風,但我覺得一場黎到就一定要親身去睇下咩係正宗原宿stlye,因為我覺得呢到即使你唔買野,剩係睇已經夠哂大開眼界!
 
名稱:6%DOKIDOKI
地址:東京都 渋谷区神宮前4-28-16 TX101ビル2F
前往方法:JR 原宿駅歩行7分(表参道口出閘,過眼前嘅馬路,一直直行右手邊的表参道,去到明治通り同表参道嘅交界過馬路,喺「西武信用金庫」轉左,之後喺第一個十字路口嘅右邊果幢樓2樓就係啦!粉紅色好易認)/東京メトロ明治神宮前(原宿)駅歩行3分(千代田線5號出口/副都心線旁嘅電梯口出,喺「西武信用金庫」轉左,之後嘅第一個十字路口右邊果幢樓2樓就係啦!)
營業時間:12:00 ~ 20:00
 
13:30~14:30 AFURI 原宿
話咁快就到Lunch time!「但係仲未開始shopping,唔敢食太貴喎,想留番D錢買野」如果你係咁諗,恭喜你因為同我一樣(拍手拍手拍手)!所以,搵食就梗係搵D又平又好食嘅鋪頭啦係咪?呢間拉麵店就一定無錯啦!
AFURI 原宿係原宿最出名嘅拉麵店,有時候甚至要排隊添嫁。佢嘅招牌拉麵就係呢個「柚子醬油拉麵」,喺濃湯中加上柚子嘅香味,感覺清新!如果你都偏好濃味嘅食物,就一定要試試呢個招牌菜啦!個重點係,大部份拉麵都係1000円以下就食到!真係平靚正!
 
「柚子醬油拉麵」980円
 
名稱:AFURI 原宿
地址:〒151-0051  東京都渋谷区千駄ヶ谷3-63-1 グランデフォレスタ1F
前往方法:JR原宿駅竹下口歩行3分(如圖)
營業時間:10:30~凌晨3:00
 
15:00~18:00 Laforet原宿
食完野大概2點幾,係時候shopping啦!我地黎到原宿嘅地標-Laforet原宿!呢到係一幢時裝大樓,總共13層,裡面有好多年輕時裝設計師嘅鋪頭,完全係時尚嘅基地!本地品牌又有外來品牌都有,而且價錢都可接受,鍾意買野嘅你一定岩哂呀!聽講有遊客入左去之後5個鐘都出唔番黎....咁你自己幻想下Laforet原宿到底有幾吸引啦!
 
香港都有嘅Heather
 
Boy London
 
雜貨店BADEFEE Concept Shop
 
如果你咁岩帶唔夠錢買野點算?唔洗驚,因為喺1樓與2樓之間嘅SEVEN銀行ATM,可以用以下國外金融機構發行嘅信用卡或者金融卡提取現金,(可使用的金融/信用卡類型:VISA、VISA Electron、PLUS、American Express、Diners Club、DISCOVER, JCB、中國銀聯)所以即使唔夠錢喺身都唔洗擔心呀!
 
行到咁上下如果口痕想食野嘅話,即管食原宿最多嘅可麗餅啦!喺Laforet嘅1樓,有cafecrepe呢間可麗餅嘅老店!超級多選擇!行到攰就可以去cafecrepe買個可麗餅咬下,順便當係一個小小嘅下午茶。
 
名稱:Laforet原宿
地址:〒150-0001 東京都渋谷区神宮前1-11-6
前往方法:JR山手線原宿車站表參道口步行5分鐘/東京地鐵千代田線、副都心線明治神宮前〈原宿〉站5號出口步行1分鐘
營業時間:9:00~22:00(2016年8月23日,24日休館)
 
19:00~19:30 Awesome Store
行完Laforet原宿應該都己經黃昏(甚至更夜),咁之後去邊好?無錯繼續行!日本有好多唔同雜貨店,而且好多都唔貴,又多野睇,所以我去親日本都好鍾意行雜貨店。咁今次要去嘅呢,就係呢間「Awesome Store」啦!佢最低嘅價格係40円起!!!普遍價格就係由200円-400円,裡面有裝飾用家品,女士美容用品,日常用品等等都有,而且風格casual得黎又型格,買番D番屋企都正呀!
 
名稱:Awesome Store
地址:東京都渋谷区神宮前5-8-7 IIDAビル1F/B1F
前往方法:JR原宿駅歩行10分(如圖)
營業時間:11:00〜20:00
 
19:45~  SEIKO-EN 清江苑
黎到尾聲,當然係要以晚餐黎做總結啦!晚餐係要豐富D,所以一於食燒肉!呢間燒肉店叫做「焼肉清江苑」,佢有好多食法比你揀,包括你可以食放題,有成70種以上嘅食物比你揀;你都可以揀set,當中有個最貴嘅set(6500円)更加有得歎佐賀縣產黑毛和牛「伊万里牛」添呀!其實價錢都算係咁,因為佢平均嘅消費係3000円,而且佢又近駅,位置唔難搵唔會哂時間,所以應該係一個唔錯嘅選擇!
 
名稱:SEIKO-EN 清江苑 HARAJUKU 原宿店
地址:東京都渋谷区神宮前6-4-1 原宿八角館ビル5F
前往方法:原宿駅表参道口出,歩行約5分(如圖)
營業時間:11:30~24:00