【好想食炸雞!】東京又平又好味嘅炸雞名店4選

講到炸雞,大家可能第一時間諗起韓國同台灣,不過話畀你聽,其實東京都有好多炸雞店好好味,喺凍凍地嘅天氣下揸住一路行一路食,成個人即刻暖哂~
 
以下落嚟呢4間唔單止好食,仲要勁平,真係唔去返次都對唔住自己!
 
 
1. 中津からあげ 渓 ¥260~
 
 
呢間炸雞溪係一間炸雞專門店,距離銀座站只有2分鐘步行距離,大家可以選擇買走食或者食完先走都得,但堂食就每人限定一定要點杯飲品。反正啲位都唔算好舒服,建議大家都係買走食啦~
 
呢度嘅炸雞好入味,因為啲雞塊用特製醬汁醃咗成兩日,醬汁入面仲加咗大量嘅蘋果同蒜頭,想唔好味都難啦!推介大家一定要點無骨雞肶位「骨なしモモ」,¥260有2至3件,最正係啖啖肉唔使𦧲骨,一路行一路食勁方便!
 
店入面得少量counter位,都係買走一路行一路食好過~
 
名店係多人啲㗎啦,仲要係即叫即炸,不過咁好味等多陣都值得嘅!
 
中津からあげ 渓
地址:東京都品川区平塚2-18-5
電話:03-3785-1177
營業時間:11:30~21:00
休息日:星期四
 
===============
2. 鳥丸 平井店 ¥190~
 
 
呢一間都係炸雞專門店,喺當地以又平又好食見稱,仲曾經係日本炸雞協會金獎得主,好犀利!店入面雖然有座位畀大家坐喺度慢慢食,不過可能啲位都比較窄,眼見大部份人都係買完就走。雞胸肉好難得地做到幼嫩多汁,一啲都唔輸比雞肶肉,如果想試哂雞胸同雞肶可以叫個兩溝「ミックスからげ」,都只係¥220,好抵食。
 
座位得幾個,不過都已經舒服過坐counter位。
 
からあげ 鳥丸 平井店
地址:東京都江戸川区平井5-14-7
電話:03-5630-7071
營業時間:11:00~22:00
休息日:無
官網:torimaru.jp
 
===============
3. 有鳥天酒場 ¥100~
 
 
¥100就可以食到炸雞放題,原來呢個世界真係有咁大隻蛤乸隨街跳!不個佢都有少少條件,就係一定要點杯酒精類飲品同佐酒小食先可以享用到呢個超平價炸雞放題。點完飲品同小食,店員就會每人送上3件炸雞,食完可以叫店員再畀,佢地會2件2件咁上,確保客人每次都可以食到熱辣辣嘅新鮮炸雞!
 
店入面有張menu清清楚楚寫明¥100炸雞放題玩法,晏奏5點後先開始有得食。記得唔好眼闊肚窄不斷叫,食唔哂佢地會逐件收費,一件¥50啊!
 
除咗炸雞,呢度其他嘅佐酒小食都唔錯,好似呢個忌廉芝士味噌漬,咸咸香香,用嚟夾餅乾送酒一流!
 
呢個雞肉刺身同炸雞並列第一位,都係店內嘅招牌nemu,用咗總州古白雞去整,肉質好滑,未食過雞刺身的話一定要試吓!
 
有鳥天酒場 浅草橋店
地址:東京都台東区柳橋1-23-4 須賀ビル 2F
電話:03-5833-7277
營業時間:11:30~14:00(星期日除外)、17:00~23:30(星期六日及公眾假期營業至23:00)
休息日:無
 
===============
4. 宵の空 ¥100~
 
  
 
呢間係另一間因為有得食¥100炸雞放題而出名到上哂電視嘅專門店,佢地嘅炸雞平得嚟真係好好食,外面炸到脆一脆,入面仲可以keep到勁juicy,肉汁多到簡直可以用爆汁嚟形容!不過留意返,食¥100炸雞放題要同時點一杯野飲同一個小食,同埋因為炸雞全部剛剛炸起,小心太大啖咬落去會畀肉汁辣親。
 
個秘製醬汁非常有畫龍點睛嘅效果,點咗汁食多幾舊都唔係點覺膩。
 
counter位可以望到渋谷街頭,一路食一路望吓啲人行嚟行去,一個人去食都唔會覺得太無聊。
 
宵の空ヨイノソラ 渋谷本店
地址:東京都渋谷区宇田川町13-8 ちとせ会館2F
電話:050-5797-9234
營業時間:10:00~24:00
休息日:無