【如果命運能選擇】Morning娘。落選者の下場

日本人氣組合Morning娘。(下稱m娘)由90年代開始活躍至今經歷興衰,雖然曾經被AKB系列組合搶晒風頭,但隨著定期輸入新血,而家人氣越嚟越穩定。到現時為止加入m娘仍然係好多少女嘅夢想,不過你估真係咁易咩?那些年都有唔少參加過m娘甄選但落選嘅少女,但你又估佢唔到,有啲仲成為超人氣紅星添!以下就同大家介紹下你未必知,但當年落選咗嘅女星啦~
 
1999年:第2回成員追加甄選(當年合格者:後藤真希)
《落選名單》
天生歌姬 跳唱Diva倖田來未
其實喺日本好多人都知倖田來未參加過1999年第2回追加甄選。想當年倖田同時參加m娘同avex嘅甄選,結果最後兩個都通過咗。不過因為avex個結果公佈比m娘早,所以最後倖田就選擇左avex喇!不過都好嘅,我想像唔到Kumi唱idol歌嘅樣囉~

 

F級美女磯山さやか
著名寫真女星磯山沙也加從幼稚園時期已經立志要做偶像。當時因為憧憬安倍夏美所以參加甄選,但就連書面甄選都通過唔到。

 

2000年:第3回成員追加甄選(當年合格者:石川梨華、吉澤瞳、辻希美、加護亜依)
《落選名單》
潮模 若槻千夏
少少辣妹feel嘅若槻千夏係後藤真希嘅粉絲,中三嘅時候就參加甄選,但連書面審查都通過唔到。之後讀得書少嘅佢以為發掘佢嘅星探講緊嘅藝能界係一間叫「藝能會」嘅公司,仲以為出道嘅話可以自己揀m娘添!
 
m娘全盛期傳說之一 藤本美貴

話說藤本美貴當年都係fail咗2000年嘅甄選,不過就獲H!P之父淳君賞識,俾佢單飛發展,點知當年人氣紅透半邊天,比日媒形容為最期待話題新人!因此淳君仲安排返佢以6期生身份入m娘,成功引起話題~

 
2001年:Love Audition 21 (合格者:高橋愛、紺野あさ美、小川麻琴、新垣里沙)
《落選名單》
日本Blake Lively-ViVi專屬模特兒&潮媽 木下優樹菜
已為兩兒之母嘅木下優樹菜因崇拜安室奈美惠都曾參加m娘甄選,仲留到最後9名!....但因手腳唔協調最後都俾人foul咗~聽講仲因為呢個挫折誤入歧途成為左不良少女。不過輸比賽贏友情,Yukina當年就同高橋愛成為朋友,甄選後仲問人地借錢番屋企添~(10年後高橋仲叫佢還錢)

 

2004年:Lucky 7 甄選(合格者:無)
《落選名單》
NMB48 梅田彩佳
當年黎香港見粉絲仲係AKB48成員嘅梅田2004年參加過H!P甄選,仲通過2次審查!好彩落選後兩年參加第二期AKB48追加成員甄選合格,終於成為idol!其實我覺得梅田跳舞真係幾好架~

 

2005年:甄選2005 (合格者:久住小春)
《落選名單》
SKE48 古川愛李
人稱Airin嘅古川愛李參加m娘甄選留到三次審查架!而且Airin成為idol嘅奮鬥史都叫做可歌可泣 -- 參加2004年Lucky 7甄選二次審查落敗、甄選2005就留到最後5名既三次審查都fail...不過皇天不負有心人,只要有恆心!2009年3月Airin終於通過SKE48二期生甄選成功出道~

 

2006年:Happy8期甄選(合格者:光井愛佳)
《落選名單》
手越祐也緋聞女友 AKB48人氣第二位 柏木由紀
舊年AKB總選拎第二,爆出緋聞照片仲係人氣高企嘅Yukirin2006年參加m娘甄選時出線三次審查成為6883名參加者中最後25強!話說呢屆甄選不得了,同樣有AKB團系列其他成員,包括田名部生來、佐藤すみれ同SKE48嘅鬼頭桃菜添!

 

打不死偶像 吉川友
呢個睇落幾靚,唱歌其實又幾好聽嘅吉川友受同年嘅久住小春影響決定參加追加甄選,雖然當年留到最終審查,不過都落選。最後成為Hello!Prjoect Egg(研究生),轉折下終於可以solo出道~但喺日本偶像界跌跌撞撞半紅不黑,有人都會叫佢做打不死嘅偶像呢。

 

2011年:10期成員「元氣印」甄選(合格者:飯窪春菜、石田亜佑美、佐藤優樹、工藤遥)
《落選名單》
HKT48賣萌擔當 田島芽瑠
參加HKT48第2期生甄選被秋元康睇中,稱之為「第二松井珠理奈」同視其為未來Center嘅Meru小妹妹當年參加m娘甄選都有去到4次審查架~雖然最後落選,但去到HKT仲俾人重視仲真係俾佢做Center,都叫做吐氣揚眉啦!
 
所以話,做人唔好太易放棄自己夢想!話唔定有更好嘅結果等緊你呢!