【夏日熱辣辣】沖縄以外・日本絕景海灘!

一講起日本嘅海灘,全世界都會即刻諗起沖縄呢個陽光與海灘嘅地方。如果我話其實除左沖縄之外,日本其他地方都一樣有好靚嘅海灘你又信唔信?係堅嫁!而且有唔少添!等我話你知日本頭10個沖縄以外嘅絕景海灘,等你下次想去海灘影相玩沙游水果陣,多D選擇,唔洗下下都去沖縄啦!
 
第10位:前浜海岸 / 東京都
 
呢個「前浜海岸」位於東京都嘅神津島,雖然係屬於東京都但其實都唔近,東京去嘅話飛機要搭40分鐘;噴射船要搭3小時40分鐘,由熱海去嘅話就個半鐘到達。所以個感覺有D似由東京出發嘅小小旅行。
 
雖然唔近,但可能都因為咁先有一啲透明度咁高嘅海!
 
第9位:ヒリゾ浜 / 静岡県
 
「ヒリゾ浜」位於静岡縣嘅伊豆,由東京出發的話最快2個鐘可以到達(新幹線+巴士)。如果東京揸車去嘅話,其實都係3個鐘左右,唔算話遠到唔想去。
 
呢到個海同樣透明度高,而且個景仲超靚添呀!
 
第8位:浄土ヶ浜 / 岩手県
 
喺岩手縣宮古市嘅呢個「浄土ヶ浜」,有個特徵就係呢D一岩一忽嘅流紋岩喺海中突出黎。佢地之所以會一岩一忽係因為被海水沖蝕同風化作用。而呢到因為風平浪靜,所以係日本國內少數嘅海水浴場,仲被選為係日本嘅「快水浴場百選」添!
 
「一閃一閃小星星~」天氣好果時,夜晚仲可以睇到好靚嘅星空,平時我地有幾何可以睇到星星丫!如果黎到,真係要好好睇餐飽呀!
 
第7位:水晶浜海水浴場 / 福井県
 
佢位於福井縣美浜町,入選左「日本水浴場88選」。呢到好受熱愛水上活動嘅人士歡迎,所以由朝早開始就好熱鬧啦!
 
藍藍嘅海水同偏白嘅沙,仲有四圍綠油油嘅風景(嘩好似小學教科書),完全配合到水晶呢個名呀!只要你去左一次就一定會被佢嘅美麗融化!
 
第6位:白良浜海水浴場 / 和歌山県
 
喺和歌山県白浜町嘅「白良浜海水浴場」係有成620米廣闊嘅海岸,可以話係關西No.1嘅人氣海灘黎!
 
佢同樣入選左「快水浴場百選」,驟眼睇真係唔覺得呢到係日本呀!而且喺佢附近有個露天風呂係可以著泳衣入嘅,不過當然要收錢。
 
第5位:竹野浜海水浴場 / 兵庫県
 
呢個海水浴場位於兵庫縣豐岡市,呢個仲勁,D白沙差唔多有1km咁長,好似都唔少日本人知道呢個咁靚嘅海灘嘅存在。
 
呢到海水清澈,無論係一家大細定係情侶黎都非常適合。呀,佢都有被選入「快水浴場百選」同埋「日本の渚・百選」嫁。
 
第4位:角島大橋周辺のビーチ / 山口県
 
呢個位於山口縣下關市嘅「角島大橋周辺のビーチ」,呢條「角島大橋」非常出名,因為佢成日被用黎做外景拍攝,所以話唔定你睇日劇/綜藝節目都有見過佢嫁!
 
廷伸到去海上嘅角島大橋係北長門隨一嘅勝地,全長1780米,係免費通行嘅大橋黎講算係日本首屈一指嘅長度。而且經過嘅時候望住個海景,一定會被感動到呀!你睇下靚到!
 
第3位:高浜海水浴場 / 長崎県
 
佢位於長崎縣五島市,被「日本の渚・百選」、「快水浴場百選」、「日本水浴場88選」認定(即係頭先出現過哂果D),仲喺2004年被日本經濟新聞選為「日本最靚海水浴場」添!
 
呢個浴場係喺三井樂半島嘅西邊,周圍都被山包圍,夠哂綠,而且水清沙幼,好有魅力!
 
第2位:永田いなか浜 / 鹿児島県
 
呢個「永田いなか浜」位於鹿兒島屋久島,呢到嘅特點係島內有好多海龜上陸。去到話唔定都會見到幾隻龜仔出現呀!
 
呢個海岸都係長1km,剩係行海邊都有排行!
 
第1位:大金久海岸(百合ヶ浜) / 鹿児島県
 
第1位嘅就係喺鹿兒島大島郡嘅與論島嘅「大金久海岸」啦!佢係與論島最大嘅海灘,白沙全長約2km!!而且海水透明度相當高,簡直好似去左夏威夷咁呀!