【多圖】Oricon 2016年上半年度日本最人氣寫真女王頭五位結果出爐!

尋日,日本Oricon公佈咗2016年上半年度寫真集銷量排行榜,榮登首位嘅係乃木坂46嘅生田繪梨花!第一次出寫真集《轉調》就即刻封后,總銷量達6.9萬本,生田就話今次嘅寫真集係充滿住由心而發嘅笑容,可以將呢份喜悅傳遞俾咁多fans就真係好開心喎!
 
今次嘅寫真集排行統計咗2015年11月23日至2016年5月22日發售中嘅寫真集。睇番舊年嘅結果,乃木坂女神白石麻衣同西野七瀨都只係分別攞過第三同第四,所以攞第一嘅生田都真係為乃木坂吐氣揚眉!
 
第一位:生田繪梨花(乃木坂46)《轉調》-- 6.9萬本
 
 
緊隨著生田銷量嘅有新生代超紅女優廣瀨鈴。最近紅到發紫,係多套電影電視劇都見到佢嘅廣瀨鈴今年三月出咗寫真集《17歲的小鈴》,銷量有成6.5萬本咁多!
 
第二位:廣瀨鈴《17歲的小鈴》-- 6.5萬本
 

 

跟住就係第三位嘅HKT48隊長指原莉乃係拉斯維加斯性感露臀寫真集《醜聞中毒》,銷量有成5萬4000本。今次指原全程投入,舉手投足充滿女人味,同平時係電視見到傻下傻下嘅佢一啲都唔同,引來fans嘅大迴響呀!
 
第三位:指原莉乃(HKT48)《醜聞中毒》-- 5.4萬本
 

 

第四位係同樣屬於48系嘅NMB48 Ace山本彩。出名身材好嘅彩姐其實已經出過hit爆嘅水着寫真,於是今次就玩其他嘢,喺東京多個地方當街當巷俾粉絲影相集郵,再集齊返粉絲嘅作品推出咗呢本《大家的山本彩》,全部寫真都係彩姐粉絲嘅角度出發引起粉絲共鳴,銷量達4萬部。其實小妹我都係彩姐推所以買咗呢本寫真支持下佢架,我最佩服都係...估唔到有偶像竟然會係自己嘅寫真集開啲咁嘅相出嚟...
 
第四位:山本彩(NMB48)《大家的山本彩》-- 4萬本
彩姐,你係得嘅!
 
第五位就係電波組.inc嘅最上Moga,一頭短金髮做Trademark嘅佢推出寫真集《MOGA》勁騷E Cup身材,大賣3萬本。其實而家越做越紅嘅佢以前都因為被男同學取笑過外貌,而且比女同學杯葛過,所以做咗好多年御宅族,真心宅係屋企不苟言笑架!
 
第五位:最上Moga(電波組.inc)《MOGA》-- 3萬本