【必敗神級手信!】老舖超好味明太子即食產品

去日本買嚟買去都係買和菓子同零食做手信,真係收嗰個唔悶買嗰個買都買到厭。下次不如搞搞新意思,試吓日賣3千幾個嘅明太子吞拿魚罐頭同埋配咩都好食嘅唧唧裝明太子即食醬?又唔貴又好味,最啱買多兩支放埋喺公司,lunch可以隨時加料!
 
  
 
呢兩件產品估都估唔到竟然係出自已經有近70年歷史嘅老舖「FUKUYA」之手,包裝可愛討好不特止,連使用方法都非常新潮,可以即開即食,完全跟得上時代嘅步伐!
 
 
明太子吞拿魚罐頭開賣到而家只有短短年半,但就已經賣出咗超過2百萬罐,即係平均一個月賣到3千3百幾罐,好多人都話食一次就會上癮,唔怪得銷量咁好啦!好癲啊!
 
明太子吞拿魚風味(¥900)
 
 
辛口明太子吞拿魚風味(¥900)
 
 
升級版明太子吞拿魚風味(¥1,200)
 
 
呢種罐頭總共有明太子吞拿魚風味、比較辣嘅辛口明太子吞拿魚風味、同埋落重咗明太子嘅升級版明太子吞拿魚風味,簡簡單單將佢倒喺熱辣辣嘅白飯上面已經好好食!
 
 
提一提大家明太子吞拿魚風味同辛口明太子吞拿魚風味都只係明太子風味產品,即係話唔好期待一開罐會見到好多明太子,不過明太子嘅味道就好香濃,幫啲吞拿魚加哂分啊!
 
 
最簡單方便嘅就係撈飯食,個罐頭本身都有啲明太子汁,整體唔會太乾,不過如果想再好味啲可以加少少蛋黃醬撈一撈,成個味道超夾!
 
 
另一個網民都力推嘅超懶鬼食法係成罐倒落啲米度一齊煲成飯,煲起之後撈混佢就會變咗睇見都流口水嘅明太子有味飯,每粒米都吸盡明太子同吞拿魚嘅精華,真係好味到震!
 
 
除咗個吞拿魚罐頭,呢隻總共有10隻味道嘅明太子唧唧醬都係FUKUYA旗下非常好賣嘅產品,目前總銷售量已經超過咗60萬支啦!下面呢幾隻係評價幾高嘅味道,大家不妨參考吓睇吓買邊支做手信~
 
明太子+和風高湯 ¥540
呢隻明太子醬加入咗用鰹魚同昆布熬製而成嘅高湯,成功地提昇咗明太子嘅鮮味。
 
Spicy Black Pepper味 ¥864
怕明太子腥味可以揀呢個,入面加咗黑胡椒粉同黑胡椒粒,多咗一重胡椒香味,減輕咗名太子嗰種腥味。
 
明太子+Butter ¥540
唔知係咪牛油嘅關係,呢隻嘅明太子香味都幾濃。
 
Regular ¥864
要試原味一定係呢個,少少辣,係明太子料理嘅經典味道。
 
明太子+國產山芋 ¥540
呢一種加咗日本國產山芋,配飯食真係一絕!
 
除咗就咁唧落個飯度食,加個牛油果一齊食仲更加好味,製作方法仲好簡單添!
 
 
牛油果一半用嚟切粒或切片,一半壓成蓉。唧啲明太子醬入牛油果蓉攪混佢,再加埋牛油果粒輕輕手咁撈混再舖喺飯面就完成啦!
 
 
食嘅時候可以加啲壽司豉油,個口惑同味道都激似食緊明太子三文魚腩飯,勁香!
 
其實唔單止加落飯度,呢隻明太子醬最神奇嘅地方係好似同好多食物都好夾,例如杯麵、公仔麵、麵包、意粉、餅乾等等,所以買定幾支自用旁身或送畀人都實冇死!
 
邊度買?
 
東京羽田店
地址:東京都大田区羽田空港3-3-2
電話:03-5756-0298
營業時間:9:00~20:00
 
東京浜松町店
地址:東京都港区浜松町2-4-12
電話:03-3432-2986
營業時間:9:00~19:00