新嘅一年話咁快又到,為咗迎接新嘅一年,香港人喺年末就已經開始忙到爆炸,又執屋又要約朋友去倒數,忙到個假轉眼就過咗。香港咁忙,原來日本都不相伯仲,為迎接新嘅一年有勁多野要做。以下係日本人5大必做新年習俗,如果有機會年頭去日本,不妨行吓當地超市睇吓極精美嘅賀年食品,同去吓神社行返轉為自己新嘅一年祈福!
 
習俗一:擺放門松
 
 
門松唔單止係一個裝飾,仲係用嚟迎接神明嘅到來。喺1月1日到1月7日期間,日本人會將門松放喺門口,年神就會附喺年松上面,而如果要去神社進行初次參拜,亦要喺呢段時間之內進行。
 
習俗二:派利是
 
 
日本人同我地一樣都會派利是,佢地嘅利是叫「御年玉(OTOSHIDAMA)」,不過個利是封顏色就同香港幾大分別,我地以紅色同金色為主,佢地就咩色都有,仲超靚添!所以如果有機會年末去日本,記住買多啲返香港,收到嗰個實唔捨得掉!
 
習俗三:去神社參拜
 
 
喺1月1日到1月7日俗稱「松之內」嘅呢幾日,日本人會去神社進行初次參拜,仲會喺繪馬上寫上今次願望同目標,跟住可以買支象徵吉祥嘅「破魔矢」,祈求嚟緊一整年都可以平安幸福。
 
破魔矢
 
繪馬
 
習俗四:寫賀年卡
 
 
賀年卡即係日本人口中嘅「年賀狀」,用嚟寫祝福語之外更加係用嚟感謝對方喺去年對自己嘅照顧。日本嘅郵局非常之貼心,會講到明幾時會開始收集同幾時寄出,咁就保証就算早咗幾日寄出,對方都唔會過早收到,好似今年,12月15號就開始收集,12月25日先一次過送出。不過而家科技咁先進,好多人已經以電子年賀狀取代一般郵寄。
 
習俗五:食新年飯
 
 
日本人同我地一樣都極度重視新年第一餐飯,我地鍾意整哂九大簋圍住齊齊食,日本人就鍾意一人一兜好精美咁食,有時喺超市或餐廳行過見到「御節料理」就係佢地嘅新年飯啦!不過比起出去買,更多家庭鍾意自己整,佢地通常新年前就要準備好食物,當中選用嘅食材都係有特別意思㗎!
 
魚干仔:以前農家會將魚仔灑喺田度當肥料,所以魚干仔有五穀豐收嘅意思
大蝦:彎曲嘅大蝦寓意長壽
蓮藕:蓮藕上有好多窿窿,象徵可以透視未來,前途一片光明
魚卵:魚卵通常都唔會一兩粒咁上,無數嘅魚卵有兒孫滿堂、家運亨昌嘅意思
昆布卷:昆布嘅日文同開心「こぶ」同音,寓意食咗昆布卷嚟緊一整年都可以開開心心
黑豆:黑豆嘅日文同勤奮「マメ」同音,寓意新嘅一年可以認真勤奮地過每一日
 
祝大家新年快樂、恭喜發財、年年有餘、五福臨門、財源廣進、大吉大利、步步高升、心想事成、萬事如意、 龍馬精神、年年加人工、日日準時收工,恭喜恭喜!