【又係你啊X生?】動漫真人版電影老是常出現男演員排行榜

每次有動漫作品真人化嘅消息出現,99%嘅情況都會引來一片哀嚎,因為...我哋中過嘅伏實在太多喇 T_T!拍都算啦,唔知點解呢班演員成日都有份演呢啲二次元真人化嘅作品㗎喎,簡直好似變咗御用班底添呀!日本網民就搞咗個「如果拍動漫電影真人版幾乎一定有佢份」排行榜,個結果都幾搞笑,一齊睇下你心目中嘅名字有冇出現啦:
 
第十位 菅田將暉 125票
代表作:《男子高中生的日常》、《暗殺教室》、《Death Note:New World》
要數近排暴光率最高嘅,Masaki一定唔會輸畀呢個ranking嘅其它男星,只不過佢嘅戲路唔單止規限在動漫作品。不過最新嘅《死亡筆記》電影會有佢份,都幾期待呢!

 

第九位 佐藤健 144票
代表作:《ROOKIE》、《浪客劍心》系列、《爆漫王》、《愛上大話情人》

佐藤健由好多年前高中生嘅時候已經開始演動漫作品真人版。最近嘅佢就少咗啲~不過佢拍浪客劍心啲動作場面真係好型,難得唔崩呀!

 

第八位 神木隆之介 148票
代表作:《爆漫王》、《浪客劍心》系列、《偵探學園Q》、《金田一少年之事件簿》

神木隆之介上榜,其實我想講佢配音都好犀利,成日有份配動畫大導嘅作品~

 

第七位 山田孝之 163票
代表作:《CROWS ZERO》、《GANTZ》、《荒川爆笑團》、《吸血大耳窿》、《火星異種》

我男神山田孝之上榜就抵啦!佢真係演個好多唔同嘅動漫作品真人版㗎!不過其實我最鍾意睇佢演惡搞二次元嘅《勇者義彥》多啲XD

 

第六位 福士蒼汰 165票
代表作:《今天不上班》、《圖書館戰爭》、《只要妳說妳愛我》、《BLEACH》

實不相瞞,我估唔到福士蒼汰嘅排名得第6!之前佢都係拍過好幾套少女漫改編作品,但最近就連男仔鍾意睇嘅少年漫都開始搵佢呢!

 

第五位 松山研一 175票
代表作:《死亡筆記》、《NANA》、《GANTZ》、《爆粗BAND友》、《白兔糖》

出現了!L!一講起佢就會諗起佢演到出深入化嘅L同埋爆咗BAND友入面個look!

 

第四位 山田涼介 194票
代表作:《金田一少年之事件簿》、《暗殺教室》、《鋼之鍊金術師》

Hey!Say!JUMP嘅山田涼介係唯一上榜嘅男偶像,佢嘅實績的確係有啲料到,《暗殺教室》喺亞洲都好似幾收得,難怪人哋會搵佢拍《鋼鍊》嘅...

 

第三位 藤原龍也 477票
代表作:《死亡筆記》、《浪客劍心》系列、《只有我不存在的城市》

淨係夜神月呢個角色都夠推佢上榜啦!藤原龍也屬於演技派,其實演舞台劇更加出名。

 

第二位 小栗旬 685票
代表作:《信長協奏曲》、《花樣少男少女》、《極道鮮師》、《流星花園》

小栗旬出道多年其實演過唔少種類嘅日劇同電影。不過的確佢係演完幾套偶像劇,例如《流星花園》同《花樣少男少女》之後開始爆紅嘅~不過而家佢都唔駛走偶像路線,佢嘅演技係大家有目共睹嘅。都真係幾期待佢演嘅亞銀呀!

 

第一位 山崎賢人 777票
代表作:新版《死亡筆記》、《女主角失格》、《狼少女和黑王子》、《四月是你的謊言》

其實,一定會係佢囉。真係果然係佢囉。呢期真係山崎賢人很忙啊!因為多次出演少女漫畫改編電影因而間接成為最佳男主角稱號嘅Kento BB應該都係因為主演多套少女漫作品先會榮登呢個榜嘅第一位。基本上而家見到有少女漫畫改編嘅戲嘅男主角都會係佢咁滯。
 
其實我覺得窪田正孝都應該上榜,話晒人哋拍過夜神月,嚟緊又做金木研~
 
資料來源:Goo