平民價豪食早餐!「日本最好食早餐」酒店Top 5!

住酒店除左房間環境之外,酒店裡面嘅早餐如果好食都絕對可以增加你對旅程嘅留戀度!但邊D酒店嘅早餐先好食呢就係一個問題,唔識搵唔緊要,而家我就介紹5間,被世界最大嘅旅遊網站Tripadvisor選出嘅「2016擁有最美味早餐酒店排」排行啦!到底係邊幾間呢?好緊張呀!去啦!
 
第5位:ホテル京阪 札幌 
 
呢間係位於北海道札幌市嘅「ホテル京阪 札幌」。呢間酒店嘅早餐早喺兩年前已經入左呢個「早餐排行榜」頭5位嫁啦,呢到用左好多北海道嘅食材,唔單止有濃郁嘅北日本風味,為左迎合唔同客人,佢地嘅關西風味料理都獲得好評!仲有好多深受女性歡迎嘅不同種類蛋糕,布朗尼, 水果等等。
特別嘅係,佢用嘅米係有高評價嘅北海道產「特A」品種米,被譽為係專業廚師御用米,到時晨早可以歎一碗真正嘅日本飯,真係好正呀!當然唔少得北海道牛乳啦!
價錢方面,唔洗擔心,絕對平民呀!每人1400円,小孩900円,只限入住嘅客人。
 
第4位:函館国際ホテル
 
第4位係「函館国際酒店」。舊年獲得第5位嘅佢,今年上升左1位!講起北海道,最正嘅就係食物由日式嘅新鮮海鮮餐到西餐都有,選擇夠多。而呢間酒店嘅早餐種類非常多,由函館嘅鄉土和式料理到中華料理再到西洋料理都有。
當中最受歡迎嘅就係「熱辣辣牛扒丼」同「軟綿綿蛋包飯」,因為呢兩樣都係喺客人面前即叫即整嫁!仲有而家大熱嘅芝士熱潮,果到有得用北海道芝士配麵包咁食,聽到都流口水呀!
價錢同樣親民,2000円一個人,都係百幾蚊港紙,完全唔過份呀!
 
第3位:ホテル ロコア ナハ
 
呢間位於沖縄嘅酒店,上年都只係第8位,今年大躍進去到三甲!呢到除左有好豐富嘅沖縄料理之外,仲出名於有100分服務嘅侍應,聽講佢地會檢查得好頻密,以免出現食物被拿完然後有空盤嘅情況,對於客人黎講係好貼心嘅服務。
而且,好似話喺呢到基本上都試得哂沖縄有代表性嘅料理,滿足度非常高嫁!種類有成50種以上,每樣試D都飽到你暈呀!日式,西式定沖縄料理,要乜有乜呀!
價錢稅入之後都係2052円,平民價黎咋!
 
第2位:ラビスタ函館ベイ
 
呢間酒店已經係早餐排行榜嘅常客黎啦!有好多人甚至係為左食佢嘅早餐而喺到過夜,你諗下幾威!函館咁多豐富嘅海鮮,所以呢到嘅招牌就係自己砌海鮮丼啦!食材用上北海道產同埋函館近郊嘅食材,絕對值得期待嫁!
如圖啦,佢係呢個早餐排行榜嘅常客,仲係2011同2012年運續2年嘅冠軍添呀!咁你就知佢個早餐到底有幾吸引啦!
價錢對唔住大家我搵唔到,如果真係有興趣可以上官網詳細睇下。
 
第1位:ホテルピエナ神戸
 
終於到第1位啦!第1位嘅「ホテルピエナ神戸」竟然勁到係早餐排行榜連續4年嘅冠軍!!!由2013年到今年都係屬於佢嫁!所以有唔少過夜旅客為左食呢個日本第一嘅早餐,都專程由全國各地走過黎。
無論係和食定洋食,味道都會令你想食完又食。另外佢嘅手作甜品被評為「超級爆好食」!一聽到呢句即係想飛去試下呀!仲有另一個重點,就係蔬菜係用左兵庫縣生産嘅新鮮蔬菜,好食又健康呀!
價錢:一個人未包稅2200円,以日本第一黎講真係抵到喊啦!