【千奇百趣】東京發現全世界最細壽司

千奇百趣請俾趣!今日帶大家嚟到淺草雷門嘅「壽司店 - 野八」,表面上佢只係一間平平無奇嘅壽司店,實際上佢有全世界最最最細嘅壽司!細到得一粒飯! 我直頭要俾十個趣啊!!!
 
擔心一粒飯壽司會食唔飽?你可以放心,因為「壽司店 - 野八」呢度,可以品嚐到正宗嘅江戶前壽司,而江戶前壽司其中一個特點,就係以新鮮美味嘅魚鮮食材來製作握壽司,包你食到舐舐脷
 
我拜訪之前,專程透過電話同師傅預約,希望可以食到一粒飯壽司(因為一粒飯壽司一般只係特別節慶、情人節提供㗎咋),點知師傅唔單止一口答應,更特別提早開門,等我可以一人獨霸全世界最最最細嘅壽司添!好榮幸啊嘩哈哈
*最新資料:一般消費滿5000円,都可以問下師傅有冇一粒飯壽司(免費)但最好避免繁忙時間order喇
 
擁有神乎其技嘅刀工,創作一粒飯壽司嘅壽司師傅池野弘禮
一粒飯壽司
 
「壽司店 - 野八」係區內有名嘅高級壽司店,唔少老顧客、同業都會嚟品嚐江戶前手握壽司(因為今日係師傅提早開門,所以先暫時未有其他客人)
一粒飯壽司
 
到底點解會創作出一粒飯壽司㗎呢?師傅表示,壽司店 - 野八早就提供小壽司,原因係日本有個節慶 - 女兒節,一啲日本家庭會係娃娃擺飾前,放置散壽司、蛤蠣湯等節慶必吃的食物,而小壽司就係為呢類型嘅拜祭而設。有一日,有個客人問師傅:「到底壽司可以做到幾細呢?」,壽司師傅池野弘禮,就慢慢研究到底可以做到幾細,慢慢就變成今日嘅一粒飯壽司喇!
一粒飯壽司
 
一粒飯壽司同正常尺寸壽司放埋一齊,有好強烈嘅對比
一粒飯壽司
 
睇唔睇得出有咩壽司?
一粒飯壽司
 
由左上開始:吞拿魚、左口魚、拖羅、北寄貝
左下:海膽、八爪魚、玉子、子薑
一粒飯壽司
 
全世界最細嘅島係邊度?細到睇唔到!
一粒飯壽司
 
吖!終於睇到你喇!
一粒飯壽司
 
好堅持就算得一粒飯都要點豉油,見唔見到玉子上面有紫菜,好細緻啊!
一粒飯壽司
 
師傅話我聽,原來壽司店係香港都有分店,大家有興趣可以上網搵搵,不過一粒壽司就只有淺草雷門呢間先有喇
一粒飯壽司
 
壽司店入面有包廂,可以三五知己坐低傾下計
一粒飯壽司
 
一粒飯壽司
 
餐廳:浅草 すし屋の野八-「壽司店 - 野八」
地址:〒111-0034 東京都台東区雷門1-3-7
電話 03-3841-3841
定休日:星期日
營業時間:下午5:00~零晨2:00
一般消費:2000-5000円/Set(視乎壽司種類)

回覆

寶欣的圖片
我今次有海膽、有拖羅,大約4000幾Yen,另外有啲餐大約3000Yen都有。
不過留意要order 5000Yen先有一粒飯壽司㗎