[女性限定] 漫畫任睇 桑拿任焗 新宿梳乎膠囊酒店

如果話香港嘅中心點係旺角,東京嘅中心點應該就係新宿啦~新宿人氣咁旺,通常都要一早預約先有好野。不過由於我患有嚴重拖延症,永遠都last minute先搵地方住(例如到埗前2日…),成日淨返D山卡啦咁遠嘅貴價酒店,都唔知租唔租好/0\
今次我又做deadline fighter挑戰高難度嘅新宿,竟然比我發現咗一間女性專用嘅膠囊酒店「Ladies 510」只係距離JR站8分鐘,最遲即日walk in都冇難度,入面仲有大量人氣漫畫同時裝雜誌,一枝公都唔怕悶豬豬,好正呀~~~
 
門口個牌已經大大隻字寫住「桑拿」+「仮眠室」+「膠囊」+「漫畫」+「cafe(可上網)」,不過淨係得日文……
 
每個入住膠囊酒店嘅客人都會獲分派一個號碼locker,唔好隨便自己揀位放鞋咁傻豬豬呀!
 
話明係膠囊酒店,行李緊係要分開擺啦!本身我帶咗30KG行李嚟日本,但係冇理由霸晒其他人放行李嘅位㗎嘛!所以我將D行李放咗係新宿站嘅locker,淨係拎住紅色個細喼去酒店~不過最後原來酒店仲有唔少空間放行李…是但啦……
 
由於客人們可以就咁入嚟食野同休息幾個鐘,唔一定要租膠囊酒店床位,所以酒店入面成日都有好多住客出出入入,或者會有人擔心唔安全。不過大家可以放心,因為每個人都有個直立式locker可以鎖好自己嘅貴重財物電腦iPad同衫衫褲褲,另外大家仲必須換上酒店提供嘅衫褲,係咪閒雜人等一睇就知,咁大家就唔洗擔心安全問題啦~
 
個locker除咗有4位數密碼鎖之外,仲有條鎖匙比你跟身,雙重保險!
 
搞好晒啲野就可以入房啦~~~依個area係勁勁勁勁安靜,抖啖大氣都怕嘈親人!
 
睇下入面都好寬敞!坐直仲有十幾cm先店到天花板,碌左碌右都有空間~~仲有電視機㖭!好爽呀!
 
入面有兩個插蘇位,可以叉相機同電話電~好方便~~
 
冇租床位嘅朋友可以係出面叉電~不過冇人睇住㗎,自己小心啦!
 
不過萬一你好似我咁_,去旅行冇帶到轉插器,有插蘇都插唔入,電話又冇晒電,可以試下用依部電話充電機!好方便啊~~~
 
咁其實冇租到床位嘅人喺邊到休息呢?就係依個「仮眠室」啦!其實都幾舒服㗎,不過上面盞燈會長開,怕殘眼就要自備眼罩啦~
 
唔想訓又想攤係到hea下睇下電視有好多地方可以選擇!Locker隔離依到部電視機係最大嘅!不過……
 
雪花亦都係最多嘅~(汗)
 
樓下仲有另外一D休息嘅地方~依個電視機掛到咁高,攤係到睇啱啱好~
 
另外依個位電視機就細D,不過有冷氣,正呀!係香港慣咗周圍都係冷氣,成日都覺得日本好焗,所以我好鐘意依間房!出面有D花花草草嘅地方就係吸煙室,要食煙嘅朋友記得唔好周圍食,乖乖地係休息室食完先好出黎呀!
 
 
另外點解啱啱個位部電視咁細都有人坐呢?冇錯,就係因為隔離就係依個漫畫閣!《黑子的籃球》、《銀魂》、《進擊的巨人》、《EVA》、《愛麗絲學院》……我至愛嘅漫畫都有齊晒!除咗漫畫之外仲有時裝雜誌,24小時任你睇,好正呀!
 
睇完消閒,咁浴場又係咩光境呢?咦咦咦好大呀!隔離仲有個凍水池同暖水池任你浸,好梳乎~
 
毛巾、睡衣、沖涼、洗頭、洗臉膏、牙刷、毛巾乜都有,就咁帶個人去住就得,咩都唔洗帶~~~
隻牙刷一濕水就會起泡,用完即棄,唔好以為要自己唧牙膏呀~
 
唔鐘意浸水又想焗一身汗嘅姊妹可以選擇焗桑拿,同樣係24小時開放!(中午清潔時除外!)不過實在太太太熱啦我頂唔順啦……焗一分鐘就放棄咗……
 
搞店晒一身鬆可以出嚟按下腳板底、磅吓重之類~
 
咁至於一日三餐點算呢?自己帶野食野飲去酒店開餐得唔得呢?答案係……唔得嘅!
每位入宿嘅客人都會得到一張免費飲品劵,check out前用咗佢就得~
 
飲品劵可以換到凍熱奶茶/咖啡/奶,我就兩日都揀咗牛奶~熱奶會配包砂糖、凍奶會落冰同有糖漿,落唔落就悉隨尊便啦。
另外想叫飯食嘅朋友亦有唔少選擇,總之唔會餓死你啦~
 
 
餐廳環境唔錯㗎,仲有WIFI㖭!(重點!)
 
咁講到尾,到底住一晚要幾多錢呢?我係匯率仲係6.8算個陣就3600yen(約$245)一晚,下晝3點鐘就可以check in,第二日12點先check out。唔租膠囊酒店,淨係租仮眠室+大浴場12小時就2400yen(約$163)一晚~
 
想睇更多詳細資料?上Ladies 510個官網望下啦,GO!