大阪近心齋橋牛雜火鍋店推介!

今次要介紹呢間由大阪起家嘅新世界もつ鍋屋,もつ意思喺牛雜,姐係大腸、小腸、胃等內臟。牛雜香港就成日食,不過好似都未聽過拎嚟做火鍋,咁我地香港人又鐘意打邊爐又鐘意食牛雜。梗係要去試吓啦!今次就去西心齋橋嘅分店。
 
喺心齋橋站7號出口行 5分鐘左右就可以去到,不過門口就比較細,仲要落地下一層
 
因為我五點鐘啱啱開門就去到,所以仲未有人嚟,座位唔係好多,大約得 30個左右。唔想排隊都係早啲去好
 
3000円就有放題喇!有牛雜、豬肉同雞肉鍋揀。
 
仲有英文菜單。不過我就無叫到放題,單叫咗個牛雜鍋,都係 810円
 
鍋嚟喇,點解全部都係菜嚟嘅喂!
 
圖文不符喎…
 
浸晒啲菜落去,總算有啲牛雜上嚟啦~
 
呢度嘅火鍋湯底唔同 Shabu Shabu或者壽喜燒。後兩者個湯底主要都比較濃,唔建議飲。不過呢個牛雜鍋個湯就絕對飲得過!飲起上嚟有啲清甜,好好飲。
 
食咁啲菜,菜非常新鮮加上吸收晒湯底味道,除咗好味我都唔知點形容好~
終於搵度啲牛雜喇,全部都細細粒嘅… 不過咬落去口感都唔錯。
 
呢舊算大喇。不過牛雜味道同香港唔同,因為湯底關係牛同內臟味道都無香港果啲咁濃。吸收咗湯底清清甜甜嘅味道!
 
最後都叫返個豬試下,可能因為我係一個食肉獸,我想講… 個豬好好食!切得夠簿,口感超好;豬肉都好新鮮,好有豬味 XD
總結呢度湯底同食物都算中上,不過略嫌牛雜太細粒,食得唔夠爽,價錢唔算特別平。雖然一個鍋 810円,但份量少,一個人食唔飽要加飯同加肉。如果你地嚟,建議都係食放題啦
 
新世界もつ鍋屋 西心齋橋店
地址:大阪市中央区西心斎橋2-10-14 角屋八幡ビル B1F
營業時間: 17:00~隔天凌晨5:00 (L.O. 4:00)
 
鳴謝:Expedia