【勁得意】識跳舞嘅章魚燒機!!!

 
識跳舞嘅章魚燒機!!!【點解嘅?點解識跳舞嘅?】
今次同Mingsze一齊試玩呢部機,
好啦!唔講咁多即刻開始!
 
自製章魚燒其實唔係最大嘅重點,
個重點係我地用到嘅果部「識跳舞嘅章魚燒機」!
佢有咩咁特別呢?就係只要你㩒個制,
佢就會係咁喺到震,幫你D章魚小丸子燒得平均D,好味D。
咁除左部機之外,最重要嘅就當然係D材料啦係咪?
 
我地所用到嘅材料就有:
章魚燒粉  半包
水           800ml(因應粉量而控制)
蛋           2隻
油           適量
章魚        適量
椰菜        適量
杏鮑菇     適量
木魚屑     適量
燒汁        適量
沙律醬     適量
 
咁其實好易買,普通喺一田果D都會搵到。
同埋其實小丸子入面嘅料係任你配搭,放咩入去都無所謂嫁!
 
 
咁首先就係要打蛋漿,將章魚燒粉同蛋先倒落碗到,
 再分2-3次加水落去撈勻。之後就要先炒熱D材料,
 先開機等佢予熱幾分鐘(說明書寫5分鐘但其實2分鐘左右已經好熱),
 落D油落部機到,然後用掃/廚房紙塗平均,
就可以放落去炒熱啦!
 
跟住落黎,就係最重要嘅步驟,整章魚燒啦!!
就咁將蛋漿倒落機,倒滿會比較好,
再放埋D料入去,然後就等佢自己燒一陣。
 
 
到咁上下,就用枝籤慢慢試下將佢反轉,
然後你會發現...係失敗嘅!不過都係失敗頭一兩粒,
之後就會覺得自己已經掌握到竅門,愈反愈成功,好似係。
 
就係咁樣不停反,反到你認為差唔多熟哂,
D漿唔會再係水狀嘅時候就可以開震震制啦!
 
一開嘅時候,勁得意呀!佢真係會係咁震嫁!
不過唔係粒粒小丸子都識轉,有D要轉下佢先識郁,
等佢轉多陣,咁就完成嫁啦!
 
 
想睇部機震成點?即刻睇片啦!
睇完有無興趣買番部黎玩下呢?
因為我地發覺,佢除左可以整到章魚燒之外,
只要係水狀嘅都可以放落去整成圓型!
其實係幾好玩㗎!整嘅時候一定會係咁笑哈哈!
 
如果你鍾意呢篇blog,就幫我地share啦!
下次見!
 
===========
踊るたこ焼き器
溫馨提示:呢部機嘅電壓同香港唔同㗎,要買埋電壓器!
價錢:¥ 13,260
岩岩搵過,網上都有得買㗎!