【大阪城「另類玩法」!】 夜遊大阪城西之丸庭園

去親大阪城都係日光日白去,夜晚嘅大阪城到底係點㗎呢?永遠都好似好神秘咁。如果同你講大阪城而家連夜晚都開放,你有冇興趣入去睇吓呢?入面唔單止有好多地道美食,重頭戲係喺一片漆黑中上演嘅真人舞台劇「戰國The Real at大坂城」,以大阪城作為背景,配合絢麗嘅煙花匯演,場面好壯觀!
 
 
「樂市樂座」美食區
 
個Show每晚都會舉行兩場,不過千祈千祈唔好等到差唔多開場先到,因為現場有一個叫「樂市樂座」嘅美食Area,入面有十幾個檔仔售賣熱辣辣嘅特色食物,有章魚燒、文字燒、炒麵、炸雞等等,嚟到呢度絕對冇可能忍到手只買一樣野!
 
留意返呢邊開放時間日日唔同,大概由下午4點開到夜晚9點,如果真係趕唔切開場前食,大家亦可以買入場邊睇邊食,又或者睇完出嚟慢慢食都得~
 
現場都幾黑,主要光源都係來自嗰啲檔仔,所以嚟呢度絕對冇相機食先呢回事,加上而家天氣咁凍,啲野食勁快凍,拎到食物好快啲趁熱食!
 
兩個包一紅一白代表住兩大敵對陣營,睇完騷再出嚟食更有感覺!
 
一兜有齊章魚燒同明石燒,食明石燒嗰陣記住淋埋得製醬汁上去,熱辣辣好正!仲有,支牙籤都整到勁靚,成把劍咁,食完忍唔住洗乾淨留嚟做紀念。
 
「戰國The Real at大坂城」舞台劇
 
喺差唔多開場嘅時侯工作人員就會開始喺樂市樂座美食區大叫大家準備入場,如果呢個moment手頭上仲有野未食完,不妨拎埋入場慢慢食,場入面係可以飲食嘅。
 
成個舞台劇會以戰國時代作為故事主軸,坦白講就算識日文都唔係好聽得明佢地講咩,不過淨係睇舞台效果、表演者落力嘅演出同埋背後變幻萬千極度吸睛嘅天守閣,都已經覺得成場演出非常精彩!
 
呢次舞台劇更加係日本環球影城第一次園外活動,機會咁難得真係好難唔去!
 
仲有少少時間先正式開場,大部份嘅觀眾已經坐定定等開show啦!
 
就喺大家期待緊表演者出場之際,舞台上突然射出多條光柱,都咪話唔震撼!
 
極度推薦大家可以買前啲嘅座位,唔單止可以睇清楚啲台上表演者嘅一舉一動之外,到舞台劇中段,表現者更加會走出舞台走到觀眾席中間,所以坐前少少會更精彩,臨場感更勁!
 
背後嘅天守閣會隨劇情需要變色,最深刻係火燒大阪城一幕,超像真嘅投影效果令到天守閣好似真係著哂火咁!
 
臨尾放煙花一幕簡直就係為成個舞台劇畫上完美嘅句號,所有表演者最後會喺煙花下向觀眾謝幕,成場show話咁快就完咗嚕~
 
最後溫馨提示,入夜後嘅大阪城非常之凍,無風由自可,一有風真係會吹到個人騰騰震,去前記得笠多兩件衫!
 
『戰國 The Real at 大坂城』
地點 : 大坂城 西之丸庭園
期間 : 2016年12月16日~2017年3月12日
          ※1月10~12,16~19, 23~26, 30~31日及
              2月1~2, 6~9, 13~16, 20~23, 27~28日及
              3月1~2日除外
費用 : SS 席 大人¥3,480,小童¥2,480
          S 席 大人¥2,980,小童¥1,980
          A 席 大人¥2,480,小童¥1,480