【嚇到個心離一離!】日本究極杯麵食法

食杯麵就係貪佢多夠快又好味,但偏偏好多日本人就嫌齋食個麵面有啲悶,諗咗好多花臣出嚟幫個杯麵搞搞新意思,當中有我們聽聞過嘅布甸杯麵,更加有其他極富日本色彩或者古靈精怪嘅,趁就到萬聖節,一於偷吓師,到時畀朋友開吓眼界!
 
 
1. 杯麵+布甸
 
 
呢個布甸加杯麵嘅食法原來係源自韓國,將一整個布甸倒入個杯麵度再起勢咁搞混佢就完成喇,幾簡單!
 
有日媒已經親自試過呢個食法,個結論係勁難食!佢地話湯底味道過咗之後,布甸嘅甜味就出現侵佔口腔每個空間,味道非常唔夾喎。
 
  
 
睇吓佢地食完之後個樣咁痛苦就知呢種食法都唔方好食得去邊。(笑)
 
===============
2. 杯麵+納豆
 
 
以為呢個會唔好食,點知日本人嘅評價又ok喎!納豆倒咗入個杯麵之後嗰啲好討人厭嘅納豆絲就會溶哂入個湯底度,個湯底會變得有少少杰杰地,可能本身杯麵味道偏濃,所以都唔係好食到有納豆嘅味道,唔係幾食納豆嘅或者可以整嚟試吓。
 
===============
3. 杯麵+蕃茄汁
 
 
留意呢個唔係用一支支用嚟點薯條嗰種茄汁,而係一罐罐嗰種蕃茄汁飲品,個比例係湯底同蕃茄汁要一比一,將蕃茄汁整返熱,之後就加滾水入杯麵,再將蕃茄汁倒埋入杯麵度,然後合埋個蓋等3分鐘就有得食。一打開,湯同蕃茄汁都已經畀麵索哂,成碗都紅卜卜!
 
 
個樣係有啲驚嚇,不過據稱呢種食法個味道超似食緊蕃茄意大利粉,連日清官網都曾經介紹過,下次同男朋友食飯直情可以用碟上,話唔定可以瞞天過海仲讚你叻叻豬!
 
===============
4. 杯麵+雲喱拿味雪糕
 
 
之前個布甸杯麵劣評如潮,以為同屬甜品系嘅雲喱拿雪糕都將會係失敗之作,但個味道又幾令人surprise喎!望住個雪糕溶入個湯或度已經夠哂治癒,等佢溶哂之後搞一搞,個湯即刻變得勁creamy,味道仲幾似忌廉湯添!
 
雲喱拿雪糕溶咗之後個湯就即刻變咗奶白色啦。
 
===============
5. 杯麵+芝士+沙律醬
 
 
唔知大家知唔知即食麵加沙律醬係好好食㗎!所以我敢寫包單,呢個加咗芝士同沙律醬嘅食法係200%好食!等芝士溶咗之後就將三樣野撈混佢,芝士同沙律醬會令到成個杯麵嘅味道更加純厚,不過好味係要付出代價嘅,就係呢個杯麵卡路里好高。(笑)
 
 
 
食完麵啲湯倒咗佢好浪費......
 
杯麵嘅味精湯係成個杯面嘅靈魂,就咁倒咗佢真係有啲唔捨得,不如加隻蛋落去整超簡單茶碗蒸?做法好簡單,只要打隻雞蛋落食淨嘅湯度發開佢,塞入個微波爐度叮3分鐘,叮完就食得㗎啦!雖然個做法聽落好似好核突,不過呢個真心味道真係唔錯。