【初心者東京自遊行秘笈】LikeJapan4日3夜建議行程「機場、市內交通、住宿及第1日行程篇」

【初心者東京自遊行秘笈】LikeJapan4日3夜建議行程
 
 
「機場篇」
 
喺開始行程之前,大家要先對東京機場有簡單概念,所以就等車長簡單講吓我地最常用到嘅兩個機場「羽田機場」「成田機場」先啦。
 
羽田機場:
羽田機場由3個機場大樓組成,以前主力飛日本國内線,2014年起開始開放畀國際線航班停泊升降。
國際線航班只會使用國際線機場大樓
 
而機場第1及第2大樓則屬國内線専用,目前由香港飛羽田嘅航空公司有快運全日空國泰日航港龍,每日有超過6班航班前往羽田。要留意係羽田機場正式名稱係叫「東京国際空港」,英文係叫「Tokyo International Airport」,機場代碼為「HND」
 
 
成田機場:
成田機場正式名稱為「成田国際空港」,英文名係「Narita International Airport」,機場代碼為「NRT」,由3個大機場大樓組成,主要係畀國際線及低成本航空公司専用。
大家常用嘅全日空,仲有埃塞俄比亞航空就係喺第1大樓南翼;
國泰、香港航空、日航、香港快運係喺第2大樓;
香草航空、捷星日本係喺第3大樓。
 
要留意返得第1大樓同第2大樓先有鐵路線接駁去市中心,如果落機係喺第3大樓,就要行15分鐘或者坐巴士去第2機場大樓先走到,而由成田機場坐火車去東京市中心要大概要40~60分鐘左右。
接駁成田機場鐵路路線圖
 
 
茨城機場:
再遠少少其實仲有個茨城機場,不過香港人好少會用到。呢個機場正式名稱都係叫「茨城機場」,英文係「Ibaraki Airport」,機場代碼為「IBR」,目前只有春秋航空經營嘅國際線路線往來茨城同上海浦東。
 
重要提示:記得睇清楚自己航班係飛成田定羽田,唔係講笑,有唔少人真係會唔睇清楚,到回程時去錯機場搞出個大頭佛。
 
「市內交通篇」
 
日本地鐵以複雜見稱,到咗東京之後,大家一定會擔心市內交通點先可以搭得精明、快捷、輕鬆。車長提提你,由於東京啲Pass喺今次唔係太合用,所以建議大家一去到首先要買返張Suica或Pasmo,即係日本版八達通,好多地方都用到,嘟一嘟就搞掂,唔使成日摷錢咁論盡。
 
至於邊度有得買,如果你係喺成田機場的話,Suica可以喺JR主要車站入面嘅售票處(みどりの窓口)同售票機買到,Pasmo可以喺京成電鐵嘅自動售機度買到。如果你係喺羽田機場的話,就只可以喺東京單軌度買Suica,京濱急行嘅自動售機度買Pasmo。買邊一隻都問題、因為2張卡係共通!
 
購買方法可以參考:JR東日本Suica購入Youtube教學
 
JR車站售票處(みどりの窓口)
 
 
Suica西瓜卡
 
Pasmo
 
「住宿篇」
 
為咗留返更多體力血拼,車長建議大家4日都住同一間酒店,咁就唔使為咗要轉酒店成日搬住舊行李周圍走咁辛苦。
 
個人意見,初心者的話,品川係一個唔錯嘅選擇,因為品川嘅交通非常方便,好多地方都可以一程車直達,毋需轉車,好似從羽田機場出發可以坐京浜急行,15分鐘倒就會到達品川;成田機場就可以坐JR成田特快,全程大概1個半鐘倒!想去横濱都好方便,都只係2~3個站,真係轉眼就到,而距離大家必去嘅渋谷、原宿、新宿、新橋、秋葉原、上野都非常方便,坐山手線去幾個字就到。
 
JR品川站港南出口
 
 
山手線路線圖
 
除咗距離好多必去景點都好近之外,品川站港南出口附近有好多野食,多數都收得比較夜,夜媽媽突然口痕想去食個宵夜都超方便。
 
品川站附近有好多酒店,但如果大家冇咩心水住邊間好,車長首推「品川王子大飯店」,一來夠近車站,由品川站行過去只係3分鐘左右,二來房內空間夠大,三來價錢唔貴,一晩都係7000円~8000円左右。
 
大部份酒店都集中於高輪口嗰邊嘅出口,即係鄰近王子酒店嘅出口。
品川高輪出口
 
品川王子大飯店
 
4日3夜建議行程
 
睇到嚟呢度,相信大家都對東京有基本概念。事不宜遲,就等車長為大家度身訂做一個專為初心者而設嘅4日3夜建議行程啦!
 
行程3大重點:
●以東京市中心行程為主
●唔搬酒店
●盡量毋須繁複轉車
 
Day 1: 機場 ⇨ Aqua Park 品川嘅海洋館 ⇨ SHINAGAWA GOOS/お好み焼ききじ ⇨ 天王洲アイル ⇨ 品川王子大飯店
Day 2: 品川王子大飯店 ⇨ 台場 ⇨ 東京廸士尼 ⇨ 品川王子大飯店
Day 3: 品川王子大飯店 ⇨ 代々木公園 ⇨ 原宿 ⇨  渋谷 ⇨ 品川王子大飯店
Day 4: 品川王子大飯店 ⇨ 浅草雷門寺 ⇨ Skytree  ⇨ 上野 ⇨ 成田/羽田機場
 
DAY 1 (機場 ⇨ Aqua Park 品川嘅海洋館 ⇨ SHINAGAWA GOOS/お好み焼ききじ ⇨ 天王洲アイル ⇨ 品川王子大飯店)
落機之後,不論係喺成田定羽田,車長都建議先返酒店放低行李抖抖先,好多酒店都有行李寄存服務,就算未到check-in時間都可以放低件行李輕輕鬆鬆去行街~
 
如果落機已經係晏奏,估計放低行李之後已經天黑,大家可以去個近近地嘅景點,好似王子酒店入面嘅Aqua Park 品川海洋館,全館分咗10個小區,同其他水族館感覺好唔同,有海洋生物睇又有表演欣賞,冇返三兩個鐘真係行唔完!
晚餐可以選擇品川站附近食店,不過如果唔想行咁遠可以留返喺酒店範圍嘅大型購物中心「WING高輪」食,入面有超過10間食肆,西餐中餐咩都有,個人推介主打東北秋田郷土料理「あきた美彩館(秋田美彩館)」。
如果想食返個日本地道嘅大阪燒,強烈建議大家去品川市內人氣No.1嘅「お好み焼き きじ 品川店」,入面嘅招牌大阪燒好味到連當地人都大力激讚,記得點埋個炒烏冬食,夠哂火候超好味!
 
食到咁飽,如果仲有啲時間,不妨慢慢散住步咁行去出咗名夜景靚嘅「天王洲アイル」一帶。呢個地方唔難去,喺お好み焼ききじ出嚟之後會見到有條橋,過咗條橋之後一路直行10分鐘左右就會到,
嗰頭高樓林立,河水反映住萬家燈火,吹住微風,氣氛特別迷人。
 
品川王子大飯店
地址:東京都港區高輪4-10-30
電話:03-3440-1111
 
Aqua Park 品川嘅海洋館
地址:東京都港區高輪4-10-30 (品川王子大飯店內)
電話:03-5421-1111
營業時間:10:00~22:00
門票:大人 ¥2,200、小童 ¥700(出示王子大飯店客房鑰匙布特別折扣優惠)
 
あきた美彩館
地址:東京都港区高輪4丁目10-8WING高輪WEST-Ⅲ1樓
電話:03-5447-1010
營業時間:11:00 〜 23:00
 
お好み焼 きじ 品川店
地址:東京都港区港南2-3-13 品川フロントビル 2F
電話:03-6712-0256
營業時間:11:00 〜 23:00
休息:不定休
 
天王洲アイル
地址:東京品川東品川2-3-8