【咪做大嘥鬼！】日本人教你食剩關東煮另類食法

去旅行好多時都會眼闊肚窄，以為自己實食得哂所以唔覺唔覺就會買咗過多野食，如果萬一真係食唔哂你會點做？留返第二朝當早餐定係掉咗佢？唔好浪費食物啦，話畀你知日本人會點樣處理食剩咗嘅關東煮啦，話唔定下次去旅行就用得著～

 

 

材料非常容易買到，甚至乎係用食剩咗嘅麵包都得！首先準備個麵包，然後搽啲關東煮嘅湯汁，如果有調味料喺手可以隨意加少少，最後夾埋啲食剩咗嘅關東煮入個包度就搞掂啦，勁簡單方便！根據日本網友們嘅食後感，一致讚成夾大根同雞蛋係最好味嘅！

 

如果有飛碟機仲正，將啲食材放哂入去夾埋部機等一陣就食得，方便又好味，一切開個賣相都唔差，可以呃得吓人㗎！

 

冇飛碟機的話可以輕輕烘吓塊面包先夾關東煮，一樣好好味。

 

如果連烘麵包嘅工具都冇，可以買個熱狗包夾埋哂啲食材，比冇烘嘅方包好食。

 

===================================

 

呢個方法可能比較啱喺日本長期生活嘅人多啲，因為去旅行正常都唔會有飯煲，除非你住民宿啦。成個烹調過程最需要技巧嘅就係將關東煮切細嘅步驟，將洗好嘅米倒哂入飯煲之後再將切好嘅關東煮連湯汁倒哂入飯煲，如果唔夠湯就可以加啲水再加少少醬油調味，等到啲飯煮起撈混佢就食得啦！因為關東煮本身以經好夠味，所以用嚟煮飯可以話係將所有精華滲哂入啲飯度，冬天食都咪話唔滋味！

 

個樣真係睇唔出係用食剩嘅關東煮嚟整！

 

想豐富啲嘅話可以自己加料，夠哂健康好味～

 

想食得豪啲可以加幾隻生蠔喺面。啲飯煮好之後將生蠔放入飯煲，焗佢10分鐘就有得食啦！

 

自己去買咖喱整又嫌入面冇餸嘅話呢個方法都幾好，將咖喱加熱咗之後倒埋啲關東煮入去搞一搞就有得食，因為關東煮本身已經有味，所以唔使浪費時間等入味，超方便！再懶啲可以直情去便利店買埋盒飯叫店員幫手加熱，返到酒店一倒出嚟就有得食，方便快捷好味仲要夠哂平，正！

 

關東煮原件上又得，你有時間切哂做粒粒就仲好，好睇又好味！

 

 

 

 

聽落好似好高級好麻煩，其實超簡單，如果大家剛好食完杯麵就仲正，因為可以用埋杯面嘅湯汁精華！食過呢個茶碗蒸，你都會忍唔住讚自己原來整野食都幾有天份！整法好簡單，如果冇刀可以用羹將食剩嘅關東煮整細粒少少，連少少關東煮湯汁倒哂入食剩嘅杯麵湯入面，再打隻蛋入去打混佢，再塞入微波爐叮3分鐘就有得食啦！

 

如果時間掌握得好，個蛋可以做得好滑，不過失敗咗都唔緊要，個味道一樣都係咁正！