【初心者東京自遊行秘笈】LikeJapan4日3夜建議行程(DAY4)

【初心者東京自遊行秘笈】LikeJapan4日3夜建議行程(DAY 4)淺草、晴空塔及成田機場落車篇!
 
第4日嘅推介行程係假設讀者要由成田機場坐18:00嘅夜機返香港,16:00前要抵達成田機場,所以緊記最少飛機起飛前3個小時前(即係下午3點)就要到達「京成上野站」坐火車去成田機場。
 
由於扣除車程實際只有4小時左右可以漫遊,所以除非讀者係好早去淺草,否則都應該行唔晒兩個地方。於是就決定提供兩個方案俾大家選擇,覺得東京好玩嘅,咪下次去埋另一個囉,旅行唔留啲遺憾就冇動力下次再去啦XD
 
想睇返第1日行程的話,可以去呢度
第2日行程的話,可以去呢度
而第3日行程的話,可以去呢度
 
Plan A~淺草行晒全日!~
品川︎上野︎淺草︎上野︎成田機場
 
前往淺草,可以跟循以下路線 (370日圚/車程約30至35分鐘):
由JR品川站坐東海道本線/山手線京濱東北線(東京方向)前往上野站(車程約16-18分鐘,車費為200円。)
 
於車尾落車,經「不忍改札」出站。行去京成上野站放低行李。
(為免拎住啲行李周圍走,車長推介先放低行李喺京成上野站入面啲儲物櫃先,等去完淺草之後,就返去京成上野站拎返啲行李再上車去機場)
放低完行李之後先去地下鐵銀座線上野站,坐銀座線去淺草(車程約5分鐘,車費為150円。)
 
呢度有段片係日本人教點樣由京成上野站去地下鐵銀座線上野站,讀者不妨參考參考:
 
雷門+淺草寺
 
到達淺草站後,最好喺4號出口 (吾妻橋、隅田川、水上バスのりば) 出。
因為淺草站四通八達,有啲出口係連住地下街,仲有啲出口比較隱蔽好難搵到,所以認住個最大嘅出口就最好,萬一行錯路去返個最大嘅4號出口都易啲。
 
 
淺草必去嘅景點有雷門、仲見世通同淺草寺。不過其實佢哋係一條直線行得晒,大家睇吓地圖就會明晒!
其實4號出口後面直行就已經係雷門!雷門都算係東京最有代表性嘅地標,東京嘅觀光小冊子、旅遊天書,甚至今年里約熱內盧奧運會閉幕時介紹東京2020年奧運會嘅片段都有出現雷門㗎!
 
行入去就係仲見世通,基本上全部都係賣手信嘅舖頭~
 
喺度車長推介一間比較特別少少嘅舖頭,喺仲見世通嘅中間位置,有間専門賣遮嘅西島商店。
入面賣嘅和傘幾靚之餘,仲一啲都唔貴添~
網址:www.asakusa-monjayaki.com/asa_guide/miyage/wagasa/
 
穿過仲見世通就係淺草寺!
 
肚餓的話,喺淺草一定要食蕎麥麵! 車長推介一間叫おざわ嘅蕎麥麵店,
由淺草寺行過去約7分鐘,特別之處在於個蕎麥麵係好闊嘅。
 
由於前往機場需時,車長建議下午2點半就要開始搭車返上野,預備去成田機場。
 
由淺草去成田機場方法:
由地下鐵淺草站,坐地下鐵銀座線去返上野
再由京成上野站坐京成本線Skyliner前往成田機場
(車程約40分鐘,車費:大人2470円、小童1240円、約20-50分鐘一班車,服務台可用信用卡付款)
 
Plan B~行完淺草後再去晴空塔!~
 
品川︎上野︎淺草︎晴空塔︎淺草︎上野︎成田機場
有啲團友可能對淺草嘅興趣不大,而純粹係淺草打個圈,之後又唔知點打發時間的話,
可以去埋晴空塔!
 
由淺草去晴空塔,可以跟循以下路線:
由東武淺草站坐東武鐵路、一個站就到東京晴空塔站(とうきょうスカイツリー駅),車程約5分鐘、車費要150円。
 
 
 
晴空塔設有有2層展望台,分別高350米同450米。
外國遊客不單止有外國人專用售票處,仲有專用嘅快速入場券。分3000円(只能上350米展望台)同4000円(350米同450米2個展望台都可以上晒)2種。不過價錢就比日本人買嘅貴1000円,完全係俾錢買時間!
 
車長推介先買左個3000円快速入場券先,上到350米展望台後,想再上高啲先再係350米嘅天望甲板,買飛上450米嘅天空回廊。
車長有朋友試過喺350米嘅天望甲板望唔到富士山,但上咗450米嘅天空回廊就見到富士山喇~
不過要留意時間返去京成上野站。
 
方法一(約半個鐘車程,220円):喺Skytree坐晴空塔穿梭巴士直接去到上野公園外面,再步行到京成上野站。
方法二(約15分鐘車程,320円):喺東武東京晴空塔站(とうきょうスカイツリー駅)坐去東武淺草站,再喺淺草轉地下鐵銀座線去上野站。
再由京成上野站坐京成本線Skyliner前往成田機場
 
呢度有段片係日本人教點様由東武淺草站去地下鐵銀座線上野站,讀者不妨參考參考:
 
前往機場之注意事項
 
留意成田機場係由3個大樓組成,記得睇清楚自己係邊個大樓。
留意火車只係去到第1大樓同第2大樓。如果要去第3大樓,就要由第2機場大樓行15分鐘,或者坐巴士去先去到第3機場大樓!
 
京成本線Skyliner會先停第2大樓車站,終點站就係第1大樓車站!
 
第2大樓車站名係「空港第2ビル」:
 
第1大樓車站名係「成田空港」:
 
唔好去錯呀,雖然有穿梭巴士來回第1及第2大樓,但班次都唔算密。萬一去錯咗,會浪費唔少時間!
提示多一次:
全日空、仲有埃塞俄比亞航空就係喺第1大樓南翼;
國泰香港航空日航香港快運係喺第2大樓;
香草航空捷星日本係喺第3大樓!
 
同埋第2大樓車站有指示去第3大樓,不過車長見到就嚇一嚇!要行730米呀!!
 
最後補加返:萬一出境個陣問你退税啲野喺邊,話寄咗倉就得架喇!
今次為大家精心編排新手東京4日遊行程,不過其實日本一次又點玩得曬?我地會繼續努力協助大家解決行程問題,有咩問題歡迎上討論區發問!玩得開心D啦 :)
 
 
+++++++++【樂天平掃日本貨】+++++++++
 
coupon折扣優惠: 
滿物滿¥11,000,可享¥1,500優惠
滿物滿¥14,000,可享¥2,000優惠
滿物滿¥20,000,可享¥3,000優惠
外加必掃福袋,詳情請參考: www.likejapan.com/cymonbottom