【北海道冬季限定秘景】仙境般的純白霜花海

阿寒湖係北海道釧路市嘅一個淡水湖,一到冬天就會有好多人鍾意嚟呢度滑冰同釣魚,不過講到呢度最大嘅魅力之處,就一定唔少得係日本人都知嘅純白霜花海!
 
 
呢啲冰花其實係水蒸氣嘅結晶,由湖面嘅水蒜氣形成,因為水蒸氣一吹就會散,所以要見到呢種霜花一啲都唔容易,除咗朝早唔可以有風之外,前一晚仲唔可以落雪加上要天晴,但氣溫要介乎零下15度左右,如果唔係喺度留低住幾晚,睇到呢個霜花海嘅機會率可能只有20%。
 
 
要睇呢個咁靚嘅霜花海,就一定要係嚴寒嘅時候去,阿寒湖冰花海嘅最佳觀賞月份就係12月到3月,雖然好彩的話到朝早10都仲有可能睇到,不過如果萬一嗰朝突然落雪,啲霜花就會畀啲雪蓋破壞哂,所以如果可以的話當然就係一早起身就走過去睇啦!
 
 
行近少少睇會睇到會霜花嘅結構好靚,不過話哂都係喺個湖上面,大家影相嘅時候記得注意安全。
 
===================================
咁難得嚟到阿寒湖,梗係唔好睇完霜花就即走,因為呢度仲有其他野玩㗎!好似冰釣咁,喺香港根本唔會有機會玩到,趁呢邊有哂所需裝備,當然玩埋先走啦!
 
 
喺「あいすランド阿寒」接待處可以租借到釣竿、魚餌同櫈仔,唔使自己山長水遠拎過去。
 
 
仲有埋帳篷可以擋吓風,去過北海道都知嗰邊冬天真係唔講得笑!
 
 
釣到嘅魚仔仲可以去場內餐廳畀店員幫你炸成天婦羅,熱辣辣食到個人暖哂~
 
あいすランド阿寒
地址:北海道釧路市阿寒町阿寒湖温泉2丁目
電話:0154-67-2057
營業時間:冬季1月9日~3月31日 08:00~日落
費用:¥1,500
 
===================================
如果決定喺度住返晚,建議大家可以揀有露天溫泉嘅住宿,浸住溫泉睇雪景真係識歎到爆!唔知住邊好唔緊要,睇吓下面呢幾間有冇心水?
 
1. 阿寒遊九之里 鶴雅
 
呢間溫泉酒店位於阿寒湖西邊,大部份房間都可以望到特大湖景,而最大特色係頂樓嘅露天大浴場,可以邊浸邊欣賞阿寒湖嘅無敵雪景,夜晚去仲可以睇到超靚嘅星空!
 
頂樓露天大浴場
 
啲房嘅空間都幾大,別館嘅和洋室更加可以睇到阿寒湖湖景同周邊山景。
 
あかん遊久の里鶴雅
地址:釧路市阿寒町阿寒湖温泉4丁目6番10号
電話:0154-67-4000
房價:二人一房 ¥12,500~/人
 
 
2. 阿寒湖莊
 
想住得經濟啲可以考慮吓呢間「阿寒湖莊」,2樓花園都有一個露天風呂,雖然冇上面嗰間鶴雅咁一望無際,不過夜晚嚟浸一樣睇到好靚嘅星空!
 
2樓露天風呂「鹿鳴の湯」
 
和洋室空間好大,個景望出去都唔錯!
 
ホテル阿寒湖荘
地址:釧路市阿寒町阿寒湖温泉1丁目5-10
電話:0154-67-2231
房價:二人一房 ¥6,388~/人
 
3. 阿寒湖溫泉 山水莊
 
如果唔執著一定要有露天溫泉,只要求近阿寒湖同住得舒服的話呢間「山水莊」都唔錯!呢度全館有20間房,因為屬於比較傳統嘅溫泉旅館,所以當中只有9間房有附設廁所同浴室,要訂就要快手啦!
 
附衛浴房間一泊二食都只係¥8,000起一個人,好抵玩!
 
阿寒湖温泉 ホテル山水荘
地址:釧路市 阿寒町 阿寒湖温泉 1-3-15
電話:0154-67-2101
房價:不含餐飲二人一房 ¥3,800~/人