【勁量級「海鮮塔丼飯」】 未食眼睛先興奮!

要食好野,緊係要去遠少少㗎啦!呢間位於福岡博多站駕車10分距離嘅「海輪亭」嘅海鮮塔丼飯「特上海鮮丼」無論係價錢定賣相都極度吸睛,¥1,800就可以一次過食到爆多新鮮好料,抵食到喊!不過提提大家,呢個丼飯只會喺上午11點半到下午1點半呢段午飯時段供應,唔好去錯時間!
 
 
「海輪亭」雖然下午專供丼飯同定食,但一到晚上就會搖身一變成為炭火燒肉同海鮮七輛燒專門店,風味同午飯時段截然不同。
 
 
當日定食嘅Menu嘅選擇其實唔算好多,不過都足以令你選擇困難,有鹽燒秋都魚定食、燒豚肉定食、炸豬扒定食、炸魚定食、炸蠔定食、三文魚籽丼,但呢啲通通唔係今次目標!
 
 
如果熟食唔係你杯茶,呢個Menu仲有好多唔同種類嘅海鮮丼,而今日嘅Target「特上海鮮丼」就喺左上角啦!
 
 
(°Д゚;)
咩事!?係咪海鮮唔使錢!!
 
個丼一上枱一定會唔小心嘩咗出嚟!點解可以豐富到咁,個砌法仲好似亂中有佢既定嘅規則咁,睇落危危乎,但又唔會跌!成個丼好高好長,高到坐直個人頂頂啲刺身幾乎可以拮到你下巴!
 
 
海鮮塔可以咁堅廷,最頂嗰半截扇蝦功不可沒,要食呢個海鮮丼亦最好由呢隻蝦開始入手。睇唔睇到?隻蝦中間有勁多蝦膏!
 
 
為咗唔好食食吓先嚟崩塌,穩陣啲都係將啲刺身移去個碟再慢慢食。
 
 
成個海鮮塔真係有超多唔同種類嘅刺身,鯖魚、馬加、紅魽、石鯛、竹筴魚、比目魚、三文魚、太刀魚、吞拿魚等等,叫店主數返畀你聽,連佢都覺得有難度!而最驚喜嘅係,就算係同一種魚,佢都會有唔同部位,好似吞拿魚,就有赤身同拖羅。
 
 
為免大家食咁多刺身食食吓會覺得膩,店主一早中間加咗酸眯眯嘅薑同水雲兩兜可以解膩嘅小漬物,又幾貼心喎!
 
 
個蠔殼入面裝住嘅竟然唔係蠔肉而係特製醬油煮魚,真係估佢唔到!原來呢個刺身飯除咗有勁多刺身,食食吓仲會發現唔少驚喜!
 
 
食到咁上下,呢個飯終於似返我地平時食到嘅海鮮丼飯,雖然已經飽咗8成,但刺身加豉油加日本米呢個無敵黃金配搭又會令人一啖又一啖不停咁食,成碗話都冇咁易就KO哂!
 
炭火焼 海輪亭
地址:福岡市南区清水2-1-57
電話:092-512-6533
營業時間:11:00~14:00、17:00~22:30
休息:星期六日及公眾假期,其他日子不定休