[原宿雜貨天堂Awesome]幾百yen就買到生活品味!

好多人對原宿嘅印象都係停留喺「五顏六色頭」同埋「要排好耐隊嘅小食」w
不過其實原宿都有好多既清新又懷舊、既文青又型格嘅雜貨店㗎!
重點係,依啲雜貨店好多都好平!今日就介紹一間有日本特色+外國風情嘅雜貨店Awesome Store比大家~
 
 
一入到去就見到好多舊舊的鐵牌,日本人真係好鍾意依舊美國風格嘅雜貨!周不時都見到依類雜貨大賣!
 
再行入啲就見到收納類雜貨啦!打頭陣嘅係簡約又好用嘅滕籃~好多都係百幾二百yen就有交易!
 
跟住有布籃~~~唔用個陣可以摺到好薄咁收起佢~
 
接下來有唔係好關事嘅雨褸~重點係男女都啱用~~~一齊着情侶裝啦喂~(前提係你要有……)
 
望吓後面有啲咩?金寶湯?錯!係金寶湯電話殼!
真心,當你從褲袋入面掏出一罐金寶湯個陣,我覺得你已經嬴咗全個世界!
唔洗50蚊就嬴到成個世界,抵到爛啦!
 
另外又係吹勁唔熄嘅花柄風~意外地同眼鏡盒幾夾喎!
 
仲有好多鬼咁平又幾咁多款嘅飾物等大家嚟選購~
 
小盆栽又係一種有神奇力量嘅雜貨~唔信?係商場廁所啲馬桶水箱上面放盆盆栽,功效都一樣立竿見影㗎!
 
講起馬桶就即刻見到馬桶蓋套!唔講唔知,依個馬桶蓋套係熱賣item之一~~大家要唔要考慮買返個啊~
 
以為咁就行完?咁你就太年輕啦~其實仲有下一層㗎!
 
一入到去就見到一大排夢幻嘅藍色樽~十幾蚊太抵玩,個個爭住買搞到斷晒貨~啱啱先返貨咋!
 
跟住就到廚房同party用品~
 
依個正啊!用嚟放茶包㗎~個咀就用嚟鈎喺個杯到~~仲有好多款!
 
跟住依個係可以入微波爐嘅蓋~叮飯個陣冚喺個碗上面就可以保持個飯嘅水分唔會流失~同埋仲可以代替保鮮紙咁用㗎~
 
仲有識得企喺到嘅飯殼~~~
 
超可愛嘅木匙羹~都係10蚊多啲咋~
 
派對必備蛋糕叉!
 
然後望向另外一邊,竟然係按摩用品!真係估你唔到~依個咕?識得震㗎~放喺公司震住嚟做嘢都米話唔爽~(喺老細發現之前特別爽)
 
各式各樣嘅按摩用具~~~
 
依個按頭嘅按摩器令我聯想起《寄生獸》……我唔係好想比佢店到我個頭哈哈~
 
最後因為Awesome Store真係太大太多嘢睇,冇可能逐一介紹,所以大家都係自己嚟睇下見唔見到心頭好啦~
 
網頁仲有英文同中文揀(如果你唔介意睇殘體嘅話哈哈),好方便~~~
 
最後最後,密切期待原宿雜貨天堂第二集!估下MIKA會帶大家去邊?
Bye~~~