喺日本便利店去廁所隨時犯法?

有時去到外地人生路不熟,急起上嚟都幾緊張,唔知邊度有廁所。喺日本嘅話,比起商場廁所,更多人會選擇去便利店廁所,因為梗有一間喺左近~搵便利店絕對方便快捷過你搵公廁。

 

不過,大家又知唔知其實唔係每間便利店嘅廁所都可以隨便用呢?原來便利店嘅廁所使用權限係有分以下幾種:
 
「ご自由にお使いください」請自由使用
「スタッフに一声おかけください」請先請示店員再使用
「トイレの無断使用禁止」禁止使用本店廁所
「当店にトイレはありません / お貸しできません」本店沒有廁所 → 其實即係有,但只係畀員工使用

 

如果廁所門明明貼咗要先向店員請示再使用,但你又冇咁做嘅話;或者你使用咗員工限定嘅廁所,根據日本律師所講,係可以構成「建造物侵入罪」㗎!(即係好似香港嘅擅闖他人物業罪)
 
 
日本律師東山俊就話:「日本便利店嘅廁所係店長管理嘅,如果無視指示直接使用係違反店長嘅意思同店內規則,足以構成建造物侵入罪!」
 
更加重要嘅係,因為只要你係有違法嘅目的去前往一個地方,就足以構成定罪。所以只要你嘅目的係要無視店內規則去廁所,就算你無去到,但你係抱住呢個目的入店嘅話,一樣可以告你架!

 

只不過唔使擔心,一般你入店都唔會知道你係想去廁所,所以只要人哋唔知你係呢個目的,都唔會引起咩問題嘅。但大家記住,如果見到廁所門口有指示牌就千祈要遵守,做個負責任嘅遊客喇~