【廣島】日本三景之一-宮島(下)

上篇blog分享咗係宮島發生嘅小趣事,今次就正正經經同大家講吓宮島嘅主要景點、名勝、鹿仔、交通攻略喇!
 
嚴島鄰近廣島市,俗稱宮島,被列為日本三景之一,稱為安藝之宮島,島上最主要嘅景點係位於海上、以海上鳥居聞名的嚴島神社,同後方嘅彌山原始林區,1996年被列入世界遺產。由於宮島被視為女神所居住嘅島嶼,嚴島自古以來都係禁止砍伐樹木,所以島上仍然維持完整嘅森林環境,景色更會隨著季節嘅變換而轉變。(下面幾張係官方照片)
 
春天-櫻花
宮島
 
夏天-水中花火大會
宮島
 
秋天-紅葉
宮島
 
冬天-雪景
宮島
 
遊客可以坐纜車上彌山山頂,聽講秋天望落仲去可以望到一大片紅葉添㗎!
宮島
 
交通攻略:
 
方法一:搭廣島電鐵(車費¥260、船費¥180)
 
                   電車60分鐘              步行1分鐘              渡輪10分鐘
「廣電廣島駅」⇒「廣電宮島駅」⇒「宮島口棧橋」⇒「宮島港」
 
方法二:搭JR(車費¥410、船費¥180)
 
                   JR 25分鐘              步行5分鐘              渡輪10分鐘
「JR廣島駅」⇒「JR宮島口駅」⇒「宮島口棧橋」⇒「宮島港」
 
方法三:搭船「世界遺產航路」(¥2000)(平均一小時1-2班)
 
                           船45分鐘
「平和記念公園」⇒「宮島港」
 
*「宮島口棧橋」有兩家公司營運渡輪服務,分別係“宮島松大汽船” 同 “JR西日本宮島フェリ-”。兩間船公司最大分別就係松大汽船會以直接駛向宮島,船程約10分鐘;而JR宮島船會駛近大鳥居俾乘客近距離觀看,船程會長少少約12分鐘。
 
DAY PASS:
 
選擇一:宮島Free Pass(周遊票)(¥2000)
包含廣電電車全線、來往宮島與宮島口嘅松大汽船、宮島空中纜車,於廣島電鐵觀光諮詢服務處購買。
建議:如果你打算坐纜車,就記住買呢個Pass,因為坐纜車要¥1800,呢個Pass絕對值回票價,相反如果冇打算坐纜車,可以唔洗買。
 
選擇二:一日乘車乘船券(廣電+松大汽船)(成人 ¥840、小童¥420)
包含廣電全線 + 宮島松大汽船
 
好喇,睇完上面一大堆交通攻略,係咪有少少頭都大埋呢?到底應該搭邊條路線?買唔買Pass好?香港人最緊要咩都要快!仲有平!首先你要問自己兩個個問題:
 
1. 你會唔會搭纜車?如果答案係會,咁就買宮島Free Pass(周遊票)(¥2000)!
 
2. 你對於世界遺產航路呢條路線沿途嘅風光有冇興趣?如果有就搭喇,不過留意返要成¥2000一程㗎!
 
如果你嘅答案係唔會搭纜車,又冇興趣俾¥2000搭世界遺產航路呢條路線,咁你就去搭JR喇!貴好少少但慳返好多時間㗎!而我亦都係選擇咗搭JR!
 
係「JR廣島駅」搭25分鐘嚟到「JR宮島口駅」
宮島
 
跟住指示牌行去「宮島口棧橋」搭渡輪
宮島
 
行5分鐘就到,左手邊係「松大汽船」、右手邊係「JR宮島船」,我揀咗搭「JR宮島船」希望可以影下大鳥居
宮島
 
我係「JR廣島駅」買車飛時直接揀「宮島」,所以車、船飛一張過!(¥410+¥180=¥590)
宮島
 
搭渡輪,好穩定唔會暈船浪
宮島
 
宮島
 
JR嘅渡輪會專登駛近大鳥居,遊客可以另一個角度欣賞大鳥居
宮島
 
好多人會專程去奈良睇鹿,其實宮島一樣有野生鹿仔(估計島上大約有600隻鹿),而島上嘅鹿仔更被認為係神之使者添!
宮島
 
嚴島神社係日本國內最重要嘅觀光景點之一!神社以海中為用地嘅獨特建築,漲潮與退潮時嘅氣氛同感覺好唔一樣,難怪1996年被列入為世界遺產。場內須保持肅靜,唔可以喧嘩,最重要一樣嘢,影相嘅時候係唔可以影到神職人員嘅正面同樣貌。出外旅遊,我哋就係代表全香港人,千祈唔好失禮啊!
 
入場費:¥300
嚴島神社
 
一對日本情侶係入面祈福(記住只能影背面啊)
嚴島神社
 
自助式求籤
嚴島神社
 
海上鳥居(退潮,可以行近去影相
海上鳥居
 
海上鳥居
 
周圍都有鹿仔蹤影,心心PatPat(多謝網友提供照片)
神之使者
 
宮島
 
紅葉谷公園有條小路行上去,有間小茶寮,鹿仔見到有嘢食,即刻跟住我
宮島
 
寒風中可以飲碗熱嘅抹茶+紅葉饅頭,真係好溫暖(¥650)
紅葉饅頭
 
呢度係島上唯一一個地方有鹿糧賣(¥200),但要靜靜雞唔好俾人知.....因為島上規定唔可以餵鹿,原因係希望佢哋可以重返森林自己搵嘢食,但事實上森林入面食物唔多,而呢班鹿仔多年來俾人餵慣,唔係幾識搵嘢食,所以你會發現佢哋真係好瘦同好餓!見到佢哋咁餓個樣真係好心痛!
鹿糧
 
唔洗一分鐘就分哂啲鹿糧lu.....去宮島之前好多人都係網上面話宮島嘅鹿比較溫馴,點知我一拎包嘢食出嚟,佢哋就跑過嚟追住我!仲伸個頭入我個衫袋摷嘢食!真係好傻!笑死我!
神之使者
 
神之使者
 
神之使者
 
嚴島神社表參道商店街
宮島
 
呢間牡蠣屋特別多人排隊,感覺較高級,坐得較舒服,食物睇落都唔錯!
宮島飲食
 
宮島飲食
 
而我就揀咗呢間路邊小店,燒蠔(¥500/3隻)
宮島飲食
 
左邊呢間係水煮蠔(¥350/3隻)我兩款都有食....不過...我唔小心Delete左張相啊對唔住啊!我覺得兩款都好好食!但個人嚟講覺得水煮蠔好食啲啲,冇咁乾身!
宮島飲食
 
紅葉堂,去到宮島一定要試紅葉炸饅頭!
紅葉堂
 
可以入去坐低慢慢食,仲有暖爐爐住添!
紅葉堂
 
炸咗嘅饅頭熱辣辣好香!
炸紅葉饅頭
 
宮島飲食
 
宮島飲食
 
 
宮島飲食
 
紫菜米餅係我大愛之一!好想食啊!
宮島飲食
 
宮島好出名嘅蒸饅頭
宮島飲食
 
Hello Kitty老是常出現
宮島飲食
 
Hello Kitty紅葉饅頭,原本想買嚟做手信,但發現賞味期限只有幾日
宮島飲食
 
所以轉買百力滋喇
宮島飲食
 
如果係街拎住食物,就會出現俾鹿圍呢個情景
宮島
 
飯勺御守
宮島民間傳說指,用御山嘅神木做成嘅飯勺盛飯,會帶來好運,唔怪之得宮島周圍都有飯勺賣喇!
宮島
 
商店街有間小店可以即場影相,或者自己俾張相俾老闆,然後將你個靚樣印落飯勺到,仲可以key個海上鳥居做背景添!
宮島
 
有唔少日本旅行團會專程去宮島觀光,話哂都係日本三景之一,真係人生必去啊!大鳥居出面有即影即有拍攝服務,一家人或者一班朋友影就最啱喇!
宮島
 
鹿仔好乖!哈哈...其實係有嘢食咋!1、2、3,笑!
宮島
 
宮島
 
五重塔
宮島
 
黃昏時候開始潮漲,我又參觀多次嚴島神社
宮島
 
潮漲時嘅海上鳥居更覺壯觀!
宮島
 
宮島
 
我認為如果純觀光嘅話,宮島玩一日就夠哂!但假若你鍾意小動物,又鍾意行下山、睇吓自然景觀,可以揀係宮島住一晚,悠悠閒閒咁玩兩日一夜,夠哂寫意!其實宮島定期會舉行各類活動同節慶,島上又有水族館,如果你哋有興趣可以上官網睇睇㗎!