【古日本風】小江戶之稱-川越

唔知大家有無聽過川越呢個地方呢?佢位於埼玉県,即係東京都隔離,同東京都非常之近。如果你去新宿原宿渋谷去得太多想去番D靜靜地睇下野,古日本風格嘅地方的話,唔一定要去到京都咁遠嘅,近近地去川越就可以頂住癮先嫁啦!
 
如果由新宿出發,搭特急小江戶號嘅話,只需要45分鐘左右就會到,真係好方便,可以係去東京嘅時候撥一日去玩下。川越又稱為「小江戶」,佢被國家認定為係歷史都市黎嫁。而川越嘅代表就係「時の鐘」,因為佢係NHK連續TV小說嘅舞台,所以非常之出名。
 
咁到底有咩睇呢?而家我就介紹川越其中五個比較受歡迎嘅景點比你地啦!
 
1.時の鐘|蔵の町エリア
 
作為川越嘅代表,梗係要去參觀下啦!「時の鐘」據說係喺400年前由川越酒井家二代酒井忠勝建成。而而家嘅「時の鐘」就係明治26年(1893年)經過川越大火之後重建嘅第4代黎。佢係用機械黎敲響,每日會響4次,分別係早上6點、正午、下午3點、下午6點,同400年前一樣用黎提醒市民時間。「時の鐘」高16米,比起周圍都偏矮嘅建築物黎講非常顯眼。
 
想去的話,可以乘搭小江戸巡回巴士喺「蔵の街」落車,行3分鐘就會到嫁啦!
 
2.一番街の蔵造りの町並み|蔵の町エリア
 
講起小江戸川越嘅話,一定唔少得「蔵造りの町並み」!簡單黎講呢到係一條街。
雖然佢叫做小江戶,但其實呢條街都係喺明治時期建設嘅,而非江戶時代。由於明治26年果時嘅川越大火,將成個川越街道燒壞左3分之2,所以呢D都係喺大火之後先再興建嘅。
3.菓子屋横丁|蔵の町エリア
 
菓子屋横丁係明治初期作為養寿院嘅門前町而出名,由鈴木藤左衛門開始製造菓子黎售賣。関東大地震果時由於本身供應菓子嘅東京下町損壞,所以就由呢到就代替佢提供。喺昭和初期果時高峰期有成79間菓子店嫁!
而家菓子屋横丁有20多間店,賣糖賣煎餅仙貝等等,去到嘅遊人都會覺得有種番番以前,好懷舊嘅感覺。呢個小江戸嘅和菓子横丁係集合左小朋友嘅夢想之地,不論大人定小朋友都一定會好鍾意呢到。
 
4.川越まつり|蔵の町エリア
 
川越まつり(川越祭)係喺1648年為左獎勵川越氷川神社祭礼而開始。而呢個傳統祭典己經維持左360年以上了。
川越祭最特別嘅地方,係江戸嘅「天下祭」留傳落黎到而家都有嘅山車儀式,即係有幾架山車面對面咁用笛、大鼓、小鼓、太鼓黎伴奏比賽,之後參與祭典嘅人會拎高提燈大聲高呼「曳っかわせ」,好鬼hyper。
 
川越祭係每年10月第3個星期六,日就會有,岩時間嘅不妨去趁下墟!
 
5.新河岸川|博物館エリア
 
新河岸川以前係用川舟黎幫川越同江戶(東京舊名)作物流嘅路線。川越係武蔵野嘅物資集積地嘅同時,新河岸川就從江戶(東京)帶同佢嘅資料,潮流,物資一同運行。所以川越就有「小江戸」呢個名。
新河岸川兩邊都有櫻花樹,到左春天果時因為密密麻麻嘅櫻花就會令到新河岸川變得超靚,完全係人間仙境。而每年會有個新河岸川櫻花祭(其實係得一日),喺果一千零一日就會開放賞花嘅小船,比人感受下喺慢慢櫻花樹下游過嘅感覺。