【去邊好】日本激靚天空之鏡

世界上最出名嘅鹽湖係位於玻利維亞嘅烏尤尼鹽湖,喺每年12月到3月雨季期間,烏尤尼湖會反映出天空倒影,做成海天一色,極之迷人。
 
 
不過去呢個地方坐飛機去都要成幾十個鐘,唔係個個都抽到時間特登走去睇。不過唔緊要!話你知日本其實都有啲靚到同烏尤尼湖有得揮嘅超級靚湖景,而且仲唔算難去,只要預啱時間帶埋腳架,影完放上fb、ig,一定個個都會問你喺邊度影!
 
 
1. 江川海岸@關東千葉
 
 
江川海岸最出名嘅就係海中間嘅電柱,喺呢度影相記得留意潮漲時間,大家一定要把握潮漲嗰黃金一小時先可以企埋啲電柱側邊影相,如果太早去只會見到「天空之泥」,太晏去又只會見到一片汪洋,入唔到去影靚相㗎啦!同埋要趁冇風一刻影,如果唔係好容易會影到啲泥。
 
仲有,記得著水鞋去,出發前亦最好記低酒店電話,咁回程嘅時候就可以請酒店幫你call的士返去啦~
 
係咪有啲《千與千尋》feel呢!好多人就係因為覺得佢似《千與千尋》入面千尋同無面人坐火車嘅場景,所以特登嚟影相㗎啦!
 
如果早咗去就會見到呢個情景。相比起天空之鏡,當地人好似對摸蜆更加有興趣,一家大細拎齊哂工具係咁摷。
 
如果遲咗去就呢度就會變咗一片汪洋,不過都依然係幾靚嘅。
 
江川海岸
地址:千葉県木更津市江川576-6
前往方法:於JR木更津站西口乘坐2號巴士於江川站下車,依指示往「江川海岸 江川漁業協同組合」方向步行約30分鐘,經過「三協食堂」即達。或於JR巌根站轉的士約15分鐘
 
================
2. 余呉湖@北琵琶湖
 
 
琵琶湖大家應該都略略聽過呢個名,但你又知唔知原來位於琵琶湖北部長浜市入有一個被譽為日本烏尤尼湖嘅「余呉湖」?呢個湖冇風嘅時候會反映到天上嘅藍天白雲,簡直就好似一大塊鏡照住個天咁,超級靚!不過有啲可惜嘅係,呢個湖企唔到喺上面影相。
 
呢個湖自從畀別所隆弘先生喺twitter貼咗出嚟之後就勁大迴響,緊係啦,你睇吓喺佢相機下嘅 余呉湖幾靚!
 
所隆弘先生作品
 
所隆弘先生作品
 
嚟呢度唔單止睇天空之鏡,春天更加會見到湖邊有唔少櫻花樹,成個構圖好似個仙境咁!
 
呢個係余呉湖夜景,影夜景記得要帶埋腳架喎!
 
余呉湖
地址:滋賀県長浜市余呉町余呉湖
交通:JR余呉站下車步行5分鐘