奧海城高達遊!35歲生日快樂!

 
唔講唔覺原來高達已經35歲啦!唔知係咪為左慶祝佢嘅生日,奧海城就搞左一個「高達基地」等各位高達迷去潮聖一下!
 
 
一去到基地門口已經可以見到兩米高嘅RX-78-2高達等緊你,旁邊仲有由細至大唔同Size嘅佢地列隊歡迎你添!
 
 
仲有其他唔同系列
 
 
 
除左經典造型嘅RX-78之外,大會仲邀請左唔同嘅名人明星去幫佢地重新上色!包括汪東城、周秀娜、陳柏宇、曹星如、伍家謙、游學修、蘇麗珊、馮允謙、Shine、林奕匡及劉小華等等等等…你有無見過d咁colorful嘅高達呀?
 
 
呢隻就係周秀娜嘅Design啦!仲唔係迷人Pink Lady!
 
 
估你唔到!呢隻咁cute有晒蝴蝶結竟然係游學修設計!?
 
 
仲有大東汪東城
 
 
唔少得呢隻長期客串,老是常出現嘅熊霸啦!
 
 
 
不過今次高達展嘅賣點其實係呢個6米高嘅巴巴托司高達模型盒。
 
 
盒側邊仲有故事介紹,注意事項個d,像真度十足呀!
 
 
旁邊仲有隻兩米高嘅巴巴托斯,仲可以入埋去扮組件!影相位,無走雞!
 
 
 
上年「高達模型大賽」嘅冠亞季軍作品都有展出。俾個冠軍你地睇下啦!
 
 
基地入面仲有一個賣場,聽講全部都有折,有d甚至可以去到半價!價錢亦都有唔同類別,最平亦只係三十幾蚊,啱晒我呢d新手啦!
 
 
 
現場仲有幾個攤位遊戲可以玩㗎,不過全部都係要指定消費先可以參加!我就無玩到,不過都可以同大家介紹下。
 
「巨型高達模型拼圖王」
 
考下你地對高達有幾熟,只要將高達唔同部分砌好就算完成!完成遊戲就可以得到高達A5文件夾一個。
參加方法:奧海城或中港薈以單一電子貨幣消費滿 $200或用Olympian Kids 200積分換取遊戲券一張
 
 
 
「高達模型創意攝影室」
 
將你加入模型盒度整成嘅創意照片,夠晒特別!我本身就係想玩呢個㗎  但唔捨得!Upload製成品上 Facebook 仲可以獲贈限量版高達證件套一個。
 
參加方法:奧海城或中港薈以單一電子貨幣消費滿 $300或用Olympian Kids 300積分換取遊戲券一張
 
 
 
「高達模型工作室」
 
呢個就啱晒好似我呢d咁嘅新手玩啦,教你如何砌模型!(其實啱小朋友多d…哈哈)
 
參加方法:奧海城或中港薈任何兩間不同商戶以電子貨幣消費滿$500元或以上,或用Olympian Kids 800積分換取遊戲券一張
 
 
 
睇完展之後記住行埋商場另一面,有個好大嘅Bandai扭蛋Area。大家不妨入去尋下寶啦
 
 
高達模型主題展覽
日期:3月19日至4月4日
時間:12:00-21:00
地點:奧海城2期地下主題中庭