劇透呃like因住! SE擬控告劇透者隨時開先例

香港人生活急速,收慣速食資訊,網絡傳媒就往往就更加係「Need for Speed」,有咩資訊最近要快過人,有野唔理堅定流、有冇睇啲唔睇啲,總之就放曬出去先。更甚嘅甚至話知你「劇透死全家」,反正like已袋,班友仔鬧完都係死死氣入去睇,冇成本佢老虎蟹都透咗先。
 
 
不過第日就可能冇咁爽啦。話說SQUARE ENIX「搞足十年」嘅遊戲『FINAL FANTASY XV』離推出重有差不多一個星期,不過由於中東地區上個禮拜已經偷跑咗,搞到直播、破關影片滿天飛,搞到其他玩家大叫「冇癮」,特別有啲死忠等足十年,真係重慘過睇咗『逃跑』條劇透片。
 
 
各種劇透唔單止又海外回流到日本網絡,之後俾日本國內嘅「やらおん」網站整合發佈,甚至已經影響到預訂狀況。
 
對於呢種過晒火位嘅劇透(大佬成套直播片放上網),已經引起咗製作團隊,甚至SE股東嘅不滿。淨係總監田畑端就已經表示,佢地已經調查類此行為有冇造成「營業妨礙」,甚至會採取法律措施,而有SE股東更發表聲明,認為應該立即對劇透玩家提出訴訟(特別係今次除咗大量周邊外,重有同SONY合作出CG電影)。
 
製作總監田畑端
 
咁其實劇透呢家野有冇得告呢? 網站nanapi就曾訪問過アディーレ法律事務所嘅律師吉岡一誠老師。只要能夠證明自己因「近日預備去讀取結局嘅情況下,加上已經購入作品,及後因被劇透而受到傷害。」以及該劇透為「故意」及「只要劇透者留神其實可以避免而最後沒有避免劇透」,係有機會成功索償。
 
ATLUS推出PERSONA 5時亦曾暗示劇透有機會涉及法律訴訟
 
 
鍾唔鍾意劇透呢,其實就家家有求,有人鍾意睇結局先,有人唔鍾意。不過如果好公開咁劇透,例如直接將劇情片段放上facebook呃like,就真係唔係好妥啦。不論今次SE最終係咪真係做野,希望各位都可以借呢件事反思一下,己所不欲,忽施於人呀。
 

 

 
2016 SQUARE ENIX CO., LTD. All Rights Reserved. MAIN CHARACTER DESIGN:TETSUYA NOMURA
 
資料來源:
IGN Live: Exclusive Final Fantasy 15 Gameplay and Interviews