【壽司都可以「鐵板」上!? 】 又真係幾好味喎!!

日本連鎖食店多,小店更多,要搵好野食,除咗參考網上食評,最好就係親身捐窿捐罅睇吓邊度聚集本地人排隊!
 
呢間位於難波嘅「ときすし」絕對係本人私藏list之中嘅一大推介,如果第一次嚟一定要試呢度嘅名物壽司燒「すし焼き(sushiyaki)」,一Set八件用鐵板上,雖然上枱嘅時候鐵板唔會熱到滋滋咋咋,但每粒壽司都因為鐵板嘅熱力一路keep住微暖,加上部份食材用火炙過,誇張啲講句,粒壽司好似有生命咁!勁好味!
 
 
餐枱上面放咗大堆menu,雖然好多都好吸引,又數量限定又盛,不過第一次嚟一定一定要試咗個「すし焼き」先,其他?留返下次嚟再慢慢試。
 
 
點完菜店員會先上碗幾足料嘅味噌湯,入面啲菇菌好明顯經過特別處理,滑嘟嘟,湯底又唔會過咸,剛好可以畀個胃打一打底,準備迎接超好味嘅鐵板壽司!
 
 
因為店入面人客真係幾多,壽司亦冇咁快上到枱,如果識日文不妨而家揭吓啲Menu,睇定下次嚟應該要食啲乜!
 
 
等咗10分鐘左右等到口水到流嘅 すし焼き終於都到啦!一碟入面有齊拖羅、墨魚、平目、三文魚、蝦、帆立貝、章魚同鯖魚,大部份以火炙過,油香走哂出嚟,size做到一啖一粒,女仔都唔使搏命擘大個口先放得哂成粒壽司入口!
 
 
呢個 すし焼き另一個最大特色係每粒都放咗唔同調味喺食材上面,所以食嘅時候完全唔使再加醬油。
 
 
單單8粒壽司又點能夠滿足到大食嘅我,所以緊接住仲點咗個一人份嘅壽司拼盤,入面有海鰻、三文魚籽、三文魚、蝦刺身、海膽等等,食材以刺身為主,食得出都幾新鮮,不過唔知係咪因為冇咗鐵板效果,整體唔算有好大驚喜,飯粒比起すし焼き仲明顯唔夠粒粒分明添。
 
 
枱上面放咗一大兜醬油,食嘅時候可以用入面個掃將醬油輕輕點喺食材上面。
 
 
呢度唔止得壽司,仲有超滿瀉三文魚籽丼等等料理都非常吸引,有選擇困難症的話真係會唔知揀咩好,樣樣都勁想試!
 
 
呢間壽司店一共有兩層,地方唔大,基本上大部份時間都座無虛席,不過因為大家食完都唔會長時間逗留傾計,所以通常唔使等好耐就可以入到去食!
 
 
店外唔會聚集好多人,通常都係幾個幾個咁等緊,亦因為唔係長龍店,好容易走漏眼經過咗間舖都唔知。
 
呢間舖頭目前遊客唔係好多,小編去食嗰日只係見過兩枱外國客,其中一枱更加係金髮洋人,唔想撞口撞面全部都係香港人,呢度係唔錯嘅選擇!
 
ときすし
地址:大阪府大阪市中央区難波千日前4-21
電話:06-6632-0366
營業時間:11:00~23:00
休息:不定休