原宿文青地design festa gallery。夢幻世界水曜日のアリス

大家好~~我係HELENA。今次係筆者第一次打BLOG,有少少緊張~係開始之前等我戴定頭盔先,如果有咩寫得唔好請多多包涵,資料不足歡迎留言補充。
 
今日介紹既地方就係原宿喇!大家可能會心諗,又係原宿,有邊個唔知原宿多特色野買呀。今次除左會同大家講講可能經聽到爛既竹下通之外,亦會同大家一齊培養下文青氣息,到訪係竹下通附近既Design festa gallery 同埋以愛麗絲為主題既三層雜貨店 Alice on wednesday(水曜日のアリス)。
 
係JR原宿站既竹下口一出就係竹下通啦!星期六日既人山人海程度絕對不容忽視…簡直同旺角行人專用區有得揮,而筆者亦好睇唔開咁揀左星期六…
 
記得留意返原宿區大部份既商店都係收8點嫁!竹下通多特色舖頭就唔多講,不過值得一提既就係呢一間PARIS KIDS,全店既飾物都只係均一價324YEN,而且只係得竹下通店,絕無分店。
裡面有半間舖都係賣夾耳環,平時香港好難買到夾耳環仲要咁抵既價錢,啱曬無穿耳既女生們。另一大賣點就係會有福袋販賣!每個福袋只係324YEN,內含7件飾物,平均5蚊左右就買到一件,真係抵到爛!根據筆者經驗平均每個福袋裡面大約有4件飾物係唔錯既款,就算真係唔啱自己風格都可以當做手信送俾朋友﹐有好多女性朋友又煩惱唔知買咩手信既大家識做啦…
 
原宿係可麗餅聖地好多人都知,但短短一條竹下通經有數唔清咁多間可麗餅店,到底邊間最正?等筆者帶大家一探究竟!講到可麗餅不得不提就係為於竹下通中央呢兩間打對頭既可麗餅店。
 
聞說兩間都話自己係原宿可麗餅既起源店,但到底邊間先就無從考核(歡迎知道既讀者提供資料) 之前每次去竹下通都會俾粉紅色既外牆吸引而揀食左邊既ANGELs HEART,今次決定試下右邊既Marion crepes。今次突然想試一下鹹味,於是揀左吞拿魚忌廉芝士。根據筆者的判斷,Marion crepes的皮香脆得多,十分好吃,不過款式方面Angels heart配搭則比較多。至於足料程度,兩間也不相伯仲,所以大家看看較在意款式還是皮的口感嚕~(至於路中心和街頭同名的那一間…建議大家別被招牌吸引了,因料的份度只有這兩間的六成左右,而且皮的口感…呃…大家還是相信老字號吧~)
 
接住落尼終於到今日既重點重頭戲--Design festa gallery。佢既位置係竹下通一出過對面馬路既裡原宿區,都算幾易搵,就算行錯路都唔緊要,因為裡原宿有好多特色店舖值得大家慢慢行,不過記得佢同其他店舖都係一樣8點就會關門﹐記得要預返時間丫。見到一棟好似鳥巢咁既建築物就係啦!呢度唔需要任何入場費,裡面會不定期舉行一啲主題展覽,就算真係咁啱撞唔正主題展都唔緊要!因為呢個GALLERY係用分租方式將裡面既房間分租俾唔同創作者做短期個人展覽,所以每過幾日裡面既展覽就會唔同曬﹐保證每次都會帶到驚喜俾大家。大樓分成東西兩棟,每棟都有兩至三層,要行曬大概一至兩個小時左右。
 
大部份創作者都會係房間度進行創作或者同參觀者交流,如果大家日文講得唔錯的話絕對推薦同創作者傾下計~佢地每個都好NICE嫁﹐仲可以FOLLOW佢地IG睇下佢地之後既作品同日後發展動向。
 
出返裡原宿區,過返對面竹下通再一直向下面走到第一個大馬路口之後會見到兩條路(一條係近大馬路既闊路,另一條係比較似小巷兩邊都有啲住宅)行到小巷盡頭就會見到ALICE ON WEDNESDAY啦。Alice on wednesday 係雖然全日本一共有三間分店,但東京區就只有原宿一間,所以愛麗絲迷千祈唔可以錯過。佢個門口好特別~因為成間舖都係用愛麗絲做主題,連個門口都會配合返主題做得特別細模仿愛麗絲被縮小時的情景,等你可以更加投入愛麗絲世界。
 
店舖一共分成三層,頂層係瘋帽子既工房,主要係賣雜貨類例如袋同埋一啲電話配件。
 
第二層係紅心女皇既裁判所,係賣飾物為主,而價錢亦都十分實惠,一對耳環大約600~800YEN左右,係出面賣愛麗絲飾價錢最少一半!裡面仲有紅心皇后寶座歡迎大家坐上去隨便影相~
 
落返去最底層,就係白女王廚房﹐販賣茶包餅乾等等唔同小食手信。佢地每一種包裝同埋味道都有特別意思配合主題同埋故事情節,例如故事中愛麗絲唔小心飲左有DRINK ME紙條既變大果汁,店舖亦有推出一系列"Drink me’’ 果汁,其他特色食物實在太多,歡迎大家慢慢發掘。
 
Paris kids 地址:東京都渋谷区神宮前1-19-8
Alice on Wednesday 地址:東京都渋谷区神宮前6-28-3カノンビル
Design fa gallery地址:東京都渋谷区神宮前3-20-18
 
全力支持:大新銀行、香港航空、中國平安保險