「吟釀」「大吟釀」「超吟」到底有幾「吟」? 一分鐘學識清酒分類( 一)。

不論走到日系超市或者日本餐廳,係清酒嘅標籤上大家都唔難見到「吟釀」或「純米大吟釀」等等嘅標示。吟下吟下,究竟標籤上嘅字係代表啲咩呢?
 
 
被譽為日本國寶嘅「梵。超吟」,其實「超吟」只係支酒個名,並唔係分類,呢支酒係屬於「純米大吟釀」。
 
根據日本「酒類業組合法」,符合特定條件嘅酒稱為「特定名称酒(とくていめいしょうしゅ)」。當中以製酒嘅「原料」及「精米步合(せいまいぶあい)」等為2個重要條件,細分別8個類別,今次就講左大家最為熟悉嘅「吟釀酒系列」4個類別先。
 
 
「吟釀酒」- 高級日本酒嘅代名詞
 
要了解咩叫「吟釀」,首先要了解咩叫「精米步合(せいまいぶあい)」先。
用黎造酒嘅米同我地食緊嘅米都係一樣,本身都係糙米,經過打磨先變成白米。
 

由右至左, 玄米(未磨), 一路磨細去到更細既精米步合。
精米步合表示將「玄米」(糙米)拎去研磨,再用「%」表示磨完之後粒米仲剩返幾多。例如印上精米步合20%,就係指粒米被磨走左外圍80%,留返最接近米中心「心白」嘅位置先去釀酒。。而釀造清酒用嘅酒米,一般精米步合則從75%到30%不等(當然有再低啲)。(一般平時食用米既精米步合係88-92%左右)
 
精米步合%越低,代表每粒米磨剩越少,相對成本較高,而大家聽開嘅「吟釀」就係取決於呢個要素喇。而另外一個要素「原料」就係決定支酒究竟係唔係「純米」,只有米同米麹釀造嘅就係「純米」,有加入釀造酒精嘅就係吟釀/大吟釀。
 
由於我理解大家都有Too Long didn’t read 嘅心態,所以用下面個表簡單表達點先係「(純米)吟釀」「(純米)大吟釀」: 
 
  1. 原料: 有無加到釀造酒精?
    •  無喎,只有米同米麹,即係「純米」。
 
  1. 精米步合: 50%以下?60%以下?
    •  20%,低過50%,即係「純米」嘅大吟釀
 
所以呢支「超吟」係一支純米大吟釀喇!
 
吟釀酒系列通常著重花果香氣,口感清爽順滑,容易入口,係80年代開始特別流行,所以大家都聽過「吟釀」呢個Term。而對於新接觸清酒嘅朋友黎講,吟釀酒系列絕對係唔錯嘅選擇。但係都係個句,唔係一定係「大吟釀」先係好酒,了解唔同酒嘅特性,選擇符合自己口味先係最重要,如果你鍾意的話,求其一支「孖蒸」都係好酒!
 
以上只係講左4款種特別名稱酒嘅資訊,而呢4款嘅其實可以話係高級日本酒嘅代名詞,其餘4款我地下回再分解。
 
Reference:
「日本酒の教科書ー宝島社(2015)」
「Master of Sake - SSI International (2014)」