【岡山縣】挑戰日本驚險遊樂園 鷲羽山遊樂園

 
 
今次我地黎到岡山縣嘅鷲羽山遊樂園,聽講佢有個好恐怖嘅
高空踩單車,設施都係好舊生晒銹咁,我地就想睇下究竟呢個樂園
係點,所以決定黎試玩下!其實呢度有好多遊樂設施㗎!
好可惜,我地今次去到因為太大風所以過山車停咗,有d失望。
但,唔緊要!我地都試玩咗Roller、空中韆鞦、旋轉陀螺、
傳說中好嚇人嘅空中踩單車,同埋!跳樓機!
 
園區相當大㗎,無論大朋友、小朋友黎都可以盡情咁玩!
 
【跳樓機】
呢個跳樓機特別在佢喺山頂上面,所以雖然佢唔算好高,
但上到上面,係俯瞰晒成個岡山嘅景,都咪話唔恐怖!
仲有就係,佢嘅安全扣真係好舊,見到都已經好驚⋯
 
 
一開始真係勁驚(一定要睇片,好似心臟病發咁⋯),
但倒數完就釋放咗自己心情,好正啊!
 
 
【高空單車】
勁恐怖嘅環節!高空踩單車!
一去到係一個人都冇,我地見到d單車排晒係度,好似好容易咁?你錯啦。
佢係全自動式遊戲,坐上去之後,要二人合力踩去郁動佢,
最驚嘅係安全措施只有一條好幼嘅安全帶。
 
 
恐怖嘅係當你畏高,已經驚到腳痺,你真係會停咗係度,
郁又郁唔到,勁驚⋯⋯
想睇我地點克服(定克服唔到)呢個單車,就要睇片啦!
 
 
▼第二次習慣咗就冇咁驚啦,仲有時間細心欣賞風景!
 
【踩Roller】
相信唔少朋友都有玩過踩Roller啦!黎到呢度,一樣有得玩!
仲要係同日本學生一齊玩,即刻覺得自己年輕咗!
話說果日好多學生喺遊樂園入面,佢地應該係學校活動咁過黎玩,
所以現場氣氛都變得好好!
 
 
踩Roller借呢對鞋係 500円,其實過程冇乜特別,不過好攪笑嘅係,
d日本學生係咁跌黎跌去,但佢地一d都冇話要放棄,
反而係即刻起身再試過。(想睇我有冇跌,快睇片啦)
 
 
【空中韆鞦】
呢個樂園,最靚仔嘅算係呢個空中韆鞦啦!起碼冇生銹,同埋都算色彩繽紛!
坐上去玩過後,覺得同香港海洋公園果個分別唔大。
 
 
【旋轉陀螺】
呢個旋轉陀螺真係估佢唔到,一開始以為係好簡單咁順時針轉啦,
點知佢係會搖黎搖去左飛右飛,幾好玩喎又!
 
 
▼另一樣真係估佢唔到嘅,係呢個遊樂園係沒有電梯的⋯⋯
由於佢d設施係喺山上面,所以我地真係行咗好多級樓梯⋯⋯
 
▼呢度仲有個笨豬跳,不過有體重限制(可能因為果日大風),
要70kg先可以加1500円玩。
 
▼嘩,真係經歷風霜嘅設施,呢個展望台,同樣地都係冇開。
做個調查:有冇人想試下玩?
 
▼不過,山上望嘅風景真係幾靚!
 
▼摩天輪~
 
▼場內有一隊舞者表演,再加埋成班學生(除咗學生真係冇乜人),氣氛真係幾好㗎!
 
【迷你動物園】
呢個動物園有迷你豬仔,羊咩咩,兔仔等。
個員工見我地拎住相機,就將兔仔搬咗過黎叫我地試下抱啦。
一開始真係唔識抱,最後成功咗!佢地真係好得意!(快睇片)
 
其實個人黎講,我覺得呢個樂園幾好玩!
雖然佢冇電梯,設施好舊,但咁又有另一份味道,又夠刺激喎!
希望有機會再黎係可以玩埋過山車啦!
 
如果你都鍾意呢篇blog, 希望你幫我share出去啦!See You!
==================
交通方法:
若由廣島駅出發,搭乘新幹線到岡山駅,轉乘JR至兒島駅下車,
再轉乘公車(下津井循環線-とこはい号)到樂園。(全程約90分鐘)
 
下津井循環線時刻表:
 
===================
鷲羽山遊樂園(鷲羽山ハイランド)
地址: 岡山縣倉敷市下津井吹上303-1
 
票價
成人(中學生以上)2,800日元
兒童(小學生)2,200日元
幼兒(3歲以上)1,700日元
中老年(50歲以上)1,700日元
60歲以上的老年人,如持有桃太郎卡免費

回覆

Faipc18的圖片

桃太郎卡係乜野?
有乜用 ?

Stella Yeung的圖片
桃太郎卡係for 60歲以上嘅人申請
申請費500yen, 有呢張卡可以免費入場
Mei Kuen Tse的圖片

請問如果想從東京去這個樂園可以點搭JR?點轉車?需時大概多久?