上次同大家介紹左網上蛋糕店「瓜破」嘅曲奇同蛋糕，今次就同大家了解多啲創辦人阿禧，佢係日本學成歸來嘅事啦！
學習日文 學藝轉行
一開始阿禧其實係辭職去日本學日文先，本身又想轉行，就決定學完日文再學多門手藝先走。因為阿禧鍾意食蛋糕、整蛋糕，所以順理成章就報讀左一間係大阪學整甜品嘅專門學校喇。小編問阿禧點解會揀係大阪留學，佢就話貪佢鄰近自己鍾意嘅京都同四國，可以遠離好似東京咁嘅大城市。
日本學整甜品好處多
阿禧話原來係日本學整甜品就同係法國學到嘅係一樣架！所以唔洗去法國都可以學到正宗法式甜品技巧。咁當然，係日本仲可以學埋日本獨有製作「和菓子」嘅技巧啦。
另外，阿禧話日本嘅甜品文化好盛行，蛋糕店多之餘，甜品師父亦好受到尊重，會稱為「職人」（專業人士）。而專門學校就會以基本技巧為重，要不停重複練習，打好根基。係咁嘅環境之下就培養出阿禧對技巧同食材上嘅堅持喇。
學成歸來 一完開店夢
讀書嘅時候阿禧都有係蛋糕店打工，不過因為當時要留係日本當地工作比較困難，所以就選擇左返香港開店。取名「瓜破」係為左記念自己係日本讀書時住過嘅地方，就係一個叫「喜連瓜破」嘅地鐵站附近嘅小社區。
阿禧希望自己嘅店可以貫徹和風嘅感覺，所以除左材料會用上日本特色嘅食物，連產品名都會用返日本漢字去命名。當然有啲款會好賣啲，有啲差啲，但當阿禧發現客人鍾意多層次啲、裝飾花巧啲嘅蛋糕之後，佢又會調整自己嘅設計，係保留日本味嘅同時迎合客人嘅喜好。
以網上蛋糕店嘅形式經營左一段日子，阿禧都著手籌備緊實體店，希望客人可以親自去到店面揀選自己鍾意嘅蛋糕。大家敬請期待啦！
留學貼士
如果你都想去日本學整甜品，阿禧有以下兩大貼士送俾你：
1.資金充裕
畢竟去日本讀書學費都唔少，生活開支樣樣都係錢，又唔一定會搵到工，所以真係要準備好先至好過去呀。好似阿禧咁，邊做野儲錢，邊學下日文，儲夠錢先去留學都唔錯。
2.語言能力
就算去讀語言學校由零學起都好，自己係果邊生活都係需要有基本語言能力嘅。如果去專門學校學一門手藝，就更加要有好嘅日語水平先可以應付到日語授教嘅課程。好似阿禧咁，平時都要自己多睇相關嘅書，記得啲專業用語先可以跟得上架。
深入了解左「瓜破」嘅創辦人阿禧之後，係咪對佢嘅作品更加有興趣？咁就快啲去「瓜破」睇下佢嘅靚靚蛋糕啦。依家買蛋糕仲會送之前介紹過嘅曲奇試食包。阿禧仲透露，黎緊情人節就會有新蛋糕推出啦～ 有興趣嘅朋友記得留意返佢嘅FACEBOOK更新啦！
About Post Author
