【初心者東京自遊行秘笈】LikeJapan4日3夜建議行程(DAY 3)

【初心者東京自遊行秘笈】LikeJapan4日3夜建議行程(DAY 3)
 
想睇返第1日行程的話,可以去呢度
第2日行程的話,可以去呢度
 
第3日,女仕們出發前要Check清楚有無帶足Cash同信用卡!今日重點係Shopping!!!
 
品川 -> 代々木公園 -> 原宿(竹下通/裏原宿/表參道/キャッツ通り) -> 澀谷(ヒカリエ/忠犬八公廣場&QFRONT) -> 品川
 
第3日嘅推介行程早上先去明治神宮吸吸新鮮空氣,明治神宮位於代代木公園入面,
撞正星期六、日去的話,仲有機會有跳蚤市場,要執平貨呢個係好機會啦!
 
去之前可以睇睇呢個代代木公園嘅非官方網站 (日文網站),可以一次過睇哂最近有咩大型節目,好方便。
 
至於點去?大家可以於品川站乘坐JR山手線(2號月台往澀谷、新宿方向),車程15-17分鐘,車費170円,
喺代々木(代代木)落車,落車後喺西口出去轉左。
 
 
沿北參道行到中間就有個全日本最大嘅木製鳥居,再行入去就會到明治神宮。
 
呢度就係明治神宮嘅正面「南神門」,撞正日本新年的話,啲人仲多過農暦年初一嘅黃大仙!
 
行完之後神宮可以繼續行代代木公園,不過公園範圍都幾大,識踩單車嘅不妨以單車代步,園內有單車徑,租單車一個鐘都只係210円,但要留意租車店星期一休息。
 
公園入面有個展望台橋,喺展望台橋望出去個景都幾靚,
通常去跳蚤市場都要經過呢度。
非常熱鬧嘅跳蚤市場
 
【原宿】
 
行完明治神宮同代代木公園之後,係時候行去原宿行街食野嚕。原宿主要分成「竹下通」「裏原宿」「表參道」同「キャッツ通り(貓街遊歩道、表參道至澀谷一段明治通)」4個區,當中竹下通就係梗係必去之地,而家仲有埋旅客咨詢服務中心,唔識日文都唔使怕啊!
 
竹下通
竹下通有咩行?一望個購物地圖就知有大把野行啊!去埋官網精選定幾間,到時就可以慳返好多時間!
竹下通地圖
 
咁多間舖入面車長最鍾意去「OSHMAN'S」,男裝女裝衫同波鞋咩都有,唔怕悶親另一半。食店方面呢,車長首推以西餐主嘅Blue Garden「ブルーガーデン」,野食好味不特止,開放式座位都好舒服,最啱行到攰攰地入嚟食吓野差吓電。
 
OSHMAN'S
地址:東京都渋谷区神宮前1-14-297
營業時間:   11:00-21:00
 
名稱: BlueGarden ブルーガーデン 〈以西餐為主〉
地址: 東京都渋谷区神宮前1丁目15−4 バルビゾン76号館 2F
營業時間:   11:00-23:00
 
 
裏原宿
比起表參道,車長個人會喜愛裏原宿多啲,因為好多好特別又得意嘅精品同車長鐘意嘅衫褲!
 
 
一睇裏原宿個地圖就知冇返4-5個鐘根本唔會行得晒!
 
如果你都鍾意古著,推介你嚟呢間HESHDAWGS「ヘッシュドーグズ」,款式都幾多同新,車長讀書個陣有一半衫褲都喺度買㗎!
HESHDAWGS(ヘッシュドーグズ)
地址:東京都渋谷区神宮前4丁目25−7
營業時間: 12:00-20:00
 
食野的話,一定係Sakura亭「さくら亭」,有得食大阪燒、文字燒同鐵板燒嘅放題,最平2100円就有得食,仲可以落手落腳自己整,好好玩!
さくら亭
地址:東京都渋谷区神宮前3−20−1
營業時間:11:00-24:00
 
表參道
表參道係荷包最大敵人,車長個妹次次去親,荷包都「壯烈犧牲」,連信用卡都五勞七傷。
 
不過
表參道有超多野買,出發前記得睇定地圖揀定必去店舖!
 
表參道地圖
 
如果你同車長一樣都係火車愛者,可以嚟呢間火車模型店「IMON原宿店」望吓,店內有唔少火車模型(以HO Scale為主),雖然未至於好似喺澀谷或秋葉原咁會買到出事,但喺呢度都隨時俾佢「荷包放血」。
IMON原宿
地址:東京都渋谷区神宮前6−3−9 井門原宿ビル4F 
營業時間:  12:00-21:00
 
鍾意卡通精品的話可以去埋「Kiddy Land」,入面有鬆弛熊、Hello Kitty、 星戰同Snoopy嘅精品發售。
KIDDY LAND
地址:東京都渋谷区神宮前6−1−9
營業時間:11:00-21:00
 
如果到時候晩飯,可到神宮前5同6町目(明治通り)有個叫「Q-plaza」嘅廣場,入面有間「北陸酒場」,據一個原宿返工嘅OL介紹,呢間舖今年10月先開,屬於區內新店。
 
北陸酒場
地址: 東京都渋谷区神宮前6丁目28−6 キュープラザ原宿
營業時間:  12:00-24:00
 
行咗成日如果都覺得仲未行夠的話,沿明治通入面嘅貓街遊歩道「キャッツ通り」行去澀谷一段都好多舖頭,行吓買吓好快就行到去澀谷!
 
明治通及貓街遊歩道地圖
 
澀谷
因為東急同JR澀谷站改建,澀谷完全分為2邊,分別係東面東急渋谷嘅「ヒカリエ」同西邊「忠犬八公廣場&QFRONT」
 
ヒカリエ
犬八公廣場&QFRONT
 
澀谷簡單地圖
 
行商場的話Hikarie「ヒカリエ」一定係首選,因為佢暫時係澀谷最新嘅購物中心。
名稱: ヒカリエ
地址: 〒150-8510 東京都渋谷区渋谷2丁目21−1
營業時間:  10:00-23:30
 
但車長比較鍾意行西邊忠犬八公廣場一帶,因為有Loft、Tokyu Hands同Shibuya109。
 
名稱: Shibuya109
地址: 東京都渋谷区道
玄坂2丁目29−1
營業時間:  10:00-21:00
 
澀谷有大把野食,不過如果你係肉食愛好者的話,車長推介你去渋谷肉横丁,入面有成26間舖,全部都係肉食料理店嚟㗎!
 
渋谷肉横丁
 
呢舊居然係寿司!!!
渋谷肉横丁
地址: 〒150-0042 東京都渋谷区宇田川町13−8 ちとせ会館
營業時間:  10:00~深夜
 
玩咗成日係時候要返去啦,住品川最正就係夠方便,過咗12點都仲有車!
山手線尾班車約喺1點於澀谷站2號月台開出,坐車返去15分鐘左右就到喇,車費都係170円。