得罪講句,淨係噏得出「響」,唔好話自己識飲威士忌

一分鐘搞清日本威士忌究竟點分
不用分得那麼大家都是日本威?
攝於大阪一間超級市場,有朋友可能會問,佢地D名其實有咩分別?
近年日本威士忌熱潮直捲全球,緊貼潮流而且經常去日本旅行嘅香港人當然唔會錯過,去到日本梗係會買返支試下佢嘅魅力啦!但係我問過同聽過好多朋友講,講起日本威士忌,或者推薦朋友買邊支嘅時候,佢地都係講一個字:「響」,但當我問佢「響」究竟係咩黎既時候,佢會答:「咪威士忌囉」!相信呢個情況好有啲朋友都會聽過。
 
當人人都講緊「響」個朵究竟有幾「響」嘅時候,睇完呢個Post之後你可以了解多幾款唔同嘅威士忌,仲可以介紹其他款同埋解釋比人聽「響」究竟係咩黎!
 
現時日本主要威士忌蒸餾所共有8-9間,當中以三得利集團Suntory同朝日集團Asahi旗下日果Nikka規模最大,佢地嘅產品如「響」,「山崎」,「白州」,「竹鶴」,「余市」,「宮城峡」等等可能大家都聽過,但係其實佢地係點分類就可能大家都唔係咁清楚。
 
為左令大家以後可以輕鬆了解各種日本威士忌嘅背後嘅分別,今次會以三得利(Suntory)旗下品牌作為例子,簡單分為3個大種類,令大家了解多D,下次可以以唔同角度,試多D唔同嘅酒。
 
1.「響」系列調和型威士忌Blended Whisky (ブレンデッド)
 
圖1:「響」樽上Label有列明原材料為麥芽(Maltモルト)及穀物(Grainグレイン)
大家耳熟能詳嘅「響」系列係屬於調和型威士忌簡單解釋,一支「響」入面:
  1. 集合左兩間或以上蒸餾所出產嘅酒
  2. 當中包括用麥芽(Maltモルト)和其他穀物(Grainグレイン) 蒸餾嘅酒
再由調配師(Master blender)比對同調配出屬於「響」嘅味道出黎。一般黎講調和型威士忌相對較易入口,味道豐富口感順滑,而「響」係Suntory同類型產品入面屬最高級,加上個樽又型棍,所以咁受歡迎都唔係無原因架!
 
而其他同類產品仲有「角瓶」、「Torys」、「Suntory Old」等等,相信唔少朋友去到日本食飯會不時都會見到有「角ハイボール」飲(Highball, 即威士忌加蘇打水),其實係由「角瓶」調製出黎,而且呢幾款威士忌相對「響」價錢較平,大家不妨都可以試下。
角ハイボール CM: 
 
2.「山崎」「白州系列:  單一麥芽威士忌Single Malt Whisky(シングルモルト
而「山崎」/「白州」系列分別都係單一麥芽威士忌,簡單黎講,一支「山崎」或「白州」入面:
攝於京都山崎蒸餾所
  1. 只有一間蒸餾所出產嘅酒(山崎就只有來自京都山崎蒸餾所出產嘅酒,白州就只有山梨白州蒸餾所出產嘅酒)
  2. 當中只使用麥芽(Maltモルト)作為原料,沒有其他穀物(Grainグレイン)成份
單一麥芽威士忌因只用同一間廠嘅酒,風味會比較特出有個性,所以較受威士忌愛好者追捧。而且單一麥芽威士忌生產成本較高,所以價值會比較貴。而大家飲嘅「響」當中特出嘅水果香氣都係黎自「山崎」/「白州」呢兩間蒸餾所嘅原酒,所以如果你喜歡「響」係因為佢個種香氣的話,咁「山崎」/「白州」絕對唔會令你失望!
 
         
圖2: 我個人最愛嘅山崎18已經被炒到三千幾港幣。連日本都有店鋪賣緊炒價,灰到核爆。(原定價為25000日圓)
圖3:「山崎18」樽上Label列明原材料只有麥芽(Maltモルト)
 
3.「知多」系列:  單一穀物威士忌Single Grain Whisky(シングルグレイン)
仲有一款係名為「知多」嘅單一穀物威士忌,與單一麥芽威士忌唔同嘅地方:
  1. 只有一間蒸餾所出產嘅酒(「知多」只有由知多蒸餾所出產嘅威士忌)
  2. 加入其他穀物 (Grainグレイン) 作為原料蒸餾
而「知多」呢款單一穀物威士忌口感香氣比較清爽,帶有檸檬等清新香氣,最適合用黎調製一杯冰涼清爽嘅Highball。
官網有制作方法介紹:  https://goo.gl/4wRRa3
 
基本上其他品牌嘅威士忌都係以呢個重點分類,所以下次同朋友講起日本威士忌嘅時候,可以解釋埋比佢地聽究竟「響」係咩黎,同埋去開日本的話都可以買返支除左響以外嘅日本威士忌黎試下啦(而且所有入門酒款價錢都唔貴)。下次再為大家介紹其他品牌如「余市」「竹鶴」等等同埋其他關於日威嘅資訊啦! Cheers!
部分截圖source from Suntory Official Website: http://www.suntory.co.jp/whisky/