【奈良話題之作!】「暖」上凍刨冰

最近嘅天氣真係好難搞,早兩日凍到好似突然步入冬天,但今日又話回暖,原本仲諗住可以喺凍冰冰嘅天氣下喺街頭食返個熱辣辣火鍋暖吓個胃,而家又要將計劃推遲啦......
 
不過講到暖胃,奈良都有一間老舖「柿の葉ずし総本家 平宗」可以食到個好特別嘅暖笠笠甜品,並唔係大家可以想像得到嘅紅豆湯嗰啲咁普通,而係可以令你食完好暖笠笠嘅巨型刨冰。
 
 
平宗係一間一年四季都可以食到刨冰嘅老舖,已經有超過150年歷史,因為店家覺得冬天都有好多人鍾意食刨冰,所以就研發咗幾款連冬天都好適合食嘅暖刨冰,等客人一年四季都可以享受到刨冰軟綿綿嘅口感。
 
 
店入面一共有大概6款刨冰,當中嘅南瓜刨冰「かぼちゃ氷」、番薯刨冰「さつまいも氷」、甜酒刨冰「甘酒氷」就係傳說中嘅暖刨冰喇!
 
 
個刨冰一上枱嘅一刻都幾震撼,個冰勁大兜!南瓜同番薯係比較大路同多人點,如果對酒唔抗拒的話亦可以試吓個甜酒刨冰,因為喺第二啲地方基本上係搵唔到嘅。
 
除咗個冰之外,一齊上枱嘅仲有一碗暖笠笠嘅泥狀配料同一杯冒緊煙嘅透明不明液體,千祈唔好以為嗰杯係清水就咁飲咗佢,呢個冰係有特別嘅係法㗎!
 
 
嗰杯其實係用奈良產嘅葛整嘅葛水嚟嘅,食之前要將啲葛水倒入泥狀配料度撈混。
 
 
食嘅時候就先用羹撩少少配料,再撩少少冰一齊食,入口一凍一熱,個感覺有啲似食緊連雪糕一啖過嘅心太軟,不過味道清淡得多,就算一個人食哂成個冰都完全唔會覺得好甜。
 
南瓜刨冰 ¥800
刨冰上面加咗少少練奶,正好彌補刨冰味淡嘅不足,加埋南瓜一齊食,暖笠笠好正!
 
番薯刨冰 ¥800
番薯泥做得非常好,極真材實料,入口係勁香濃嘅番薯味,好天然,冇咩添加,一凍一熱同個淋咗檸檬汁嘅刨冰味道好夾!
 
甜酒刨冰 ¥600
呢個刨冰無論係用料定味道都好明顯係為咗成人而設,所以話刨冰都唔一定係只屬於小朋友嘅玩意。
 
 
呢間舖頭最出名嘅其實唔係刨冰,而係「柿の葉寿司」,即係一種以柿葉包住嘅壽司,有鯖魚、三文魚、海鰻等等唔同食材可以揀,同一般壽司嘅不同之處係,呢種壽司會多一重柿葉嘅香氣,係奈良嘅鄉土料理代表作。
 
所以食完刨冰之後,大家都可以慢慢喺舖頭行返個圈,睇吓奈良最出名嘅名物同和菓子,買返幾盒返去做手信都唔錯!
 
柿の葉ずし総本家 平宗 法隆寺店
地址:奈良県生駒郡斑鳩町法隆寺1-8-40
電話:0745-75-1110
營業時間:09:00~17:00
休息日:無