少女們尖叫吧!睇肉選舉!十大最想見到嘅光脫脫男星!

呢排電視劇《城寨風雲》大熱,除咗劇中打鬥場面之外,一眾男主角嘅好身材亦成為大眾焦點,同時亦證明「睇肉」並非男士嘅專利。
 
日本有網站就搞咗一個「最想見佢光脫脫男明星」選舉,搵嚟一班輕熟女進行投票,到底有邊位男星可以成功上榜呢?
 
 
第10位  玉木宏
 
千秋王子「玉木宏」一直以來都保持修長身型,雖不至筋肉型,但骨肉勻稱。係其中一個洗頭水廣告入面仲曾小露一下結實嘅肌肉,加埋一雙電眼,真係迷死晒啲女粉絲呀!
 
 
第9位  三浦春馬
 
曾經憑「Last Cinderella」而被女觀眾選為「最愛肌肉男星」之一嘅三浦春馬,大膽嘅演出令一班女粉絲為之瘋狂。重點係…出道多年嘅佢,而家都只係26歲,真係名乎其實嘅小鮮肉呀!
 
 
 
第8位  山下智久
 
喺《朝5晚9》入面大Show肌肉嘅山下智久,其實十年前仲係一個貧乳少年,但隨著住不停嘅鍛練,最終練出六舊腹肌加兩大塊胸肌,Man到不得了。更有不少網民見到佢喺《朝5晚9》入面瀑布下修行嘅場面後表示:「希望佢可以一直修行落去!」。我諗其他觀眾都唔會反對嘅 XD
 
 
 
第7位  鈴木亮平
 
有睇過變態超人嘅朋友應該對鈴木亮平一啲都唔陌生(包括佢嘅身材XD)。其實鈴木亮平係出道前已經做開「水著男模」,所以裸露對佢嚟講已經係駕輕就熟。不過小編好奇嘅係…佢係電影入面嘅演出已經近乎99%裸體,但依然被選為最想睇佢光脫脫嘅男星…真係諗起都令人好害羞呀!
 
 
 
第6位  成宮寬貴
 
一直俾人一種神秘感覺嘅成宮寬貴喺今年推出嘅《不愉快的果實》入面同女星栗山千明有一段激烈嘅床戲,大膽指數爆燈。片入面佢仲展露咗自己結實嘅胸肌,難怪迷到一眾日本輕熟女。
 
 
 
第5位  GACKT 
 
已經43歲嘅GACKT非常鍾意健身,仲不時上傳自己嘅肌肉相上網,成排朱古力加人魚線真係唔係個個都練得到,就連日本男士都好羨慕佢嘅身型,拎佢嚟做指標?!
 
 
 
第4位  窪田正孝
 
曾出演電視劇《死亡筆記》夜神月一角嘅窪田正孝,雖然貌似柔弱花美男,但其實收收埋埋一副建美嘅身型。最近仲確定出演《東京喰種》真人版電影?!電影將會2017年夏季於日本上映,唔知到時又會唔會有突破嘅演出呢?
 
 
 
第3位  齋藤工
 
被譽為「男版壇蜜」嘅齋藤工一直勇於展示自己嘅身材,全裸上陣都無難度。有女性更表示:「希望一早起身可以被佢性感嘅聲音叫醒。」、「希望可以見到佢訓喺我側邊,同我講早晨。」等等。可見大家對佢真係充滿幻想呀XD
 
 
 
第2位  生田斗真
 
生田斗真唔駛多講,連小編都好想…睇佢嘅演出XD 鋼條身型,集可愛性感於一身嘅生田斗真無論係雜誌定電影都嘗試過性感嘅演出,大膽程度真係令人面紅耳熱呀!話咁快就已經出道咗二十年,不過人氣依然有增無減,仲深得各界姐姐妹妹嘅喜愛?!
 
 
 
第一位  西島秀俊
 
已經45歲嘅西島秀俊,保養得宜,即使步入中年,魅力依然咁強勁!喺日劇《八重之櫻》入面飾演武士嘅佢,一幕露肌場面更加成為唔少女士茶餘飯後嘅話題,所以話一身健碩身材嘅吸睛程度真係不容忽視㗎!不過14年佢就同細佢16歲嘅圈外女友結婚,今年4月底仲正式做埋爸爸?,相信好多女粉絲都玻璃心碎一地。
 
 
睇完呢一眾型男,當堂有小小心花怒放?!小編愚見,肌肉唔一定要大,但最緊要結實,咁先有安全感㗎嘛!你地又有咩心水呢?