【帶你食好野!】渋谷後巷中的海鮮店

呢間位於渋谷嘅「和田丸」真係超唔容易搵,千辛萬苦搵到個招牌又唔知個入口喺邊,原來個門口同個招牌有少少距離,要上幾級樓梯先會見到度門,真係唔話佢係隱世小店都唔得。咁難搵都推介畀大家,入面當然係有好野食啦!
 
要去呢間小店食野真係要落足眼力,招牌係唔起眼到你行過咗龍行返轉頭搵都未必搵到!
 
既然話得係小店,入面嘅座位緊係唔多。附近嘅上班族好似都知道呢度有好野食咁,一到lunch hour呢度一定會坐滿哂附近返工嘅人,所以如果唔想等位,又唔想嚟到先發現呢樣又冇嗰樣又賣哂嘅話,大家最好早啲嚟等開門就入去食。
 
唔知係咪日日都會換menu,因為menu上面寫住咗當日嘅日期。
 
店入面大部份海鮮飯都獲得高度嘅評價,好似呢個辛辣海鮮丼「ピリ辛海鮮丼」,入面有紅魽魚、吞拿魚蓉、墨魚同一隻半熟嘅溫泉蛋,加埋店家秘製嘅辣汁,呢個海鮮飯係唔使再加醬油同wasabi都已經好好味!
 
唔食魚生又想知呢間野到底有幾好食,可以點呢個魩仔魚溫泉蛋丼「しらす丼」,即使你平時冇話特別鍾意食魩仔魚,食完呢個丼飯都一定會回味無窮!
 
仲有呢個海鮮鹽他他丼「海鮮塩ユッケ丼」!真係一放落枱口水就開始流出嚟!呢個同辛辣海鮮丼唔同之處係除咗係鹽味之外,仲有面頭嗰啲自家製醬汁,真係好味到無野講。不過呢個丼比辛辣海鮮丼味道淡少少,食慣重口味嘅話可能食食吓要加醬油。
 
「ネバネバ丼」可以話係店方嘅招牌菜,最大嘅特色就係黏稠嘅狀態,因為入面有納豆、吞拿魚魚蓉同溫泉蛋等材料,所以食起上嚟口感同一般嘅魚生飯都幾唔一樣。將所有材料撈一撈,納豆、溫泉蛋同魚生嘅味道意外地夾,不過納豆始終有股獨特嘅味道,討厭納豆的話就唔好揀呢個啦~
 
一間餐廳又點會淨係得丼飯食,呢度嘅定食都唔錯,好似呢個照燒油甘魚定食,一入口油甘魚嘅油香就湧哂出嚟,勁香!個定食仲有幾塊刺身,同一個餐可以同時食到刺身同熟食,真係正到呢~
 
之前講過晏奏lunch hour唔早啲嚟基本上一定冇位,夜晚就更加誇張,唔訂位完全唔使奢望walk-in會有位坐,所以如果想嚟大家都係揀晏奏過嚟啦~
 
 
遊魚 和田丸
地址:東京都渋谷区円山町22-18 桃山コーポ1 2F
電話:03-3496-3435
營業時間:星期一至五 11:30~13:00、17:00~24:00;星期六 17:30~22:30
休息日:星期日及公眾假期