【去邊玩】帶你去京都親自製作鰻魚飯

鰻魚飯係去到日本必食嘅料理之一,軟滑嘅鰻魚加上店家秘製美味醬汁,連埋啲飯一啖放入口,嗰種滋味真係而家諗起都吞口水!
 
大家喺食嘅同時,會唔會有時都想知道店家到底有咩秘方可以整到咁好食嘅鰻魚飯?機會嚟啦!
 
呢間位於京都嘅川魚料理專門店「しお冨」竟然有搞workshop教大家親自整鰻魚飯,可以自己一手一腳參與,坐低慢慢食返自己嘅心血結晶嗰陣真係會覺得呢個係全世界最好食嘅鰻魚飯!
 
 
就係呢度啦!由JR六地藏站行過嚟都只係需要幾分鐘。
 
準備好捉鰻魚未?你睇吓佢地全部都好生猛㗎!最重要係全部都係日本國產鰻魚,質素有保證!
 
老闆會幫你手將條鰻魚放入桶入面先。
 
好啦,要準備劏條鰻魚啦!原來要收拾條鰻魚要用成7種用具,有好多仲係從來都未見過㗎添!
 
哈哈,原來唔使自己親自落手劏,因為老闆話最少要有3年經驗先做到,所以呢啲咁重要嘅環節就交返畀老闆啦!
 
劏好之後就會拮住佢用備長炭燒,燒嘅時候點樣揸啲鐵籤令到條鰻魚裡裡外外都燒得均勻係好需要技巧㗎原來!
 
燒到咁上下,老闆就話係時候淋啲秘製醬汁上去啦。淋嘅時候慢慢倒,咁先可以令成條鰻魚都沾滿醬汁。
 
好啦!搞完一輪終於有得食啦!唔知係咪因為有份參與嘅關係,好似真係好味過以前食過嗰啲喎!
 
食完鰻魚飯仲未完㗎!仲有鰻魚肝可以燒,燒之前當然係要串起佢啦。
 
同燒鰻魚一樣,燒到咁上下就要淋醬汁,不過今次打直淋,可以均勻啲。
 
食嗰陣老闆會畀個爐仔你慶住食,呢餐真係大滿足~
 
==============
 
呢間舖嘅鰻魚都係來自靜岡縣同愛知縣,條條都好生猛勁新鮮,加埋老闆超過40年嘅料理鰻魚經驗同自家製秘製醬汁,難怪住喺首都圈嘅日本人都唔介意千里迢迢過嚟幫襯。
 
店入面環境唔係好大,不過座位都好舒服。
 
認住佢地啦,佢地就係教你炮製鰻魚飯嘅老闆啦,勁好人。
 
==============
しお冨
地址:京都府宇治市六地蔵町並40
電話:0774-32-0602
費用:¥5,400
體驗時間:10:00~12:00、11:00~13:00、14:00~16:00
休息日:星期一
前往方法:JR六地蔵站步行3分鐘 
報名:WORKSHOP
注意事項:①可以帶定條手巾仔去抹手
                    ②盡量穿著輕便衣服