【奧運】日本角力女將勇奪3面金牌!

今屆奧運日本柔道團隊啱啱拎咗3金,呢個成績已經十分犀利!但原來日本除咗柔道,角力都一樣咁強!今屆女子角力賽3場唔同量級嘅金牌戰,最終分別由日本隊48公斤級嘅登坂繪莉、58公斤級嘅伊調馨同埋69公斤級嘅土性沙羅一共奪得3金!嘩,真係可以話係繼奇蹟後嘅一大神蹟!一齊睇下呢3位運動員嘅簡介啦!
 
伊調馨
 
有日本角力女皇之稱嘅伊調馨,今年32歲,由2004年雅典奧運開始,連續4屆勇奪角力金牌!成為奧運史上嘅「所有運動項目」中,第一位喺個人賽事入面,連續4屆奪金嘅角力女將!
 
唯一唔同嘅係前3屆佢係喺63公斤級完成三連霸,而今年因為奧運量級調整,而轉戰58公斤級,但都冇影響到佢嘅身手,真係好強勁!
 
 
伊調馨曾經奪下過2004雅典奧運、2008北京奧運、2012倫敦奧運嘅63公斤自由角力金牌,賽後佢仲興奮表示,下屆奧運番到東京,亦係自己嘅家,一定要延續呢項紀錄,完成5連霸嘅壯舉!
 
 
伊調馨表示佢嘅成功歸功於家人嘅支持,因為有佢地嘅支持同陪伴,先可以渡過一切難關去拎到四屆嘅金牌!雖然已經係第四次奪得金牌,但伊調馨仍然對得獎感到很感動,全場嘅歡呼聲亦都令佢十分激動。
 
因為今日嘅得獎,可以確定嘅係伊調馨付出一切嘅訓練同心機都冇白費到,恭喜晒伊調馨!
 
登坂繪莉
 
今年22歲嘅日本選手登坂繪莉,喺自由式角力女子48公斤級比賽入面,喺最後關頭擊敗亞塞拜然嘅選手贏咗金牌!
 
 
登坂繪莉未參加奧運前已贏得數屆全日本角力選手大賽同角力世界選手賽嘅冠軍,而今次首次參賽奧運就奪金,相信亦證明咗佢世界級嘅實力,亦顯示咗日本喺女子角力界有一定優勢。
 
 
土性沙羅
 
同樣第一次參賽就奪金嘅角力選手土性沙羅,今年只有21歲。土性沙羅喺女子69公斤級賽事技壓俄羅斯選手沃羅貝娃,奪得金牌,完成咗日本橫掃女子自由式角力3面金牌嘅霸業!
 
 
曾出戰兩屆(2014及2016)亞洲錦標賽都同樣取得勝利嘅土性沙羅,原來好細個開始已經不停攞獎!由小學開始已經奪得日本全國少年少女選手賽嘅三連霸,去到中學都一直喺多個青少年賽(例如日本全國中學生選手賽)取勝。第一次參加奧運就得到咁驕人嘅成績,認真犀利!
 
 
 
登坂繪莉同土性沙羅兩人都係首次參賽就奪金,就好似象徵緊日本女子角力嘅崛起!祝各運動員繼續發光發熱,努力取得佳績!
 
 
Source from Sina, Chinatimes, AFP, Wikipedia, Kyodo News