啱啱過去嘅一個星期，日本動漫畫界就頒咗兩個大獎。一個係東京動畫大獎2016，另一個係SUGOI JAPAN 2016，一齊黎睇睇得獎名單。
首先係東京動畫大獎2016，呢個獎係由日本動畫協會會員、活躍第一線嘅動畫監督等業內人士投票得出，係用專業角度評審投票，得獎作品部部都有返咁上下㗎！
劇場公開部門 LoveLive! The School Idol Movie
電視動晝部門 白箱（SHIROBAKO）
兩部得獎作品都係舊年大熱作品，早幾日仲宣佈LOVE LIVE劇場版票房有成28.6億円，係史上日本深夜動畫劇場版嘅No.1，擊敗咗魔法少女小圓，仲要足足拋離8億円啊！
至於白箱就描寫製作一套電視動畫嘅工作，揭露業界辛酸。對於觀眾黎講，呢個係神秘嘅世界，入面角色嘅經歷、情節就一定好親切，例如趕DEADLINE等。所以得獎都唔意外。
動畫FANS獎 銀魂
動畫FANS獎係公開由FANS投票，今次總投票數超過21萬，得獎作品係銀魂！銀魂動畫不嬲都有人氣，加上依家漫畫動畫都做緊最緊張嘅主線。其實唔擔心有無奬，只擔心佢幾時會完。
SUGOI JAPAN創立目的係想大家選用能夠代表日本推廣至海外嘅作品，分咗4大類別。每個類別都係由公眾提名是年度20部作品入圍，再由公眾喺呢20部作品投票得出排名，有晒民意，亦睇得出邊部作品有人氣。
漫畫部門
第1位 一拳超人（ワンパンマン）
第2位 東京喰種（東京喰種トーキョーグール）
第3位 排球少年!!（ハイキュー!!）
第一名係超人氣嘅「一拳超人」，呢部作品唔需要向推廣係海外啦，因為本來就係海外討論度爆燈，尤其英雄主題啱晒歐美地區FANS胃口！
動漫部門
第1位 四月是你的謊言（四月は君の嘘）
第2位 白箱（SHIROBAKO）
第3位 果然我的青春戀愛喜劇搞錯了。續（やはり俺の青春ラブコメはまちがっている。続）
第一名係憑住唯美畫面、出色配樂嘅「四月是你的謊言」。而且揪心劇情，加上聲優嘅演技，每一集都好似睇緊文學小說。而第二名就由白箱奪得，不論業內人士定一般觀眾都覺得係好作品，未睇過嘅值得一睇！
輕小說部門
第1位 在地下城尋求邂逅是否搞錯了什麼（ダンジョンに出会いを求めるのは間違っているだろうか）
第2位 不起眼女主角培育法（冴えない彼女（ヒロイン）の育てかた）
第3位 甘城輝煌樂園救世主（甘城ブリリアントパーク）
以王道冒險故事為主題嘅「在地下城尋求邂逅是否搞錯了什麼」，讀者一路睇住主角成長，好有代入感。
娛樂小說部門
第1位 屍者的帝國（屍者の帝国）
第2位 「階段島」系列（「階段島」シリーズ）
第3位 愛麗絲殺（アリス殺し）
最後娛樂小說係由「屍者的帝國」拎到，以伊藤計劃嘅遺稿聯同生前好友圓城塔兩人結集而成。舊年已經製作成動畫劇場版上映，不單止係動畫界受注目。日本小說界別都好重視呢部作品，之前仲拎到日本SF大賞特別奬同埋星雲賞日本長篇組兩個獎㗎！
About Post Author
